Sheraton Okinawa Sunmarina Resort （圖片轉自網絡） 最近去咗沖繩，好想介紹俾大家一間位於沖繩恩納嘅resort，其實沖繩大大話話都有好多唔同嘅酒店，同埋佢哋都有一個好靚嘅海景，暑假過嚟住返幾日真係放鬆嘅好地方，今次介紹依間resort，係2016年成為Marriott 旗下酒店，正式命名為Sheraton Okinawa Sunmarina Resort。佢除咗有main tower之外，仲新建左一座South Tower，就係最左邊果棟啦。 今次我就住咗係South Tower，一共有六層樓高，地下有個免費lounge，有啲野飲野食，坐低傾下計，重點係野飲refill得好密！抵讚！我地住四樓，一開頭我入房都覺得大驚喜好正，因為房間好新好大，成個房間嘅設計都比較新穎同埋舒服，但當我打開露台窗簾嘅時候真係幾失望㗎。好老實咁講，South Tower的層數比Main Tower低，而且大部份嘅房間景觀都唔係對正大海，所以以海景來講Main Tower的而且確係比較正。可能我地抽唔中對大海果邊啦，不過住Main Tower嘅話，你都要揀高樓層先至可以望到一個好靚嘅海景。但係住咗幾日之後，其實我發覺我哋間房望出去海景都唔錯，可以望到教堂，同埋一啲嘅海景。最重要係房間真係好舒服。但就離停車場比較遠。 咁依間酒店係一間Resot酒店，佢有一個好大嘅停車場，住客只需每日比500 Yen就可以任泊。而且佢有一個私人嘅沙灘，雖然呢度有好多住客，但落去泳灘游水又唔算多人。由於我地住South Tower嘅關係，所有唔係機動嘅海上活動都係免費嘅，例如獨木舟、水上單車、租借水泡浮床等等。而且依間酒店仲係沖繩目前來講，唯一一間可以玩zip line嘅酒店，不過我哋住咗幾日都因為天氣關係（太大風）玩唔到，真係有啲失望！不過我哋就參加左酒店舉辦嘅浮潛，價錢就比出邊貴少少，但係我哋參加嘅時候係冇人參加嘅，所以都算係私人包團！抵番曬！ 其實我都真係幾Recommend 依間酒店，一嚟佢有新嘅Tower可以揀，二佢嘅海景真係好靚，第三就係佢有自己嘅教堂同埋私人沙灘，仲有攝拉玩添。每次黎沖繩都揀佢架，我知道其實沖繩都起咗唔少新酒店，但係依間酒店真係keep得唔錯，住得好舒服，下次再嚟嘅時候，我應該會再揀返呢間酒店，不過就要選擇下住邊棟Tower啦。 Reference : https://www.marriott.com/hotels/travel/okasi-sheraton-okinawa-sunmarina-resort/
