岩岩突然睇到好多有關爸爸既文章，搞到我都突然有啲野想講下。 我爸爸有三個女，我係大女。 爸爸做運輸，細個就開始騎住博馬，坐住貨車跟佢周圍走。 佢鐘意帶我睇唔同野，試唔同野，想我見多啲識多啲，叫我要獨立，出去唔好驚驚青青大方啲。好記得去m記一定叫我幫手拎茄汁(我估佢係想訓練我) 行街見到乞兒一定會俾錢我叫我放落去個兜到，仲會同我講幫到人就幫。 帶我去食佢鐘意食既街邊小食，豬紅豬腸韭菜蘿白，一定會處理過啲豬腸先俾我地食。 對我好嚴厲，讀書行為說話作息咩都會管。 問佢出唔出得街一定叫我問媽咪，問完就叫我要早啲返同埋問我有冇錢 佢話 : 「女仔帶啲錢出去，想食咩就自己買，唔好要人地請 得閒仲可以請下朋友食。」 佢教我飲酒，話女仔要識飲少少先唔蝕底俾人。 夜返屋企既時候，開燈後好多時都會見到爸爸訓左係廳，唔知佢係咪等我，但久而久之我已經默默解讀佢等我門。 自己好慳，食好平，一個幾毫都會計。同我地就叫我地鐘意食咩就叫，試新野。 買衫褲鞋襪永遠都係等特價先買，仲會貨比三家諗好耐。 其實佢好鐘意食住家飯，成日研製新菜色，煮到身水身汗。 有時會自己講自己笑，笑既時候成個大細路咁。 佢係鐵漢柔情，會偷偷感動流淚。 太多太多既事，諗起個心會甜、會酸、會痛、會澀。 有時會羨慕人地既爸爸好貼心當個女成個公主咁養。 其實調轉頭諗，雖然我爸爸又惡又口不對心但都不失為一個愛家人既真漢子。用佢既方法去教我地去愛我地關心我地。 所以話，爸爸呢種生物真係好容易令人又愛又恨呀！
