Happy Friday從來都唔係由星期五00:00開始，而係由星期五18:30開始！ 特別係呢啲，連放三日假前既星期五。對老闆同個客黎講，佢地會覺得你好似將要放三個月咁。佢地認為你放多一日星期一，你就會記憶力嚴重衰退，工作能力嚴重低下，工作效率嚴重下降！所以，你永遠都唔會知1830前，佢地會俾幾多屎你食。 但1830後，Happy Friday正式開始！ 無論你係長短週，定係好似我咁星期六日放假，通常星期五晚都係約食飯既好日子。而食完飯當然唔少得食埋糖水啦！ 「喂！一陣食糖水囉？」 「好呀！」 糖水舖星期五晚就硬係特別多人！如果得兩三個都易啲等位，多過四個真係分分鐘等返至少半個鐘！就係咁，等位時一路傾，等到位叫完糖水又傾，食完坐係到又傾。傾下傾下大家發現已經十一點幾。一齊行去搭車，你又送我走一段路，我又陪你等下車。結果大家就十二點幾先返到去。 其實食完飯時，大家可能已經攰到癲，但仲會提出或者應承你去食糖水既，絕對唔係只為想食咁簡單。你估星期五happy friday 就唔識攰咩，返左一個星期工，做左成日野，唔攰就假。會去食既人，其實理由好簡單，就係想同你吹多陣水，見下你，輕鬆下。你估佢真係咁大食呀？ 人愈大愈忙。唔講其他野，淨係工作都分分鐘令你連返屋企食晚飯既時間都冇。連見屋企人，食飯既時間都冇，更何況係朋友呢？而家約食飯愈黎愈難，唔係呢個唔得就果個唔得，就算第一次約成功，到左當日就緊係會有一兩個甩底。 各人有各人難處，對於佢地唔得閒出黎或臨時甩底都會失望，但未至於嬲。而對於果啲應約既朋友，會更珍惜相聚既時間。 所以，有時寧願攰住去食糖水，都想繼續同你吹水講八掛。呢樣野，就好似男人對豆腐火腩飯既執著同情懷一樣。 食糖水，就係屬於我地星期五的浪漫。
