日頭返工，夜晚返學，星期一至星期五，日日如是風雨不改。好多朋友都以為我係讀夜校既上班族。但唔講唔知，其實我係一個係日校讀緊碩士既全職學生，而我份工，只係Part-time。 其實朋友會以為我係做緊Full-time一啲都唔出奇，因為我份工實在太太太太太太太太忙啦！一個星期OT4-5日、返學遲到都係濕濕碎，有時仲要帶埋啲野上堂做、放假都要處理公事，仲試過因為OT得太耐而被逼走堂。 你可能會話：係咪你自己做野慢，做唔曬先要OT咋？ 我唔會答你唔係，因為的確係啲野未做曬先要OT。但未做曬絕對唔係因為我做野慢，而係呢個世界上，有一種人，永遠鍾意係你收工前一個鐘打電話黎同你開會，俾野你做，俾屎你食！我將呢啲人統稱為「kai人」(Client)。 呢啲Kai人，好鐘意四五點呢啲位打電話黎同黎傾返半個至一個鐘到啦。你放心一定唔會多，因為佢地都要放工架嗎！就算臨近六點，佢地都唔鐘意第二日先同你講架喎，因為驚唔記得囉！最重要係咩呀，就係佢講完，第二朝份野就係mail box到出現，然後佢就可以開始佢美好既一天！ 我地呢啲做細既，收到電話就要拿拿聲搞掂佢架啦。雖然話我只係Part-time，同埋我一開始已經講明夜晚要返學，其實可以直接走。但偏偏同我一齊跟呢個客既同事都係Part-time，唔係成日返。導致我呢個Full-time工作既Part-time人，好多時都要留底搞掂好先走得。 搞掂完Kai人要既野，你以為就真係搞掂？少年，你太年輕了！呢個時候先係苦難既開始！ 你要陪佢地玩一個叫：你估我唔到 既遊戲。你以為你做足佢今日係電話到講既野，通常第二日，佢要既野就唔同左。okok！我一早估到啦！姐我不是第一天出來混的！成日流流長，同你慢慢改，改到滿意為止！當日收工，你交完份野，自信滿滿咁離開公司。幾日後，kai人打俾你，講完一大輪野，結論係：想要返原本果份...... kai人仲有無數kai事真係手指加腳指都數唔完，件件都令人想反白眼反到上天花板！ 其實，瘋狂開會，啲文件起勢咁改都冇問題，因為呢啲係職責。唔要求啲客會體諒，但至少當返我地係個人。我係幫你做野，唔係做你隻狗，冇可能隨傳隨到。 你返工時我返工，你放工時我都放工，有時自己做唔曬啲野，要留低OT，冇得怨人，係自己問題。但如果係因為Kai人下下都5,6點先打電話黎講要咩，仲堅持第二日朝就要既野，搞到一定要OT，咁真係人都癲。其實講咁多，kai人都係kai人，佢地都係唔會變。最後只可以同自己講一句： 星期一準時返工啦柒頭！
