香港打工仔成日都呻工作壓力大,工作時間長,人工福利假期少。好多香港人都想像到外國打工係幾甘好,幾甘自由,所以一直都好多人去working holiday感受下外國打工究竟係點既一回事。但事實係咪真係想像中甘好呢?只可以話俾你知,現實同理想往往係兩回事! 雖然我從來未去過working holiday,未必可以第一身講到當中既經歷。但身邊有朋友去左working holiday,未去之前期望值好高,滿心歡喜。去到之後,2,3個月就已經頂唔順果種從未係香港試過既打工煎熬,決定唔再繼續,返黎呻到樹葉都落,仲多次強調,從來未試過覺得香港原來係甘好,係身在福中不知福。 老實講,當初我真係唔太感受到去過working holiday既朋友分享係外國打工既感受。當我移民左美國,就深深體會到佢既經歷。不過移民同working holiday既重點分別係,working holiday你可以決定隨時返黎,因為你係有限期居留外國。但移民就唔係一時三刻話返就返,因為你係決定移民果刻,已經做左好多準備係外國長期居留,生活同埋工作,你去到當地,會好努力嘗試溶入當地生活。移民同working holiday心態同埋生活態度係完全唔同。 外國打工係咪真係甘自由?工作時間係咪真係短d?假期係咪真係多d?好老實話你知,唔係你想像得甘好!雖然我係美國打工生活都係做華人公司,相比鬼佬公司所有野係相對地差,但我另一半係專業人士,一直打鬼佬工,但都唔係我地想像中甘好。 香港係受惠於曾經係英國殖民地,所以植入左好多西方既假期,後來又回歸中國,所以有埋中國既假期。係香港返office工,只要係月歷上係紅日,基本上有假放。但係美國,雖然見到好多時月歷有紅色假期,但返office工未必一定有得放,除左係大時大節既紅日有得放,例如好多紀念唔同總統紅日就唔一定有得放,呢d紅日有冇得放都係睇返間公司既決定。大時大節既紅日,通常係1日起,2日止,好少好似香港甘連住有紅色假期。 至於年假,即係我地成日講既大假,香港叫AL (annual leave), 美國叫PTL(paid time leave)。兩地法例規定做滿一年係可以享有,香港一般用日數去講,而美國用星期去講。但美國既大假以星期計,放一星期係指5日,冇錯!真係一星期係指5日!!我到宜家諗黎諗去都係唔明點解一星期係指5日!!!我先生解釋,因為美國法例規定一星期正常工作時數係40個鐘,每日8個鐘,即係返5日工,所以放假一星期都係放5日。香港法例規定做滿一年可享有7日有薪大假,美國就有一星期(即係5日)。唔同既係香港法例規定頭2年最少7日有薪大假,之後每一年遽增1日,直至14日(如果冇記錯既話)。美國法例只規定做滿一年至少有一星期(即係5日)有薪假期,但之後就冇規定有得遽增,決定權完全取決於公司。 去到女士最關注既產假,我相信美國係世界上唯一一個發達國家法例冇規定有產假呢樣野!!真係冇規定有產假呢回事!!女士生完可以享有幾多產假,係咪有薪,完全取決於公司既決定。鬼婆唔興坐月呢家野,所以好多鬼婆真係返工返到生果時先放假,生完唔使一個月就返工。 淨係美國打工仔假期呢樣野,香港已經大比數跑贏左。甘多人話美國係一個自由民主既國家,真係好自由,你睇連假期都自由到任由公司去決定就知啦!但呢個世界好多企業同埋老闆都係無良既,大多數係資本主義家,係甘大自由決定權情況下,又點會唔盡量保護自己利益呢!呢樣野特別係華人公司最明顯,老闆為慳盡每一分一毫,會諗出好多怪招! 有人問我,你既然甘唔仲意移民美國既生活,甘留戀香港,點解又唔回流?如果我另一半係願意同我返香港生活工作,問題早已解決了。。。 Facebook: 移居美國的港女 Instagram: 移居美國的港女