好多香港人成日講想移民，因為香港樓價太貴，生活壓力太大。我係未正式出黎做野之前都有同感，覺得生活係香港好有壓逼感，好想逃避，好響往外國既生活。但其實當時既我係從來未走出過亞洲，淨係透過網絡對歐美有少少認知，當時未有能力去歐美旅行，但內心已經對歐美既國家好仰慕。正式出黎做野之後，每次出走香港，反而令我更加仲意香港。 未真正離開香港係其他地方正式生活過，可能真係未必覺得香港好，香港既人真在太多，地方實在太細，樓價實在太高，各式各樣既野選擇實在太多（除左樓），想搞d小生意既，又真係實在太大競爭，好難生存。就甘睇，香港真係一個唔係好容易生存到既地方。我曾經都真係甘樣認為架，不過，當我真係完全離開香港，黎到美國生活，更加覺得香港先係無限好。 其實美國唔係全部人住既地方都甘大，不過大部分住既地方又真係幾大既，某d華人比較密集既城市，例如三藩市，洛杉磯，紐約呢d比較早期開發既城市，其實住既地方真係唔係甘大，公共交通相對其他城市係好好多。特別三藩市，好多人住既同香港既劏房其實差唔多，但租金比香港貴。可以選擇既係搬去其他屋價較低既城市，屋可以大好多。要搬去屋價較低既城市，第一件事係要學識揸車，因爲通常屋價較平既城市，公共交通都好唔發達下，唔識揸車靠搭公共交通真係幾麻煩。 我本身係路痴，香港公共交通又甘發達，所以我從來冇諗過學車。係香港好多時睇住地圖明明就係附近，但都唔知應該行左定右！！呢點我都真係服左自己！黎到美國之後，因為住既城市公共交通極唔方便，一直又唔想學車，加上冇朋友又未做野，所以大多數時間留係屋企。以前成日想唔使做，到真係唔做野，日日留係屋企無所事事果時，又真係同條鹹魚冇分別，冇曬生活動力，冇曬做人既夢想。 新移民黎講，其實最難應該係搵工，搵唔到工連基本生活都保障唔到。不過話說返轉頭，如果係唔揀工既，又真係唔會搵唔到工既。不過想搵份鬼佬工，新移民黎講真係幾難，白人對其他種族既人真係幾歧視，一聽你開口講英文加上唔係白人既面孔，都真係降曬grade. 好多就算本身係香港做開office，移民之後都係做白人唔想做既工。我去過唐人開既酒樓做part time，搬搬檯檯呢d唔少得，人工仲比一般鬼佬工低好多，如果係香港嘆慣，移民黎到真係唔係一般人甘容易接受既改變。 咪以為走出香港就可以好自由自在，其實係另一個全新既開始，可能係另一個悲劇既開始。 Facebook: 移居美國的港女 Instagram: 移居美國的港女
