2020/09/25 (Fri) 晴老牌40年樓齡大廈，間唔中遇上例行檢查，全日停水又停電，一行三人plan好了長洲一日遊，喺呢個難得出遠行的上班日，流下汗水叉下電。 （長洲東灣 - 海濱長堤上，畫了具長洲創意的璧畫）10點鐘喺中環出發，唔使11點就到達長洲碼頭。雖然係星期五，但落船的時侯，好有星期六日嘅感覺。長洲比我一種熟悉嘅感覺。因為媽媽一家係長洲人，由細住咗喺長洲20幾年，每年清明時候，親戚一大行人都會去拜山，好多地方都有經過睇過，從阿媽口中，都聽過唔少長洲嘅生活點滴。朝早冇乜點食嘢，落咗船太陽啱啱喺頭頂曬住（唔知點解，離島喺熱啲），行去通記大排檔食個茶餐，飲杯冰凍飲品。 （長洲通記 - 碼頭行大約5分鐘左右，隱藏喺幾間粥麵鋪裡面的檔仔）揀咗一張外面嘅枱坐低，有瓦遮頭，有大牛扇吹住，嗌杯凍飲，其實都唔會好熱，當係食下排檔風味。最想試嘅凍榨橙，聽講係將個冰凍嘅橙切開，榨曬入面嘅橙肉做橙汁，媽媽話算係呢檔嘅特色。不過居然賣曬，無辦法啦試唔到。凍檸茶凍奶茶用一隻隻金屬杯裝住，茶味香濃又透心涼。沙嗲牛肉麵都幾大一碗，有別於平時市區茶記食嘅沙嗲牛麵，牛肉厚實，亦都足料比咗好多嚿，沙嗲湯底算香濃，食得出有清香嘅沙嗲味。西多士呢？睇相就知，一塊都好厚好大，仲比足一大抹牛油，三個人share先食得曬！飲飽食飽，埋單約$140，算係好食兼抵食。 （長洲通記沙嗲牛肉麵 - $33） （長洲通記西多士 - $28）之後沿住碼頭，行返去東灣沙灘嘅方向。近年東灣已經面貌全非，除咗農曆幾多月都係咁猛嘅東堤小築，其實東灣都開咗唔少民宿型嘅住宿，有啲仲係主打歐洲風情，房間都幾有特色嘅。行到東灣海灘，海景怡人，仲有一間士多比人坐喺到飲嘢，欣賞風景。可惜沙灘仍然封閉，冇泳客人客嘅海灘，顯得有啲冷清。 （長洲東灣 - 沒有泳客的海灘）沿東灣行到華威酒店，一間老牌子嘅渡假酒店，欣賞一下佢嘅特色大堂，順便借下廁所。行唔到幾步又嗌熱（天氣都真係幾焗），入咗一間甜品店食下嘢，歎下冷氣。抱住好耐冇食過台式仙草&芋泥的心態，叫咗一個椰汁仙草芋泥芋圓試下。仙草芋圓味道和口感都可以，順滑彈牙。但芋泥似乎係放得太耐，有點變酸了，食咗幾淡又怕芋泥太膩，沒有吃下去。另一碗桂花芋圓豆花，桂花糖係甜品店自己釀造，幾有心思和特色，入口亦都唔會太甜，可以品嘗到清香嘅桂花味。眼見水吧都有放一樽樽桂花糖，覺得啱口味，可以買回家品嘗。 （長洲冰室 - 椰汁仙草芋泥芋圓 & 桂花芋圓豆花 約$30）食足一日，路過海味鋪，買咗幾斤俗稱T煲嘅大地魚返去炒菜煮餸。去到另一間甜品鋪，本來想買的桂花糕芒果卷售罊，買咗幾嚿芒果糯米糍上船品嚐，結束一日長洲之旅。
