最近依間酒店推出「重新細味香港情懷」自助晚餐,網站寫有20道香港風味,仲做特價,吸引咗唔少人。雖然網上依間評價向來麻麻,但見生蠔同甜品都可以,叫有野食啦! 可能做特價關係,滿座!但都唔洗排隊攞野食,行咗轉除咗主題食物,其他都基本野,由於好多睇到都唔開胃,所以無圖,腦補啦! 先講依20道香港風味,懷舊茄汁乾煎蝦碌,寫明每位客人免費獲贈一客,但左鄰右舍都係無架!碗仔翅沙律 -素鮑魚雞絲沙律好似見到份,但只見幾條雞絲同素翅係杯仔度,無食既價值;熏蹄海蜇沙律確實見到熏蹄,我全場一條海蜇都見唔到;特色黑松露龍蝦慕絲煎釀三寶,見到一盆開頭以為係伴牒存在既菇;摩登炸油糍-炸羊肚菌辣肉腸茴香餅伴水牛城辣醬,係傳統炸油糍樣,但抱歉,見到個名我唔想食;香港啤酒脆漿炸魚柳伴他他醬,總算望落正正常常,味道都係正常魚柳同沙津醬味;蟹皇素魚翅撈飯,見唔到有人撈飯(傻先撈),就係沙煲碗仔翅;黑魚子焦糖扣流浮山金蠔、避風塘式烤雞翼及雞軟骨,見唔到;瑞士汁雞翼及雞翼尖,見到雞中翼,唔夠味;格仔蠔仔餅,窩夫樣,醎;珍寶珠-炸鵝肝慕絲釀蝦丸,煎鵝肝蓉同現成日式八爪魚丸就有;甜品方面菠蘿油-雲尼拿牛油忌廉泡芙,琳哂;叮叮糖 -抹茶果仁鳥結糖,軟糖就有;香港特色飲品杯子蛋糕 - 利賓納/咸檸七/凍檸茶/鴛鴦,有杯子蛋糕,但望落普通,可能D cream有味?鴛鴦馬卡龍配朱古力慕絲,佢個鴛鴦係指顔色定味道?蛋撻 - 檸檬撻,合桃曲奇,你話我眼花?我真係好多嘢見唔到!鴛鴦雞蛋仔,即係原味同朱古力兩款,真係未見過梗有心機!D雞蛋仔脆過可可脆,食雪糕加依個仲好;奶茶紅豆缽仔糕同菠蘿冰菠蘿啫喱都係杯仔,菠蘿啫喱面頭應該係洒凍,唔攪拌食仲咗。 木槺布甸味道唔錯,但比例做得唔好成口cream;芒果蘇皮蛋糕好脆,脆到硬,焗到深啡色已有少少燶味,cream太實;栗子蛋糕好味!只要食前將上面琳哂既啡色物移走;3.6燉奶好香,夠滑;梳乎厘雖然係即制,但太甜同D糖質素太差。 湯有三款,忌廉湯就唔講,依個蜜瓜?老雞湯好清甜,完全無雞油味,反而主打既川貝海底椰燉鱷魚肉,木瓜無去哂皮,好硬,鱷魚肉好少,無味,紅棗太多,飮落得紅棗味。 中場有個火燒雪糕蛋糕表演,雖然個廚話係芝士雪糕蛋糕,但食落得朱古力味,燒過既焦糖都唔覺,但主要都係為睇火。 其他有最受歡迎既生蠔,三種都係細蠔款,唔食蠔嚟真係維唔到本,基本凍蟹腳、蝦、青口,刺身都有,仲有芝士、咖哩、燒豬仔、羊架、瓜(凍+油)、片皮鴨、pizza⋯雪糕都有多款,只係個廚真係要檢討吓。 九龍酒店倚窗閣 尖沙咀彌敦道19-21號九龍酒店2樓 http://www.harbour-plaza.com/kowloon/SpecialOffer-KLNH_EatLikeALocal-tc.htm http://facebook.com/kowloonhotel 多謝你睇到依到! 仲有火燒雪糕蛋糕既過程,同香港地道大排檔和冰室的微型版相,想繼續關注我,可以用以下方法: Facebook Instagram 全民K歌 BE Blog U Blog 歡迎聯絡合作 E-mail: mink_wong@hotmail.com