睇片︰ https://youtu.be/dWZ1xz5EXuw Day 5行程︰ Siam Big C →芭提雅 → 民宿 Big C掃手信 呢一日朝早起身食完早餐執完嘢之後就去咗Big C狂掃手信！我哋兩個深信食物係最好嘅手信，收到嗰個至少有得食，好過買埋啲無謂鎖匙扣呀擺設呀擺喺度托。由於我太遲先寫呢個遊記，亦都冇「砌戰利品砌到靚一靚影相留念」嘅習慣，我買咗啲咩只好口述，try my breast啦︰ 香蕉朱古力Pocky百力滋 曲奇朱古力Pocky百力滋 冬蔭功味Pretz百力滋 魷魚 小老闆紫菜 MAMA 即食麵 即沖泰式奶茶 大約係咁多啦，每一樣都係大量咁掃，返到香港可以慢慢分。 買完一大輪有啲肚餓，我哋就過咗去伊勢丹出面嘅小食市集買咗2個芒果糯米飯食。自從喺做spa嗰度食咗第一個芒果糯米飯之後，我哋每一日都要食一個，實在太好味。 旅行總有事要發生之小插曲 之後我哋就一揪二掕咁走番去酒店。呢個時候就發生咗一段小插曲喇︰ 話說我哋一早喺香港已經喺網上搵定曼谷去芭提雅嘅旅遊巴，呢個旅遊巴service好好嘅，可以安排專程嚟到酒店門口接我哋上車，之後佢會兜埋其他乘客先去芭提雅。咁我睇張voucher見到架車點半先depart，就大模斯樣咁慢慢返酒店。點知返到去攞張voucher一睇，咦！咩pick-up time呀！Shit! 原來佢話12點半會嚟pick-up我哋！發現嗰陣已經一點四，係冒哂冷汗之際，有個經理走埋嚟話頭先有人嚟搵我哋，原來我哋已經錯過架旅遊巴！佢話架巴士會喺機場接埋其他客先離開曼谷，咁我哋諗住即刻飛去機場catch番架巴士。點知經理話酒店去機場至少半個鐘，我哋去得機場嚟架巴士都走咗。好在個經理好好人冇講低哂佢要講嘅嘢就走，提議我哋搭的士去芭提雅instead。我哋一聽到心諗唔係話搭的士咁富貴？原來由W Hotel搭去芭提雅到我哋民宿嗰個位要1200B，即係大約300港紙。其實本應可以坐公車去嘅，但係都係嗰句啦，我哋兩個稱多兩稱舊行李都已經嗌救命，同埋坐公車去到都已經日落。最後我哋死死地氣執哂啲手信落個喼度，酒店經理幫我哋截咗架的士，同佢溝通，make sure佢知要送我哋去邊。喺呢度我真係要send out my greatest gratitude to him，因為佢特登留低的士司機號碼嚟打俾佢，之後仲打嚟問我哋有冇安全到埗。可惜我張電話卡又唔知點解通唔到話，佢仲send message過嚟問。佢哋嘅service絕對會令你有賓至如歸嘅感覺，that’s why我返到香港即刻寫review大讚W Hotel，因為佢哋真心helpful。 出發到芭提雅! 如是者我哋就上咗的士，出發去芭提雅喇。初頭我哋仲有啲唔開心，嘥咗程車不得止，仲要比多幾舊水搭程的士。我更加嬲自己，因為我平時唔係啲咁唔小心嘅人嚟架嘛 D: 不過我哋兩個港女諗諗下覺得搭的士去芭提雅真係好鬼富貴又舒服，跟住又開心番又繼續自拍喇。 Jaw-dropping 靚景民宿 芭提雅同曼谷嘅距離就好似香港同深圳咁，唔遠又唔近，要行一段公路先到。搭咗大約2個鐘車，經過的士司機一番搵路，我哋到咗airbnb book嘅民宿。 一去到，只係得閘口嘅security同租/售樓處嘅工作人員。我哋稱住行李，搵唔到一個proper check-in位。之後security走埋嚟，我哋先知原來得佢幫我哋check-in。其實都幾慘，又要做保安，又要交收鎖匙。不過其實都係要我哋簽個名，就俾得條鎖匙我哋。之後就有個男人上咗嚟幫我哋拎啲行李去個apartment度。沿途行已經見到相連apartment嘅泳池，個下巴已經跌咗一半，之後一開門，見到出面個泳池 真 係 好 靚！個apartment大約千幾呎，一入門口左邊就係浴室，再入啲就有套影音組合，對住張床。張床前面有兩張安樂椅。再行入啲就係開放式廚房，有微波爐、煮食爐、食具嗰啲都齊全。對住廚房就係有個小茶几同梳化。單位有落地大玻璃門，開門出去有張吊椅，餐枱同櫈，同埋主角︰泳池！嗰陣喺airbnb睇個host嘅description係 “Few steps to the pool”，原來真係冇講錯！ 仲有浴室並唔係一般嘅浴室，有按摩池，而且廁所可以趟開塊境，可以由客廳望番出去泳池個景。我哋兩個一邊睇已經雀躍到不行。仲要客廳有個projector，如果有咁嘅興致，個apartment可以化身小型戲院。 我哋發完一輪癲之後，就梗係即刻換bikini換衫影靚相啦。個泳池好大好靚，浸喺入面好relaxing。 無邊際泳池 Infinity pool 正當我哋游游下水覺得好正好抵嘅時候，見到我哋遺忘咗嘅另一大sellpoint︰infinity pool無邊際泳池！佢唔係同我哋個泳池相連嘅，所以我哋即刻跳出嚟跑去嗰個無邊際泳池。 點擊圖片放大 呢個無邊際泳池絕對唔簡單，因為一望出去就係海洋，係一望無際嘅海洋。我哋行過去嘅時候仲未日落，海天一色，睇到簡直係心曠神怡。泳池入面有枱同bar櫈，可以帶杯野飲望住個海享受人生。前面張枱有啲外國人坐咗喺度chill，之後傾計發現佢哋係New Zealand嚟嘅。我哋兩個就坐咗喺度一路望住個日頭慢慢沉落海平線以下，個天染成橙黃色，煞為好看。唯一美中不足就係冇杯酒嚟chill下，如果唔係真係perfect。 Jacuzzi按摩池 喺泳池浸完都仲未夠喉，我哋將個浴室入面嘅按摩池注滿，落咗啲喺香港買嘅浴鹽，香噴噴woohooo咁就舒舒服服去訓教，準備第二朝早起去珊瑚鳥。
