睇片︰ https://youtu.be/dWZ1xz5EXuw Day 4行程︰ Wet Pool (酒店泳池) → Terminal 21商場 → Let’s Relax Spa → Asiatique the Waterfront 夜市 呢一日係我期待已久嘅一日，因為我終於可以試我生平第一次嘅Spa！而且夜晚終於可以去夜市，所以呢一日雖然係攰啲，但十分enjoyable。 Wet Pool @W Hotel 我哋其中一個目標嘅就係要用盡酒店嘅設施，所以決定呢一日去泳池游個早水，順便做港女指定動作影相。相信酒店嘅泳池唔算係佢賣點之一，因為比較細，但潛入水會聽到音樂，好似係幾正嘅。順帶一提，套bikini就係喺Siam買架喇(不過唔記得exactly邊度)。曼谷周圍都有好多好靚嘅bikini，唔想咁少布都有好多靚嘅連身泳衣，可以嘅話其實唔洗帶去，去到曼谷先買都未遲，價錢仲要唔貴。 環遊世界 @Terminal 21 Mall 點擊圖片放大 +2 曬完一大輪熱辣辣頂唔順嘅我哋就返上房換衫出發去Terminal 21商場喇。都係搭番BTS去，一出站就連住商場入口，好方便。有做過功課嘅都知道T21個設計係世界各地，每一層都有唔同國家嘅主題，例如Istanbul、日本、英國、美國等等。不過去到見到都係指住哈哈咁就算，其實都唔係話好amazed嘅，影番幾幅相就算。 我哋求其揀咗一間餐廳食午餐，不過質素好普通。鬼叫我哋以貌取人，見到個裝修靚就中咗入去。#港女 之後我哋唔夠喉，去咗隔離food court食咗個甜品。都係冇乜特別，就係一堆甜耶耶嘅糖漿同糯米製成品撻喺堆冰上面。 係喇，如是者都仲係未夠喉喎，就落咗去食咗件泰式奶茶千層蛋糕 (Crepe Cake)。唔，雖然賣相真係好吸引，但其實食落去無論味道、口感都係強差人意。睇嚟呢一日冇乜揀好味食物嘅緣份。 第一次做spa @Let's Relax 等到5點可以上去Let’s Relax spa time！我哋兩個都係第一次做spa，所以揀咗最普通嘅2小時Thai Massage。喺reception等佢安排嘅時候有一杯(我估係)班蘭葉凍茶俾你飲。 之後佢就帶咗我哋入去洗腳換鞋嘅地方。初頭我哋兩個坐咗喺度唔識郁，係之後按摩姐姐叫我哋除鞋先知道發生咩事。 洗完腳換咗拖鞋之後我哋就被帶入去一間房，換衫準備按摩。間房成個tone都好relaxing。換好衫之後就開始按摩喇！個人第一次按摩感覺好似平時推拿咁，按下你啲穴位呀、鬆下筋咁。 完咗個按摩，換番對鞋就有呢兩碟靚靚芒果糯米飯等緊我哋。芒果糯米飯真係好味到我哋食唔停口。第一次按完之後啲淋巴好似通咗啲，但唔係話有渙然一新嘅特別感覺，而且都知道咗自己原來唔係一個鐘意按摩呢家嘢嘅人哈哈。 碼頭夜市 Asiatique the Waterfront 做完spa之後我哋就出發去Asiatique the Waterfront碼頭夜市。首先要搭BTS去Saphan Taksin 站，嗰度會有免費嘅小輪載遊客去夜市。我哋等船等咗差唔多廿分鐘，船程大約十分鐘。 一到埗，第一眼見到嘅就係有好多Pub & Restaurant，有好多人招徠緊客人。由於我哋嗰晚已經決定咗要食Yum Saap，所以冇入到去。沿途有好多小店，賣嘅嘢乜都有，皮製品、小盆栽、番鹼、手作、衫褲鞋襪、A貨等等琳瑯滿目。行到去另一面入口有人妖show，泰拳等等節目可以買飛入場。不過我哋都係冇興趣，所以都係周圍行下，就去咗Yum Saap食嘢嚕。 Yum Saap俾我嘅感覺就好似香港嘅譚仔，不過佢menu就唔係賣米線，係賣各式各樣嘅泡麵同埋其他小食，價錢都係平民化。我哋一人嗌咗一個麵，另外叫咗一個菜。不過感覺就似自己喺屋企都淥到嘅麵咁，所以到最後一日我係自己喺超市買咗類似嘅麵返屋企整嚟食，味道一樣。當係體驗一下當地嘅平民連鎖食肆。 Fish spa! 食飽之後我哋就去做碼頭夜市重頭戲︰Fish spa！雖然有好多人覺得浸對腳落去比啲魚食死皮好噁心，但我哋本住人一世物一世點都要試下嘅心，走咗去試下呢種另類spa。我哋揀咗做15分鐘，每人150B。一開始浸對腳落去真係痕到媽媽叫，但之後慣咗又覺得幾得意。不過效果就未係咁明顯喇，對腳唔見得滑咗幾多，可能太厚喇會食滯啲魚 #ewww
