睇片︰ https://youtu.be/dWZ1xz5EXuw 第二日行程︰ Siam Big C超級市場 → Central World 商場 → Nara Thai 午餐 → Centara Grand Hotel RedSky Bar → Platinum Fashion Mall 水門市場 第二日主要都係喺Siam區度過，其實曼谷都有一個好似香港咁嘅油尖旺區，喺BTS線上睇就係呢幾個站︰Siam, Chit Lom, Phloen Chit。參見下圖(圖片來源︰bts.co.th) 佢哋幾乎係由幾個大商場同百貨公司連為一體，而且有好多景點都係喺呢幾個站。喺呢度，可以去最大間Big C (佢哋嘅超級市場)，四面佛，同埋Super Rich換錢。 7-11窩心早餐 喺出發去Siam之前，我哋先食咗我哋每日最重要嘅一餐 – 早餐。我哋兩個都係好鐘意食早餐嘅人，所以冇一日係冇食早餐嘅。我哋喺曼谷冇喺酒店食buffet早餐，因為我個人覺得食啲local啲嘅早餐可以體驗更多。不過我哋又未至於捐窿捐罅搵嘢食，只係落咗樓下7-11睇下有咩食。 最後我哋一人一個飛碟—佢呢啲飛碟本身係擺喺雪櫃嘅，但你俾錢嘅時候staff會問你要唔要加熱，要嘅話佢哋會幫你將佢擺入飛碟機度再烘番熱佢！雖然唔係話超級好食，但都好滿足。再喺佢度買杯朱古力就有個good morning喇。不過可能氣候都係熱，泰國真係唔興飲熱嘢，喺menu度好難先搵到熱飲，而我喺7-11嗌熱飲嘅時候都好似受到當地人側目咁，哈哈。 First BTS Ride 食完早餐，我哋就沿住天橋行去BTS站。W Hotel另一個優勝之處就係佢同BTS Chong Nonsi站只係3分鐘嘅路程，仲要沿途都係天橋同埋扶手電梯，落雨不怕落雪也不怕。順帶一提，佢哋嘅BTS站都有好多商店，食嘅又有、飲嘅都有。我哋一人買咗一張Rabbit card,用法同香港嘅八達通一樣，不過佢只係適用於BTS嘅閘口，另外一間鐵路公司MRT唔用得，平時買嘢佢都係唔用得，廣泛性都係唔及八達通喺香港咁。電子貨幣喺曼谷始終未普及。 到達Siam區 曼谷嘅BTS系統其實同普通鐵路冇乜大分別，喺香港搭得掂地鐵嘅話，喺曼谷一定唔會有咩大問題。我哋喺Phloen Chit站落咗車，就沿路行，一路都會有路牌指示。我哋第一個目的地係Super Rich，因為我哋喺香港只係換咗小小泰銖。點行去唔多講喇，除咗爬文之外，其實去到呢個旅客區，求其問個當哋人或者警察，佢哋都會解答到你。換完錢之後我哋就去咗Big C打個轉，順便喺久違嘅Auntie Anne’s度買個Pretzel食(點解香港嗰啲執哂架)。之後就過咗對面嘅伊勢丹、Central World行下、買下嘢。戰利品係一堆超平嘅Naraya袋之外，其實都冇乜嘢好特別好想買。 值得一試Nara Thai Cuisine 行到肚餓嘅時候我哋已經行到去Central World嗰邊喇，亦都係我哋plan咗食午餐嘅目的地，就係Nara Thai Cuisine。其實如果問我係咪特別指明去呢間食泰菜，我會答唔洗，因為其實Central World成層都係啲好正嘅餐廳。只不過，我睇人哋啲blog講到佢點好點好，所以先盲目跟咗去試。下一次旅行會試下唔做research情況之下搵餐廳，其實會有樂趣好多。不過公平啲講句，Nara Thai係好食嘅。我哋嗌咗個香葉燒雞、冬蔭功湯、Pad Thai同泰式奶茶。香葉燒雞真係好香泰式香料味，雞都炸得好脆。冬蔭功湯酸酸辣辣，唔知點解就係好味過平時喺九龍城食嗰啲。而Pad Thai我哋都心心眼咗好耐，真係好惹味。我覺得個重點應該係佢哋用嘅醬汁，甜甜哋再加埋花生碎真係食唔停口。而呢一餐就係令到我同泰式奶茶墜下愛河嘅一餐。我好好甜，而泰式奶茶比港式奶茶更加甜更加重奶味，所以之後我買咗好多包即沖嘅奶茶番香港飲，一日一杯。呢一餐係目前為止最泰式嘅一餐，食到好滿足。不過呢餐反而貴啲，人均消費差少少就港幣100蚊。但值嘅，喺九龍城食幾多餐都比唔上呢餐。 Nara Thai Cuisine http://www.naracuisine.com/ 人均消費︰約港幣100元 初嘗花瓣雪糕 食完午餐之後又繼續行商場。曼谷啲商場有一樣嘢值得欣賞嘅就係商店設計同埋櫥窗都好特別同引人注目。之後我哋見到一間花瓣雪糕店，雖然香港都有但呢度平好多，都係大約港幣廿蚊杯。呢啲咁嘅gimmick又影得相嘅嘢港女又點可以錯過呢。結果就買咗一杯，揀咗最靚嘅兩隻色，係呀，係色唔係味。然後就係兩個人揸住杯雪糕影一大餐，唔到佢溶都唔擺入口，仲要一路食一路拍片喇哈哈。#名副其實的港女 價錢平環境正空中酒吧 RedSky Bar 我哋行到五點幾就開始上去Centara Grand Hotel，佢係同Central World相連嘅。都係嗰句啦，其實嗰度沿途都會有路牌有Security，唔識路其實好易問到路。 上咗無數電梯同樓梯之後，我哋終於上到去RedSky Bar喇！由於我哋喺人哋一開門就上去，啲waiters仲係好得閒，所以我哋好似受到貴賓嘅待遇咁(請睇片)。一出電梯就會見到佢哋有個全透明嘅玻璃酒窖，聽講要攞酒嘅話啲工作人員會吊wire好似特技咁攞。不過我無幸見證，暫且聽住先啦。我哋happy hour時段到達，所以Cocktails有買一送一，但每人都至少要嗌一杯，所以total係2個人4杯酒，飲到肚都漲。不過啲景咁靚個feel咁chill，慢慢嘆都唔錯呀。我哋兩個就係喺度影下相，飲下嘢，發下呆，望住日落咁就hea咗2個鐘(佢哋張櫈好舒服)。呢個地方好chill，無論friend定couple嚟，個環境都好唔錯。我哋走嗰陣見到其他人嚟晚餐，望落都唔錯。 RedSky Bar at Centara Grand Hotel http://www.centarahotelsresorts.com/redsky/ 人均消費︰約港幣50元 (於happy hour時段內享用飲品) 水門市場摸門釘 之後我哋行咗去Platinum Fashion Mall, a.k.a.水門市場。點知原來佢開到6點幾就會閂門，我哋去到幾乎所有舖都已經閂哂，唯有返去酒店。大家如果想去就記得查清楚先去喇！ Platinum Fashion Mall http://www.platinumfashionmall.com/ 記得留意開放時間！
