睇片︰ https://youtu.be/dWZ1xz5EXuw 前傳 因為我個人太懶，喺泰國返咗嚟香港成個幾月先肯的起心肝寫遊記。同BFF 想一齊出國去旅行好耐，大家都係想去啲陽光與海灘嘅地方，因為想趁後生仲有本錢影相(嘻嘻)。我哋兩個都未去過泰國，再加上喺instagram成日都見到啲人去泰國有好多靚景靚野影，咁我哋呢兩個港女梗係心心眼啦。咁啱airasiago.com 又做緊promotion (利申︰冇收錢賣廣告)，有機票酒店package做緊特價，比我見到曼谷W Hotel四晚酒店連機票都只係三千幾蚊！由於見到呢個價錢竟然住到呢個級數嘅酒店太興奮，我哋好快扑咗鎚決定去曼谷。 喺你想講「下你哋唔係仲有去埋芭提雅咩」之前，其實我哋本身係真係冇諗過去芭提雅嘅。但係喺我為曼谷之旅做research之際，發覺原來芭提雅同曼谷係好近(原諒我對世界地理真係半桶水，成日睇地圖睇到O哂)！咁我就開始探索一下去埋芭提雅嘅可能性喇。首先，曼谷去芭提雅嘅車程都只係大約2個鐘，仲要比我搵搵下，喺airbnb.com搵到啲好正嘅民宿，同埋喺agoda.com搵到好正嘅酒店，而佢哋嘅共通點係︰有infinity pool! 我哋兩個見到啲咁啱影相咁chill嘅嘢已經太亢奮，所以加咗三百幾蚊，將機票回程日期改後2日。就係咁，我哋嘅旅程由曼谷5日4夜變咗做曼谷4晚，芭提雅2晚，total 7日嘅泰國chill chill之旅喇。 洗費 咁相信睇到呢到你哋會好curious究竟呢個trip我哋洗咗幾多錢呢？答案就係(機票、住宿、當地交通、當地購物、用餐、購物)每人九千幾蚊。哇成萬銀喎，好似好貴咁。利申，你睇埋我哋呢7日點嘆法，就會覺得呢九千幾蚊都係抵嘅。我唔係話九千幾蚊係一個細數目，而且我所有旅費都係返工、補習，辛辛苦苦自己一手一腳儲返嚟嘅。但係我覺得今次係值嘅，因為我哋係真心enjoy每一個目的地，反而買野買得比較少，將啲錢都擺咗喺享受嗰方面。旅行的意義個個人都唔同，呢個泰國trip我絕對唔會話係窮遊，我只可以話係抵，因為以我哋去嘅地方嘅質素、景觀、享受，呢個價錢喺香港或者其他熱帶地方都比較難搵到同等嘅(可能有，恕我見識淺薄敬請多多指教)。如果想知道每一方面洗咗幾多夾埋九千，可以睇以下呢個表格︰ 曼谷W Hotel 4晚住宿、機票、稅項 airasiago.com 約 3700港元、每人 更改機票回程日期、預早揀位 airasia.com 約 300港元、每人 芭提雅住宿︰民宿1晚 airbnb.com 約 400 港元、每人 芭提雅住宿︰Royal Cliff Beach Hotel 1晚 agoda.com 約 400 港元、每人 來回曼谷、芭提雅旅遊巴 Bell Travel Service 約180港元、每人 旅遊保險 MSIG 三井住友 130港元、每人 芭提雅當地一日遊 hopetrip.com 365港元、每人 餐飲、當地交通 (公數) 2000港元、每人 購物 約1600 港元、每人 總計 約9075港元、每人 備註︰匯率價格有波動，我去嗰陣係2015年6月，大部分嘅payment都係4-5月做，嗰陣係泰銖除4咁計，所以我全部寫約數。 講到錢嗰方面，其中一欄係公數，係我哋兩個沿用咗好耐嘅system。就係每人都攞一個數目出嚟，擺喺一個銀包度，旅程中飲飲食食、交通又或者大家一齊享用嘅嘢，都會喺嗰度拎錢，省卻咗邊個俾住先、除一半、數目散亂嘅情況。不過當然，呢個system嘅前提係要參與嘅人食嘢嘅份量或者口味差唔多，又或者冇所謂，先至可行。所以大家可以衡量一下再用呢個方法。我哋用呢個方法用得好happy，一嚟我哋兩個嘅口味、喜好相似，而且同遊嘅佢都係一個冇所謂好carefree嘅人 (muah)。Bonus就係佢數口精，成個trip就係佢負責計數，我負責keep住啲錢(因為佢成日都好易唔見嘢)。(Shout out to my BFF!)
