煮野食其實好好玩..將自己認為有可能既野撈埋一齊..然後成功既感覺真係幾好..哈..老公唔太鍾意食有骨既野..我自己鍾意食脆卜卜..所以就出現左今次既..扮咕嚕肉^o^..我自己幫佢改名叫做'咕嚕呃鬼'^^其實係油炸鬼釀墨魚滑黎架..老公話驟眼睇都呃得下人^^超開心自己成功混醬..老公仲話成件事令佢好有驚喜..估我唔到會咁整..而且仲好好味^o^(其實我有做定失敗準備..買定包現成醬架..萬一'咕嚕汁'混唔成功都有後著嘛..) 咕嚕呃鬼^^(油炸鬼釀墨魚滑) 材料：油炸鬼(油條)一條墨魚滑二十蚊(佢賣三十六蚊磅..自己計即係幾多啦^^)青椒一個洋蔥半個菠蘿兩片蒜頭適量 墨魚滑調味 ：胡椒粉適量粟粉適量 調味材料：山楂餅兩筒白醋一湯匙茄汁兩湯匙糖兩茶匙鹽半茶匙菠蘿汁一湯匙水半湯匙雞汁少許 1. 山楂餅壓到碎粉狀，將所有調味材料攪勻，一定要試味，因白醋過多會“乸“喉，若有“乸“喉感覺可逐少逐少加糖去趕走“乸“喉感覺，所以一定要試味，太甜可落返啲鹽，雞汁唔一定要落，但我覺得落左會易啲調好個汁(新手太太始終要找幫手^^)醬汁調好放一旁備用 2. 少許胡椒粉和粟粉混入墨魚滑內撈勻 3. 油炸鬼分開兩條，每條用較剪剪開幾段(size大細自己話事) 4. 鋪好焗爐紙，預熱焗爐，180度，5-10分鐘 5. 將墨魚滑釀入油炸鬼中，若覺得油炸鬼中間阻住你釀，可用筷子整開中間，總之每件油炸鬼都一定能輕易釀入墨魚滑的 6. 將釀好嘅墨魚滑放入已完成預熱嘅焗爐，墨魚滑面向上，若油炸鬼頭尾部份企唔穩就打橫放，要確保粒与粒之間有空位，讓熱力可接觸到墨魚滑，180度，焗20分鐘，唔好大安旨意，要耐不耐睇睇焗爐，始終每個爐溫唔一定一樣，要自己隨機應變 7. 趁油炸鬼焗緊時，將青椒，洋蔥，菠蘿切到差不多大小，另蒜頭切碎 8. 落油爆香蒜蓉，然後落青椒洋蔥菠蘿一齊炒香，倒一半份量“咕嚕汁“再炒，將油炸鬼落鑊，最後將剩餘嘅“咕嚕汁“加入，令所有材料都沾上醬汁即可上碟(要快手令所有材料都沾上汁，因在鑊炒太耐會怕油炸鬼俾醬汁撈太耐而“淋“返，咁就唔脆㗎喇) 新手太太小提示：1. 記得混醬一定要邊混邊試味，每人口味不同，無話邊隻味係最好的，只要混到最fit你同要吃嘅人，就已經係最適合嘅醬(如懶的話，其實買現成李錦記一包包嘅生炒排骨醬都得，不過我覺得自己混醬成功感會大啲^^) 2. 如無焗爐，用光波爐都得，不過我唔知應用幾多度？因我無用開，總之目的係焗脆油炸鬼同時焗熟墨魚滑，焗20分鐘後，唔好即刻揭開焗爐門，讓餘溫再收乾油炸 鬼嘅油份，令佢更香脆，我自己約3分鐘後先拎佢地出嚟，再落鑊，出爐時好似有啲硬咁，但拌汁再炒後就岩岩好，全程食都keep住，有啲脆又完全不硬狀態~ 我 唔想用油炸，一來會用好多油，感覺好浪費，二來油炸鬼已經油喇，再用油炸而我又無大師級咁叻，識邊炸邊迫返啲油出嚟，太冒險喇，用焗爐唔使加油，仲可以焗 埋啲油出嚟，我覺得適合我多啲(當焗完再睇到焗爐紙上嘅油，你就會完全明白點解唔好炸，原來油炸鬼本身真係超多油㗎>~<) 唔好意思..係長氣左少少..因為我真係覺得有好多小細節要留意..所以就寫埋出黎囉..我只係一個新手煮食太太..好奇貪玩又鍾意攪攪陣..諗到又試下煮..其實每次都唔知係咪一定行得通架..都試過行唔通>~<所以我呢d唔可以話係'食譜'(呢兩個字太專業喇..)純粹自己煮完好似ok喎..就同大家分享研究下啦^o^呢味餸始終第一次煮..心情的確係緊張..掛住煮都影唔到相了..請原諒只得幾張相..我會訓練下自己邊煮邊影既特技架喇..哈~ 睇完有疑問既話..歡迎留言問我..祝大家都成功呀~~~
