更新箍牙狀況...... 其實箍牙時間會過得好快,轉下眼又調整左兩次啦。宜家進度良好,下排牙已經齊曬, 而且個牙縫都收得七七八八, 下排只得翻少量需要微調。個人認為箍牙真係無咩痛楚, 只係麻煩。因為有mor牙既人都會明白當牙縫未收曬之前, 每次食完野都好麻煩, 所以一定要隨身帶備牙縫刷, 都要小心注重牙齒衛生。 由於正面相已經睇唔到太大變化, 側面相就會明顯好多。一開始d牙比較哨(上), 第二張相明顯下排牙收曬入去(中), 第三張連上排都唔哨出黎啦(下)。 話說梁醫生次次都會屈唔同形狀既鐵線放落去, 我d朋友箍牙都唔見有喎, 所以又多口問佢。原來唔係個個牙醫都識屈鐵線, 但有矯齒知識既牙醫都要識既, 唔同形狀既鐵線都可以精準咁達到醫生想要既效果。好似呢次個鐵線係為左令我前排牙向上拉少少, 因為太長會頂住下排而無位再收入去, 而一個月後個排牙又真係向上收左d。呢條小小既鐵線作用好大, 一個識屈鐵線既牙醫, 絕對會令你箍牙過程快靚正好多。一味用橡筋死拉爛拉, 係又慢又唔work嫁。 希望各位朋友仔都搵到專業可靠既醫生啦! 如果想知我一開始點選擇牙醫同最初既牙齒狀況, 可以睇翻我上一篇「箍牙記」, 想知道醫生資料我都可以email比大家, 但絕不公開啦, 只係想做個人分享, 都無同醫生講過要出文章。感謝最近有留言同email我既sis, 希望幫到大家!
