“工作”係人生嘅一大部分,亦都佔人生大部分嘅時間。 喺香港呢個“有返工無放工”嘅社會,大多數人在公司嘅時間(或者正確D講,應該係工作嘅時間,無論你個人物理上身在何處)比在家嘅時間最少起碼多三分之一…所以喺職場上見到嘅人同事都比其他地方見到嘅多…無論係量同種類,都豐富到不得了…在此就講吓小G嘅少少見聞吧! 小G曾經係某些“名牌”公司嘅小職員。所謂嘅“名牌”公司,其實就係間賣D人人都聽過佢公司個“名”或者人人都見過佢嘅“牌子”嘅產品嘅公司,而通常呢D公司賣嘅嘢,都係D貴到飛起但人人都想擁有嘅奢侈品…而小G有段時間就係喺呢種環境裡面工作。 好多人聽到你喺名牌公司返工都會話 -“正呀,買名牌有員工折扣,成日有得平買貴嘢,筍工呀,去邊度搵呀!” 但事實並非如此,喺呢種公司做嘢實在係一份“表面風光、內裏陰乾”嘅工作! 辛苦到不得了!! 點解咁講?通常呢D公司嘅人工低、要求高、工作量大。因為佢地出名,喺呢D公司工作過一段時間Resume會好睇,所以好多人,尤其係無咩經驗嘅年輕人,都會爭住入呢D公司工作。因為人力資源長搵長有,所以人工低得可憐,公司除咗醫療福利唔錯外,其實並不點樣珍惜員工。 而當你入到呢D公司工作時,你嘅惡夢就開始了。兩三個人做嘅嘢你一個人做哂係日日都發生嘅平常事,日日勁多嘢做OT到三更半夜無補鐘補水,上司仲會不時話你工作出錯、成日OT效率低甚至唔識分配時間等…呢D都唔係什麼特別難頂嘅事。最經典嘅係當你習慣咗呢種日日做到隻狗咁嘅奴隸式工作模式嘅時候,下列情況就會發生:- 如果你工作嘅公司係賣時裝的,你嘅上司會話:“點解唔見你着公司嘅衫嘅,公司嘅衫唔靚咩?” / “你着呢着去都係嗰幾件衫嘅,公司俾你人工好低嗎?唔夠你買新衫嗎?” 你唔算點熟嘅親戚同只知道名字嘅“朋友”亦會時不時問你:“哎呀,你喺XX公司做呀!有幾折呀?我好想買嗰件衫,可唔可以幫我買呀?我俾返錢你吖,唔該哂。” 面對上述情況,通常你臉上仍然要保持微笑去回答,但內心已萬馬奔騰:- (老細呀,公司嘅衫係好靚,個價錢仲靚呀!!!我唔係唔想買,而係買唔起!!!折咗都要我幾個月人工呀!!!我唔使食、唔使搭車、唔使住咩!!! /老細呀,我已經節衣縮食先至喺公司內部大減價搶到幾件!!!你仲想點?!公司係人工係好低,我做其他行業嘅同期同學搵到嘅係我嘅幾倍!!!話你知真話的話,公司會加我人工嗎?!) (我唔係代購囉,代購都收你佣啦!你一句唔該大哂咩!!!我自己都未有錢買,你既然有錢買就去買正價啦!!!不過話時話,你係邊位呀,我有你呢個朋友嗎?!我好似同你講過嘅嘢都唔夠十句!!!) 喺上述各種情況內外夾擊下,不論身體、心理、精神、荷包同人際網絡都會被入侵,變得身心俱疲,久而久之,你就會變成一個名乎其實嘅“名牌 奴隸”了。所以勸誡各位年輕人,求職需謹慎,入行要小心。