2011 - 11 - 20 從來都唔行山的小妹，係好友的一句：去唔去行山呀？就應承咗啦﹗原本諗住有三個人，九點半入到西貢市中心，點解得小胖胖一條友？原來人地男朋友放飛機﹗唔緊要，兩個傻婆都可以行，一樣得啫﹗ 小妹不嬲都唔食早餐架嘛，小胖胖驚我暈低，所以等緊架中巴之際就拿拿聲去 m記買個早餐先﹗巴士站個牌寫住半個鐘先一班車，不過現場起碼有成4﹑50人喎，咪有排等？仲要係得24座﹗好彩架巴士公司都識做，見現場環境擠湧，就派個阿叔黎到現場打點，唔夠五分鐘就有兩架中巴駛到黎﹗Good﹗ 上車之後一直搭到 "西灣亭" 總站，一落車就己經有好多人啦﹗雖然已經十一月，不過就仲係好熱，今日仲咁好天添﹗大家都出黎郊遊下﹗ 跟住指示牌行入去就係西灣啦﹗ 入到吹風坳，就轉左去浪茄方向﹗正式進入麥理浩徑，沿途就會見到好多"標距柱"。麥理浩徑全長100公里﹗每500米就有一個標距柱，我地宜家行緊的係第二段的其中一部份，今日的行程係向後行，終點係麥理浩夫人渡假村， M 001 ﹗淨係呢段都已經有15公里啦﹗最搞笑係二人裝備極之嚇人：一個著牛仔褲，一個著白飯魚﹗不過兩個傻婆一於無懼艱辛，心口一個勇字，行~~~~~﹗ 沿路不斷見到好多大大件的牛屎，點解 D牛咁叻識行山？ 小妹將地下的落花放在屎上，名副其實：一朵鮮花插在牛糞上﹗唉﹗果然係令人沮喪的組合﹗ 登高望遠，香港真係好靚呀﹗蓬萊仙境﹗ 行上西灣山的路真的很惡劣，只有一堆堆亂石砌成，雖然小妹著住對疑似"白飯魚"真係唔多掂，不過勝在夠輕盈哦﹗一樣健步如飛﹗ 係西灣山的一角向遠方眺望，就可以見到：西灣﹑鹹田灣﹑大灣﹑東灣﹑大浪灣﹗ 其中中間尖起的一座山就係令人聞風喪膽的：蚺蛇尖﹗ 聽完小胖胖介紹蚺蛇尖的過人之處，小妹都好想去挑戰呀﹗不過咁危險的任務都係無人會陪我癲﹗ 爬過314M 高的西灣山，便開始向下行﹗呢段路都係時好時壞，行幾步爛路又有幾級石級喎，唔通政府起起吓無錢？點解呢段路會咁搞笑架﹗真係少D精力都唔得喎，況且呢段山路都算係香港最熱門的一段行山徑﹗唔該政府快D整好佢啦﹗ 因為我地行山之前幾日先有同事行完 "毅行者"，咁啱果日落狗屎，佢地話真係行上兩步又滑低三步﹗超慘呀﹗ 遠望浪茄灣，D水好藍好清，其實唔使去外國，香港都一樣有好靚的景色﹗ 浪茄灣﹗正呀﹗旁邊的沙地仲有好多外國人帶埋小朋友黎紮營添﹗真係好開心喎﹗原來外國人都識得係香港呢個石屎森林入面搵到郊野之樂﹗ 繼續前行，由西灣山行咗五公里，終於黎到 "萬宜水庫" 啦﹗ "香港國家地質公園" 好快就會改名做 "世界地質公園" 啦，其實我地去呢日已經"升呢"咗， 只不過個牌未改得切，旁邊的導遊小姐都提佢的團友快Ｄ影番張留念吓﹗我地梗係唔執輸，影埋一份啦﹗ 以前EPA 成日都有提的萬宜水庫，真係好大喎，D水都好清喎﹗其實己經忘記咗係咪輸入香港的東江水會放係呢度儲存既呢？日日咁曬住咪蒸發咗好多？蝕曬喎，D水好貴架嘛﹗ 原來萬宜水庫東壩的下面就係傳聞中的六角柱呀﹗哇~~~~~好壯觀呀﹗ 其中一部份的六角柱因為地形改變的壓力而彎曲咗添呀﹗大自然的力量真係利害利害﹗ 小妹六角柱面前真係"大鄉里出城" 咁呀﹗WE WA 鬼叫 ~~﹗ 防波堤上面有好多防波石，(其實唔知佢地正式叫咩名，就叫住"防波石"先啦) 呵呵﹗好百厭的小妹即刻擒上去玩﹗ 小妹真係好鐘意擒樹擒石，時常懷疑前世係咪馬騮？﹗ 嗱嗱嗱，大家睇清楚，小妹就係著住對咁既"白飯魚" 去行山，你話係咪過份呀啦﹗ 除咗對白飯魚之外，"阿仔"都陪住我通山走，自從買咗佢之後就慘啦，次次出街都要揹住佢，當正佢仔咁攬住周圍走﹗ 中國香港世界地質公園﹗LIKE ﹗ 係東壩有好多人都等的士走，不過我地見咁多人，雖然仲有九公里先到麥理浩夫人渡假村，不過我地都好傻咁決定 ~~行~~出~~去﹗ 途中就見到好多牛屎的主人呀﹗眼見D的士一架架咁飛過，﹗雖然隻腳已經好攰好攰，仲有D痛添，不過我地都好有毅力咁繼續努力，一塊一塊標距柱咁倒數﹗ 好在係六點半天都黑曬之前行到M001﹗ 行到出巴士站，旁邊有間士多仔，即刻衝落去買番支可樂﹗嗝番啖氣出黎，舒服曬﹗小胖胖同我都一致認為呢支係史上最好味的可樂﹗ 去到巴士站，本來有車出番西貢市中心，點知連續三架都飛車，激死﹗成七點半都等唔到車，又餓又攰，繼續踎係巴士站都唔係辦法，無奈之下唯有搭架出鑽石山的巴士，速速逃離西貢方為上策﹗ 去到荷里活廣場，終於有野食﹗ 今日用咗七個鐘行咗十八公里，雖然身體很勞累，不過心靈很富足﹗ 沒有正常的裝備，沒有充足的訓練，沒有事前的路線研究，小妹只是傻更更地貫徹 "心口一個勇字" 的宗旨，從現在開始，每月一山，飽覽香港自然勝景之美﹗ 第一次的"傻更更去行山"順利完成﹗ 無限感激陪我一齊闖蕩的小胖胖~~~我親愛的好友﹗
