一直都好少叫到會食，今次幫小朋友開生日會朋友幫手叫左Kama Delivery嘅到會服務，刷新左我一直以來對到會嘅睇法，到會一直響我心目中都係菠蘿腸仔、咖喱魚蛋、咖喱角春卷、芝士火腿三文治之類，但今次到會食物種類都非常豐富，而且試左今次之後，對於Kama Delivery我保持一個高評價，好食之餘價錢都算貼地。Kama Delivery 好唔好？好在邊度？食物質素之外我想讚下個送貨服務先，司機非常準時有禮，到步前同我地約邊度交收，雖然miss左佢2個call，但司機態度都好好，冇唔耐煩非常抵讚，唯一係客服覆Whatsapp嘅速度可以快多少少就好啲囉。食物質素又如何？食物包裝上用保溫袋入住，而且冷熱食物有分開包裝抵讚，雖然溫度上未去到熱辣辣，但可以接受，始終我地距離佢出貨地點都有半個鐘車程，所以暖暖地我都覺得合格，但打開個袋啲錫紙盒上面冇寫明果盒係咩就差少少，不過因為係小朋友party，嘢食都係小食為主，我哋全部都一次過打開哂就冇咩影響。 雖然有成半個鐘車程，但嘢食打開後冇翻天覆地，算係非常整齊，雖然我少食到會，但Kama Delivery 嘅嘢食我覺得係Party Food黎講算好食，雞骨腸、芝士雞翼同帶子酥盒係幾特別，而迷你漢堡飽剛打開啲小朋友已經蠢蠢欲動，影完相冇幾耐已經清零，而我特別想講嘅係奶昔同甜品，奶昔造型相當可愛，居然有針對小朋友派對嘅造型飲品，唔好話小朋友，我見到都童心大發，小朋友一窩蜂向士多啤梨味奶昔埋手，不過顏色上的確比較吸引，我覺得朱古力味奶昔就好飲啲。甜品我朋友揀左橙味啫喱同朱古力布甸，可惜我已經食唔落，阿女揀左橙味啫喱我食左一啖，都ok唔太甜，不過個兜幾靚，雖然未知有咩用但我都攞左幾個返屋企。 朋友話原來Kama Delivery以前係餐廳轉型做到會，好似響旺角開過，出名好食係龍蝦菜式，個龍蝦包同意大利飯好出名，不過今次朋友冇叫到，但有個小插曲，就係我哋攞餐果時，攞漏左一細袋食物，打俾佢地客服居然叫司機回頭送返嚟，仲要冇額外收錢。如果要評Kama Delivery 好唔好，嘢食服務上我都滿意，當然有改善空間，但第一次食呢間到會公司整體感覺良好，聖誕節都會再幫襯佢哋，未試過嘅我建議你可以一試，最緊要價錢仲要唔算貴，如果可以免運費送上門就更加好啦。
