又係大肚婆常見問題，究竟懷孕要食D咩？ 呢個問題好困擾，所以亞一媽媽又係網上做左好多資料搜集……亞一爸媽都算係有計劃咁去準備生育。 有時男人比女人更麻煩，亞一爸爸其實唔想咁早生，話未準備好，不過再等佢完美地準備好，我都變高齡，所以經過大半年俾我洗腦下，終於決定計劃開始。 好感謝上天對亞一爸媽都好好，計劃開始左2個月就有好消息，不過成功之後，就開始擔心自己準備唔夠充足。 好多醫生&媽媽都建議準備懷孕前3-6個月就要服食葉酸，亞一媽媽就跑去萬寧睇，最後買了2樽GNC 400mcg，就係圖中那款，當時減價大約$80左右1樽，抵。 好多媽媽會選擇食綜合維他命，但我當時唔肯定幾時會bingo，又覺得平時飲食都足夠，所以每日食1粒葉酸就夠，懷孕之後都冇增加份量，因為平時都會食菜。 除左葉酸，3個多月時候開始間唔中會頭痛，由於以前去家計會做懷孕前檢查check2次都話有貧血 (不過之後醫院產檢又話我正常)，以為自己缺鐵，就買左朋友介紹——鐵水。 我買左蘋果味，一包份量少少，撕開倒落杯就飲得，雖然有少少鐵味，但整體黎講，我覺得幾好飲，蘋果汁feel。 後來去睇私家婦科，問及醫生過左3個月仲需唔需要食葉酸，佢有提及其實整個孕期都可以食，又聽我講飲鐵水，佢就建議我食綜合維他命——又變成我另一個問題。 坊間太多選擇，究竟要唔要加埋鈣或DHA成份？會唔會便秘？易唔易吞？ 我最後買了惠氏，我冇試過其他綜合維他命/軟糖，睇完唔同牌子，都各有FANS，見健康院都係俾惠氏，應該比較有保證，不過係冇鈣及DHA成份，要自己另外進補。 自己都擔心有便秘問題，所以我都係隔日食，感覺好D。 DHA我唔係專登買，我參加美贊臣講座，原本只係想囉個媽媽U型枕，點知去到有得$99買一盒DHA+俾BB服用的維他命D (如圖)。 即場試食後發現自己吞到 (都幾大粒，網上都有媽媽話吞唔到)，亞一爸爸話可以買番去試下食，咁抵，仲有樽維他命D俾亞一。結果，覺得1樽未必夠食 (好似得30粒)，離場前又買多1盒。 放假去萬寧買野，俾亞一爸爸見到正價要2百幾蚊樽，又咁巧合旁邊有父母想買維他命D俾BB，一樽又百幾蚊，突然覺得真係好抵！佢仲話早知買多盒。 所以有需要的懷孕媽媽們可以早少少參加美贊臣媽媽會講座，早D買就買D食，唔駛出面買咁貴，我20周左右去，肚都唔顯眼，見有個未見肚媽媽同老公直頭買左3盒。 不過我建議買1盒望左有效日期先，我買果2盒係11月就到期，DHA當然食得晒，但BB就未必食得切，所以買得多，有機會會浪費左。 而家我係一日DHA，一日綜合維他命咁食，鐵水就1包/1wk，鈣就1星期2-3次飲豆漿/鮮奶。
