今日係我最辛苦既一日,因為我肚痾啊!好嚴重個隻!我竟然踩踩下單車,走埋一邊痾屎⋯ day15 左貢到邦達,102km,五個半鐘,爬升海拔768 米。 由於有一個隊友(同我一齊經歷雪山之旅)要提早離開,所以我地前一晚同佢餞行,食左餐勁既!就係因為呢一餐,我今日收左皮了! 最左邊個兜,應該係罪魁禍首!!!!又辣又油,我食到勁飽⋯ 咁就開始左我周街拉屎之旅。 今日決定帶著公司去旅行,其實係因為其他衫洗完唔乾⋯ 朝早出發都無乜異樣,踩左兩三個鐘開始黎料!個肚勁唔舒服,又唔係想痾屎個隻。 超級靚既稻田!!但肚唔舒服乜情都無哂⋯ 真係被迫停係到休息~ sorry 明明個景好靚,但都同痾屎拉上關係!因為我影完呢張相踩多十分鐘,我就搵左堆樹去拉屎了⋯ 噴水咁款! 大家估下呢個角度係咩角度,我係到做緊咩~ 無錯,係第二次,係地下引水道。 今日完全係面青口唇白。返到旅館無哂心情無哂胃口,真係好誇張。 死屍咁款灘左係到,凍都無力去拎被come,好辛苦。以為食左保濟丸就無問題? 半夜同你嘔返哂出黎!唔知係咪高原反應,定心理影響。呢啲藥全部無用。首先12 點我肚痛醒,仆出去痾屎。痾既時候勁反胃,但嘔唔出,唯有自己扣喉嘔佢出黎。好似火山爆發咁將琴日今日食既野嘔哂出黎,鼻水眼水亦噴堆出黎,辛苦到一個點。 以為痾完嘔完可以安心訓覺,兩點半又黎一次肚痛,重複上面步驟,好想嘔,再扣喉嘔多次,開始嘔哂啲野出黎⋯ 再辛苦多一倍。其實我唔知可以做啲咩,只有痾同嘔。 以為最後一次,嘔哂野無野可以嘔?四點半再肚痛一次!今次痾完之後,仲係好想嘔。唯有再扣喉。今次無野嘔出黎,但不停嘔黃胆水,真係黃色既,嘔到個胃空哂了。呢次辛苦十倍⋯ 呢一晚我唔知自己做緊咩,又眼訓又攰又痾又嘔,廁所又污穢。 sorry,真係有啲核突,但我真係要記低佢,呢種身在異地無人幫到你既心情,只有想個身體乖乖地快啲好。以後食野會小心啲,知錯了⋯