今日呢篇遊記會好長,因為真係好難忘很難得。 day8 相克宗到紅龍鄉,9 小時,78km,爬升海拔2191 米。今日終於爬上第二座海拔四千米高既山了!好興奮! 仲有仲有!!我今日終於睇到雪啦!!咩叫眼睛在天堂,身體在地獄,今日感受哂。 其實每日都會見到唔同既騎友,傾得埋既會一齊出發。大家行得同一條線,今日見唔到可能後日會係第二個站見到。大家都會叫我港仔,而且好鍾意問我呢樣問我個樣。有幾個特別熟,幾好玩。 今日朝早落大雨,但我堅持要自己出發。因為其他人都打算搭車去下一站,而我當然唔會俾呢啲事發生。所以一早起身著哂雨衣準備出發。人與人之間就係咁好笑,當你決定做大部分人覺得做唔到既事,就會俾人睇死。 今日旅館有40 個人食早餐,只有三個可以由頭踩到尾,我係其中一個,其他人全部搭車。 一大清早就落雨,都要出發。踩左一個鐘已經手套鞋襪濕哂,最白痴係我件雨衣係唔防水-.- 每次轉彎一見到上坡,都會心屌「屌你老母上撚完坡未」。sorry for 爛口。 人間有愛,休息避雨時有自駕人士請我飲咖啡。但次後好急尿。 踩到十一點幾,實在頂唔順,全身所有野濕哂,連駝包入面啲衫都濕哂。走左入去間屋仔到取暖,飲左杯穌油茶同食左個杯面,但都仲係好凍!外面應該得3-4 度。 可愛小妹妹,不停望住我⋯ 手套、護膝、手袖、襪全部濕透,火爐烘乾中。 經歷多4-5 個鐘既折磨,我終於上到海拔4700 米既卡子拉山!大家有睇我ig story 應該講野痴哂脷筋咁,因為真係凍到講唔到野,一舊舊。 最興奮真係第一次睇到雪,踩踩下車雨變雪,我笑左出黎,不停問自己係咪雪黎架! 影呢張相個陣,我全身差唔多無哂知覺,搞左幾耐先開到部手機俾人影,笑都唔識笑,但都一定要影! 呢個時候有救援車建議我同另一個車友唔好踩車落山,因為實在太凍又大雪,而且仲有2-30km 先到終點。用身體斷估當時氣溫差不多零度。當時我神智不清,但都知自己究竟做緊咩。我一口拒絕上車。因為已經經歷左7 日既洗禮,無理由咁易放棄。 腳唔講了,想講一講我隻手既感覺。前幾日既blog 已經提過,我右手無名指同尾指已經一星期無感覺麻痺哂。而我係山上面既時候,十隻手指因爲一直浸係對濕哂既手套入面,仲要俾大風狂吹,十指已經麻痺到唔麻痺,十級痛。轉波都轉唔到,只能夠勉強落山煞下掣。 全部防水既都唔防水,真正既赤赤痛。 頭盔雨衣都結冰了,第一次見落雪竟然係勁辛苦。但落雪真係好靚! 白蒙蒙一片⋯ 我竟然為左個blog 勁辛苦咁拎個電話出黎影相,都無感覺了。 其實我由山頂拒絕搭車個一刻,到落山途中,我一直係到流眼淚。你地可能唔明我點解要請一個月大假黎捱苦,之後講到自己好辛苦咁。老實說,人生有幾多個十年?我好感動自己竟然真係去做一啲好多人都想做但一世都唔會去做既事。無錯,我真係做緊自己想做既事。 護到旅館,我凍到講唔到野,但已經好多人走過黎話「港仔,你很牛B 啦!」