話說呢，終於去完個暑假旅行啦~返到嚟香港後成個人精神散渙、體力變差😔，為咗呢個暑假多返少少意義，又係時候安排出走下啦。不過我之前為咗個暑假充實少少，都幫佢哋報咗唔少興趣班🙈，所以前前後後計過最多出走3日。係只得3日，我又想邊hea邊差下電，連去個珠海澳門都覺得遠的情況下，就選擇近近哋的深圳啦！今次的首要目標就係......笋崗文具玩具禮品批發城😙，就嚟開學啦，文具真係幾時都唔會嫌多，今次仲唔實現文具自由，嚟個文具放題！想當年應該唔少人嚟呢度買過結婚用品 (包括我)~聽聞呢個文具城，價錢仲比淘寶平，究竟又係唔係真呢？交通:首先講下交通啦，笋崗文具玩具禮品批發城就當然係位於笋崗啦。以下深圳地鐵圖所見，就係羅湖及新口岸蓮塘比較近 (不過就要轉2次線); 今次我就由福田過，轉1次線，不過時間上就比另外2個口岸要遠 (需時約30分鐘) 到咗筍崗後，然後行A出口就會到大商場萬象食家 (遲啲同大家介紹)，行出萬象食家過馬路，再向左行一條街就會到禮品城 (由於我的介紹方向能力出色，所以大家都係自己睇地圖去行啦~)😆 內容:一眼望過去，除咗笋崗文具玩具禮品批發城外，附近都有幾個大商場，包括華海達(服裝批發)，星光商業廣場 (文具，玩具服裝)及隔離的工藝城，大家可以按自己需要要選擇唔同商場。 雖然文具玩具禮品批發城係有批發2個字，但零售都絕對無問題。整個批發城有4層，主打就係文具及玩具啦，放眼望過去喺淘寶睇到睇唔到的，新的舊的都有，絕對係琳琅满目，目不暇給。因為呢個係新場，所以都算乾淨整齊，冷氣亦算足夠。點擊圖片放大 +2 3個小朋友都各自有目標，興奮到迷失自我🙈，真係好少機會去咁大型的實體店購物啦， 2位小姐絕對就迷失到一堆夢幻的文具中。(而媽媽我都好忙，所以都無影好多相😆)點擊圖片放大 +2 細佬就一支箭去搵玩具，迷失於玩具堆中。點擊圖片放大 仲發現有間賣毛公仔同袋，啲貨同我哋係萬象食家玩夾公仔的禮物係一樣😂。大家姐想換個黃色芝士袋，好可惜我哋用$199去夾公仔都未換到，而呢度只係賣$49.........如果你重視過程，就繼續去享受夾公仔的樂趣，如果想要結果，直接過嚟買啦~😉) 價錢及注意:我相信大家都好有興趣，價錢究竟係咪真係咁抵買呢?對我嚟講最困擾嘅係......大部份貨品都係無標價錢😓。有時文具太濕碎，我都唔好意思逐件問，亦唔排除唔同鋪會有海鮮價，喺唔同日子行咗3次的情況下就有以下心得:👉 可以的話唔好星期六日上去，人會多到購物意慾大減(我啲相全部係星期一影)👉人多時可以直接上3樓，人會少好多，貨品其實都係差唔多 (其中一間1樓同3樓都有)👉無做即時比價，返到酒店後再睇返部份知道價錢的文具，發現有一大半同淘寶差唔多價錢(或多一點點/ 少一點點); 有少部份比淘寶要貴40-50% (唔排除我比人開咗海鮮價😆)因為淘寶的價錢本身都有高有低，加上入去睇又可能另一個價錢，所以以下價錢對比都係以供參考:點擊圖片放大 👉1樓同3樓都有間"生安文具"，比較大種類多，價錢亦實惠 (我買嗰啲嚟講)👉少部份有標價錢的，睇岩就可以買，因為通常都唔會比淘寶貴點擊圖片放大 後記:以我今次嚟講所有文具玩具都唔見得一定比精心格價的淘寶平，不過行街買嘢其實係一種樂趣😊，有時網上圖片未能睇得出產品品質，實物可以拎上手睇完再衡量買定唔買，咁就唔怕貨不對版啦。今次3個小朋友都買得好開心，呢度吸引過playroom，因為playroom玩完係無嘢可以拎走😂。不過又真係好需要腳骨力，如果想慳水慳力的朋友就繼續網上購買啦~💙 歡迎合作^_^ 💙💜💜Facebook 💜💜💚💚Youtube💚💚💛💛 IG 💛💛
