相信大家呢個暑假都好努力咁搵唔到地方比小朋友放電啦，室內playhouse我之前都有寫過，而今次去呢個又有咩唔同呢？ 就係...... 特別大！ 特別消耗體力！ 特別抵玩！(帶定頭盔先，優惠受條款約束) 好啦！嚟睇下有咩玩先。 一眼望過去，最吸睛又最吸引的就係呢個大圓圈位置，點解吸引？因為呢度主要係比家長們坐定定me time的好地方，係咪好正呢！(如下圖所示) 咁左右兩邊都各有大型攀爬架，但兩邊結構就有少少唔一樣。 先睇下左邊先，好有糖果feel的一個地方，因為疫情關係所以設施就減少咗，所以相對上顯得比較"空虛"。 仍然有攀爬架及滑梯。 順住呢條彩色橋，就到左中間位置的繩網區。 今次特別派出因為無人湊而可以出場的特約小記者李金仔同李爸爸出場，對於歲幾小朋友嚟講基本上所有設施都要大人寸步不離咁一齊玩，所以李爸爸都變玩謝李爸爸，如果帶細B的家長要有心理準備呀!! 好啦，到右手邊，一個巨大而複雜的攀爬架出現！ 為咗體驗下呢個迷宮，媽媽我就入咗去十分鐘，(因為特約記者啲相實在唔得,哈哈)結果......迷宮基本上每部份都有唔同的障礙行，到一半又唔知點走返出嚟(係無捷徑嘅!)，一陣已經出汗，果然係放電無極限!!! 除咗彈跳迷宮之外，仲有烘焙班同埋冒險樂園的機動遊戲，有興趣烘焙班的朋友要留意時間表。 機動遊戲款式十分多，不過都一如既往啦，係燒錢的行為 (哈哈,你懂的~) 好啦~終於到最後啦(等到啦等到啦!!)，點樣可以$10玩一節呀？ 其實之前仲抵，我可以出 "$30 一日任玩"呢個標題，可惜因為暑假人太多，所以全日任玩已取消了。(可以參考以下兩張時間表) 如時間表所示，如果想玩一節就需要60個代幣，咁就要記低以下步驟使用疊加優惠啦! ➤先申請好學生獎勵計劃 (係呀, 如果未返學的小朋友就用唔到呢個優惠啦!) ➤取得 $50 (25個) 代幣 ➤由「好學生優惠冊」撕下$50 (25個) 迷宮代幣卷 (A卷) 現時已經有50個免費代幣 ------------------------------------------------------- ➤由「好學生優惠冊」$100代幣優惠卷(可以換到100個代幣,B卷)，即係只需要額外付出$10就可以玩一節 「會員通迅」內有一張10個代幣卷，因為當時唔記得咗，所以無比到。不過事後都見到優惠卷唔可以同其他優惠一齊用，如果用到就變咗free咗一節啦！至於用唔用到就等你地話返比我知啦~ ___________________________________________________________________ J-plus 大型遊樂場 (冒險樂園) http://www.jplus.com.hk/ 店鋪電話 : 2343 5068 顧客服務熱線 : 2640 7900 地址 : 九龍油塘大本型3樓301號
