1.清拆:清拆就是最先開始既工序,清拆既費用有現今既報價已經拆得好細,每個細項咁報,客人要注意裝修進行中同完工前所產生既垃圾責任誰負,事前講清楚就唔使嘈。客人要求報價時最基本要提供廁所廚房需唔需要拆舊瓷磚,廳房地台需唔需要重做,原有是木地台還是磚地台,需唔需要換門框,其他細節師父都會識得問你。 2.鋁窗:鋁窗通常以平方呎去計價,換窗通常只係指窗架本身,價錢唔會包窗花,所以窗花係另計,窗架既厚度同顏色都會影響價錢,唔同形式既窗亦都唔同價,唔同款式既窗花亦都唔同價例如#38白鋁就會比#50古銅色便宜,當然細節可以日後相討,報價時你只要知道自己想換什麼色或什麼料,要唔要窗花就可以了。不過要留意現今好多管理公司都規定左樓宇既窗款,所以事前要問清楚所屬管理公司所選款式是否合乎規格。而換窗好多時會涉及撘棚,所以最好列明撘棚費用多少,包什麼棚,如要做外牆水管,又包唔包水喉棚,或要加幾多錢做水喉棚。所以報價前最好每個窗都量一下size。師父就唔使估估下。 3.水喉:如要更換水喉,只要提供到合共有幾多個用水位就可以大約報價,但報價通常只會計更換室內水喉(由進入單位後之第一個大制起計),水錶房到單位前的一段供水喉,如要一同更換就必須事先說明。此外,可以提一提唔同的報價方法以作參考: a, 一個大數包換全屋來去水喉,排糞喉(如要)/咸水喉,包裝所有潔具。 b, 做來水喉計一個數,去水喉一個數,改屎喉/咸水制另計,裝潔具又一個數。 所以睇報價時應先了解究竟包乜唔包乜,睇下所提供既工程到唔到達你既需要。 另外如果唔換窗而要做外牆喉就要問埋水喉棚既價錢。 4, 電燈:電燈制通常以每個位去計,要留意每個師父/公司去計算呢d位數都會有出入,問清楚解釋清楚可避免誤會,比如一個位開關五組燈係會計五個位,而唔係以一個面板去計,孖蘇既計法有d師父以個半位計、有d就計兩個、有d就以一個位位加幾多錢咁計,一d獨立既制位,如每部冷氣機的供電都會是一組獨立線,如果距離太遠亦都會額外加取費用,此外還要留意是否會換總制箱。 5.泥水:砌瓷磚通常以平方呎計,報價時要問清楚包唔包磚,包什麼磚,而一般情況下報價只包人工同英泥沙。廳房地台磚同腳線有d師父/公司會分開兩個價,有d就一個價包晒,有d師父/公司就會把廁所廚房牆身磚同廁廚地台磚一個大數咁計,有d就分開牆身同地台兩樣咁計。而做牆身會貴過砌地台。另外泥水亦包括左間磚牆,客人只需要度一度所需新牆既長度(直呎)就可以知道價錢。而一d額外既如防漏呀、現場砌企缸亦要知清楚所需費用。 6.木器:其實所有用木板做既都可以歸入木工,不過現時既裝修主要涉及既木器多數都係廚房柜、廁所地柜鏡柜、換門、換門框、做燈槽、簡單天花、暗門圍身呢幾類,做柜只要有直呎誇可以報價,燈槽、天花就要有個大約size先得,而燈槽、天花,暗門圍身等因多數會涉及計設,所以報價時都只能有一個基本價提供,實價就要等定好了款先知道,而做以上既木器時都應該問清楚是否已包了物料,包d咩野,要負責買d咩野。另外如要訂做傢俬,只要講清楚你需要訂做的傢俬呎吋,夾板做還是纖維板做,做油還是木皮面,咁就可以計到價錢。 7.油漆:住宅牆身通常只會有幾種選擇,如牆紙轉乳膠漆,或乳膠漆轉牆紙,或做cord,總之就係呢幾隻野轉來轉去,做價好多時都係包剷底批灰,油防潮油,再做你所選既面漆或牆紙,除了做紙會需要客人自購牆紙外,其他一般會包埋面漆。此外,翻油/新油門連框、傢俬等,油唔同既油都係唔同價,呢d都要問清楚。 8.氣體:包括煤氣或石油氣,如單位需要換喉、改喉、換錶、改錶位等,都可以由持有相關牌照既師父或公司代辦,如有需要都係事前要講清楚費用所包括既項目。 雅康庭工程公司 電話92068002