丹吉爾Tangier係摩洛哥最靠近歐洲，亦係風格最似歐洲的海邊城市無計啦，地理上佢岩岩係正大西洋地中海入口，坐一個鐘船橫越直布羅陀海峽就已經係西班牙所以Tangier勁多西班牙人，星期六日無野做咪游水過嚟食個塔吉鍋，同我地周末過澳門無咩分別ga ja~而Tangier亦因為地中海風情，連摩洛哥人都視之為度假勝地Wa好似好威猛咁wor! 係咪真係咁好玩ga? ======================== 請大家Follow我Instagram啦~Instagram : https://www.instagram.com/fung_garcia_backpacker/ 另外Threads果邊有我其他教書同旅行既攪笑/悲慘故事，快d follow埋啦~https://www.threads.com/@fung_garcia_backpacker ======================================================================= 丹吉爾Tangier建議遊玩日數 : 1日 (如果去埋大力神洞和Cape Spartel要加多半日) 文章概要 :市內交通景點我的住宿推薦吃過的食肆離開交通 1. 市內交通 :Tangier有巴士，的士都易搵，而Medina 8成地方只能步行，不過有d邊位都可以的士入去City scale比Fes同藍城大，而且Medina城內的上斜落斜位幾多下，迷路亦非常容易如果你住係Medina內，無GPS的話真係唔使旨意搵到路 另外如果係坐CTS Bus由藍城or其他地市過嚟，要注意巴士總站離舊城區頗遠的你可以選擇跟google行一段路出去巴士站又或同的士佬玩講價大戰，正常價位大約係40-50MAD~$35港幣啦 2. 景點相比起其他摩洛哥城市，Tangier的景點較為分散，未必全部集中係舊城區而當中最出名ge，當然係距離市中心約1.5小時巴士的「斯帕特爾角 Cape Spartel」和「大力神洞Hercules Caves」前者為摩洛哥200蚊紙既風景，後者係一個從內向外望會出現非洲大陸形狀的剪影不過，張200蚊咪又係一座塔加個海，果d歐洲求其行去海邊都有既風景而為左影「非洲」而要比$80入場費排隊影完走人更係智商大考驗Even係Tangier最出名景點卻伏味極濃，所以我無去到回港後有向去過既朋友請教，一致認為值得比五架阿柏奇直昇機佢但如果真係好有興趣，又好多時間，又好多錢的話，花一日去果邊玩下都可以ge不過我就介紹其他景點了~ Window登入圖片既斯帕特爾角 Cape Spartel，都唔覺有幾靚…… A. 海灘Plage de TangerTangier之所以為摩洛哥人既度假勝地，其中一大因素係佢有呢個長達4 km既長海灘~摩洛哥大部份地區都係內陸沙漠，見到大海當然興奮啦~ (唔好學呢條友望完海後殺左全世界80%人就得啦) 個沙灘大就大啦，藍亦夠藍，但水質就唔好同東南亞果d比較啦海草垃圾比較多，再加上當日天氣仍然係10度左右，你唔會expect我跳落海游去西班牙ga~ (對面就係西班牙，游過去無難度ar~) 而呢個海灘仲有個特點，就係可以騎馬同騎駱駝聽落好浪漫，但點解睇落好似有d戇居咁ge……同埋，唔好玩啦有睇我IG都知，我岩岩先係撒哈拉騎左兩粒鐘駱駝磨損左股嗱…… 騎完撒哈拉果轉應該有10年唔想騎駱駝 你見條友係一d都唔自在瀟灑ga~ B. Hafa Garden至海濱長廊Hafa Garden係一個位於山坡上的公園，由Medina北部可沿豪宅區慢慢行過去公園本身唔算好吸引，但配上黃昏時的海邊，成件事立即浪漫哂!我個人就幾鍾意啦~ 點擊圖片放大 +4 C. Medina舊城區內Tangier Medina可以話係一個小型圍城，沿海一帶都有城牆擋住咁都正常ge，睇返地圖，呢個地中海入口大城點睇都係戰略重地，點會唔打到開花呢而似乎亦因為太近歐洲，比起Marrakesh和Fes，Tangier的Medina視覺上顯得時尚多了唔出聲既話，扮係歐洲城市都有可能 點擊圖片放大 +3 既然咁近歐洲，近朱者赤，物價自然都比較肉赤不過個人覺得呢度既食物同紀念品都比其他摩洛哥城市更我合心水反正嚟得Tangier好多時都係最後一站，係時候fing埋d摩洛哥幣了 點擊圖片放大 +4 D. Café Hafa聽聞係當地最出名、最歷史悠久既日落Café，到達後發現現場果然非常歷史悠久!風化至發黑既枱面，中學canteen般既膠凳最重點係呢個季節既望海角度睇唔到日落呀!雖然一杯飲品約$40港紙唔算貴，但咁唔chill既環境，真係無咩興趣stay係度 殘舊到呢….. E. Al Amana Mini CoffeeAl Amana Mini Coffee是我失望於Café Hafa後亂行搵到既小店位於Medina正北城牆上的一間小cafe，小到細過香港既外賣廢水店但勁在佢係城牆邊將凳一字排開全部看海!全享180度全海景觀超級開揚! 正過Café Hafa好多!而且只需$10就有杯茶or咖啡慢慢嘆~我用佢嚟做摩洛哥之旅最後一個日落，非常值得! 點擊圖片放大 +2 3. 我的住宿推薦Riad Tanja By chef Moha睇名都知呢間Riad由阿Chef Lemon Chef Moha主理開頭諗住押上你個名咁威就試下妳手勢啦走高級路線? Ok呀有幾貴呀~我整你個掣一個餸要$300港紙????我第一次見有摩洛哥餐廳超越香港物價……Sor太窮食唔起……我出返去咬乾淨淨麵包先啦 好啦講返間Riad啦~地點係Medina以南近城牆，的士可以係個出口仔出入唔使次次由Medina正門行一大餐，係方便ge房間以黃綠色為主，冷暖氣有齊，都算幾乾淨廁所勁大，不過係儲水式熱水爐，1分鐘閃電式好快無哂熱水，係大扣分位 不過如果鍾意打卡ge，呢間又真係唔錯~雖然無泳池，但間Riad係由城牆內既空間所改建，即係窄身+樓梯交錯，形成高低錯落的獨特空間感當晚上阿拉伯世界的燈炮亮起，個世界立即變得好難影相呀喂!其實超靚!但d光射嚟射去，我呢d唔多識攝影既人用Iphone都救唔到有d似我係伊朗Shriza既鏡宮聖陵咁，完全影唔到現場有幾震撼 點擊圖片放大 +2 除左大廳，我最鍾意佢個天台可以望海~仲鍾意到被反鎖困左係天台半個鐘吹風呀~~~~~~~………..其實係check in時職員問我地welcome tea想去邊度飲我book果時已經知天台靚咁梗係天台啦!點知職員帶完我地上去後忘記左我地，仲鎖埋門唔係咁好彩sim卡有埋打固網電話功能，我分分鐘成為第一個係摩洛哥天台凍死既亞洲人…..Anyway啦，朝早係度食早餐真係人生一大樂事～ 第一眼個天台好正呀~ 之後就被鎖左係度…. 唯有影相解悶~ Welcome Tea Set 早餐係咁~ 《Riad Tanja By chef Moha》Google 4.5分，com 8.6分+212539331212淡季2人房約$650港幣一晚，旺季約$850Link in booking.com –> Here 4. 吃過的食肆話哂都近地中海同歐洲，Tangier會比較多海鮮和西餐，甚至連Tapas店都有!不過同無人會係韓國食日本壽司既道理一樣要食Tapas，過對面海啦! A. Restaurant Al Maimouni近城門入口的人氣海鮮餐廳上2樓條樓梯每級都人咁高，幾乎要落釘爬上去ga laGrill Sea Bass係反覆捺上香草牛油欖油燒成，香滑鮮美海鮮塔吉鍋亦拍得住上回藍城果間最好食既小店~值得推薦~ B. KANZAMAN restaurant位於主大街上，裝修光猛、新淨，非常遊客向牛油果smoothly and 橙汁好飲(其實全摩洛哥既橙汁都好好飲)食物方面咪又係dllm塔吉鍋目測人地既西式burger好似吸引d價錢唔貴，都可以一試ge 點擊圖片放大 最後一餐，美女話都係要食塔吉鍋，好頭好尾…… C. Food Court in Tangier City Center我係大商場Tangier City Center既Food Court食左KFC同本地fast food “Blue Tacos”先講KFC~舊雞又熱又脆又多汁，比香港好不知幾多倍!而本地薑Blue Taco既夾餅係可以自由選擇十幾種餡料mix and match，我地要左雞肉芝士薯仔餡點講好呢……好味ge! 價錢亦唔貴約$40港紙，不過份量係食一個可以飽足3日，同一個星期內唔想再食囉!食厭左塔吉鍋想轉口味ge強烈推薦~ 點擊圖片放大 +2 5. 離開交通一樣係CTM巴士往來全國各地，亦有火車去Rabit、Casablanca等大城市不過最主要都係每日都有幾班船坐去對面海西班牙~碼頭只係Medina東北角過條馬路，如果上網買飛有困難去現場買飛都方便，自己就返航班時間就得了~至於去西班牙既交通詳情就請睇返《【摩洛哥之旅】出發前必看資訊大合集 (上) 》啦~ 講真呀，我出發前有fd話Tangier幾正可以玩2-3日當我到達時就覺得無乜野睇/玩，1.5日真係max但到而家完成呢篇文章，寫下寫下又覺得呢個地方都算值得一到至少作為end of Morocco Trip我覺得係唔錯ge~好啦~ 摩洛哥城市既簡略介紹(真係有簡略左!!??)寫完~原本想偷懶唔寫撒哈拉沙漠Tour既見聞，但我比網友問得最多就係佢知道知道~ 下篇嚟啦~ https://www.google.com/maps/d/edit?mid=1ea-DpNKxT8LR7g6ARazKjTq7_uBm-kc&usp=sharing ======================== 請大家Follow我Instagram啦~Instagram : https://www.instagram.com/fung_garcia_backpacker/ 另外Threads果邊有我其他教書同旅行既攪笑/悲慘故事，快d follow埋啦~https://www.threads.com/@fung_garcia_backpacker =====================================我既Youtube Channel已經開通啦!!!!快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~ 鋒加西亞/旅人瘋語 Youtube Channel 主要影片 ：【泰國】【芭堤雅】誤入邪骨!? 芭堤雅色情行業真相!【歐洲】人有三急在歐洲怎辦? 卑鄙無恥! 歐洲免費廁所全攻略【希臘遊記】絕美海濱! 雨傘雕塑! 寫意的希臘「塞薩洛尼基」一日漫遊!【希臘】型爆海盜船酒吧扮魔盜王！超值60蚊一杯包遊船河！？ 白濱系列 :【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄!【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!?【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住! 旅行故事系列 :【台北】誤闖台灣三溫暖，內裡竟然係……嚇死人咩！【格魯吉亞】最慘的4小時! 格魯吉亞地獄小巴之旅!【波蘭】在納粹集中營，我竟聽到了……一世難忘的恐怖回憶!=================================相關篇章 :摩洛哥之旅《出發前必看資訊大合集 (上) 行程路線計劃+交通攻略》《出發前必看資訊大合集 (下) 住宿選擇+美食攻略+必備物品》《1 – Casablanca卡隆布蘭卡只有水上清真寺?》《2 – Marrakesh馬拉喀什︱行不完的趣味古市集》《3 – Fes菲斯古城︱特登走去盪失路︱比錢去聞臭味?》《4 – 藍城Chefchaouen舍夫沙萬︱摩洛哥最夢幻藍色小鎮》 歐洲隨筆《002 – 德國人少見多怪的飲食習慣(上)》《003 – 德國人少見多怪的煮食習慣(下)》《005 – 卑鄙無恥的免費廁所全攻略》《006 – 路不同，各自遠走》《007 – 土耳其烤肉卷》《008 – 喚起聖誕的葡萄酒》《009 – 外國月亮特別圓，鬼佬床褥特別軟》《010 – 德國慕尼黑啤酒節全攻略》===============================Email : funggarcia@gmail.comwww.facebook.com/Garcia.in.Germany 文章同時刊於以下平台，請各位多多支持呀!!!!!!!!!!!!!UBlog
