隔左咁耐，寫左咁多唔同國家，好多年後終於可以再寫返我最愛既日本遊記啦! (之前既京都紅葉篇唔係好算啦~)由於要遷就我係東京睇聖飢魔II演唱會既時間，所以今次出發時間係2023年2月中，呢個時間日本東北仍然係一遍白色凍到甩肺，最岩就係去玩d冬日限定玩意ga la~話哂都係我疫情後第一次去日本，點都要玩盡佢!!!!此遊記既簡易版已經係IG度po左一段時間，但作為長氣型Blog，一個無咩人睇既IG點可以滿足到自己同幫到大家plan行程呢~所以~ 新長篇「日本東北仙台山形之旅」正式開始啦~ (掌聲啪啪啪~) =======================================請大家Follow我Instagram啦~Instagram :https://www.instagram.com/fung_garcia_backpacker/fung_garcia_backpacker ===================================== ============================ 文章概要:藏王狐狸村交通藏王狐狸村放養周圍走區藏王狐狸村飼養區及紀念品店藏王狐狸村回程交通 2023年2月10日凌晨，我終於再次嚟到日本啦!!痴線點會估到要隔時隔3年先再有得嚟ar? 而家簡直係羅密歐見返茱麗葉咁開心呀!立即食個松屋賀一賀佢先! 明明只係蛋牛飯都感動到喊 1. 藏王狐狸村交通好啦正式入題~藏王狐狸村位於日本東北的入口宮城縣的山區~如果唔自駕，由東京去最好的方法一定係坐JR東北新幹線，由上野直達宮城縣白石藏王駅(白石蔵王，係yahoo.jp 路線搜尋要用呢個「蔵」)，最快只需1小時45分鐘，於駅外乘坐前往狐狸村的巴士 32分鐘就可以到達~ 點擊圖片放大 +2 睇落係咪好簡單呢~~~~但現實係殘酷的，因為巴士一日只有兩班，分別係10:10及13:10 (佢會巴士來到+開車前10分鐘左右先囉個巴士站牌出嚟，究竟咁大座野之前收左係邊……) 由於去白石藏王站既JR並唔係香港3分鐘有架車，於是由東京出發要趕上呢兩班shuttle bus ——-一係就倒塔咁早「07:50上野→09:50白石藏王」慘過返工一係就「10:18上野→12:16白石藏王」落車後發呆鋤dee 1粒鐘而呢個車站附近只有一間便利店同唔知有無開門的少量一兩間食肆…… (原來唔記影站內白石藏王駅內) 好彩有係上野車站買家野食~ 於是時間管理大師…… 呀唔係! 係善用時間既我，就諗到由宮城縣首府仙台出發到白石藏王的車會比較多，可以去仙台食個靚牛舌先睇狐狸wor~於是我就set左以下呢個行程 —– 上野09:14発 –> 仙台10:39著 —— (有1小時54分鐘食野+hea) —— 仙台12:23発 –> 白石蔵王 12:37著上野10:10発 –> 仙台11:39著 —— (有54分鐘食野+hea) —— 仙台12:23発 –> 白石蔵王 12:37著 以上行程雖然要花成個朝早，但一來可以訓晏少少，二來可以食埋超好味既仙台牛舌，實在係一舉兩得~不過有兩個注意事項 :由於上野JR information office非常多人，如果閣下需要當日換+開始使用JR pass，我強烈建議係開車前45分鐘至1個鐘去到!集合哂仙台各燒牛舌名店的仙台駅「牛舌街」於假期超級無敵極度多人，如果係人氣名店如「善治郎」、「利久」門口條龍應該長過銅鑼灣Bakehouse，等一個鐘係閒事，如果咁唔好彩就唯有回程先食啦大家都知啦，通常比大家既注意事項就係我自己既中伏事項…… 11點既牛舌街竟然可以咁多人…. 2. 藏王狐狸村放養周圍走區由起床於上野出發，用左近5小時mountain long water far，係12點加1.5小時我終於嚟到搵狐狸先生啦!!!!!交完入場費後，入場所見係飼養區及活動區，當日正舉行抱抱小狐狸活動~由於場內所有狐狸均屬野生放養，絕對會把妳伸出來的手手當火腿，所以此為唯一能親手觸碰到可愛小狐狸的機會~不過我見排隊條龍長過排IPhone，加上有外國blogger講過就算有塑膠保護衣，但抱完仍會一身狐狸臊味幾日都洗唔甩我今日就第一日，件羽絨仲有排著呀咪攪! 穿過閘門，就來到露天放養區域了~整個放養區位於山坡上，大約有維園所有足球場加埋咁大，各種唔同顏色樣貌既狐狸就係咁係妳面前走嚟走去，一d戒心都無，又者係見人見得多都廢事理你~ 幾過癮ar~其實唔理你係好事嚟，同你三唔識七，一隻肉食動物突然對妳有興趣妳估下係為左d乜? 點擊圖片放大 +5 唔知係因為落雪太凍定平時都係咁，大多數狐狸其實都係縮埋係木屋或雪地挖個窿覺覺豬Good ar~ 咁我地先可以近距離觀察下影下相~睇住佢地毛茸茸、懶洋洋個樣，真係超可愛呀~~~~~ 點擊圖片放大 +5 講真~ 好多狐狸真係超級可愛得意，樣就無敵，但現場氣味就未必咁好聞~話哂都野生動物，周圍大小二便就基本啦，身邊美女話果陣狐狸臊味好勁好臭，但我天生鼻敏感無嗅覺唔多覺~That’s why 藏王狐狸村雖然一年四季都開放，但仍然被定為冬日景點一來冰天雪地氣味較弱，二來有白雪加持，遮到好多妳唔想見到既污糟野呢~ 除此之外，放養區仲有輕量版千本鳥居……應該係十幾廿本鳥居for影相的~通常日本名為「稻荷」既神社都有呢種鳥居，傳說稻荷神既使者就係狐狸嗎~ 點擊圖片放大 3. 藏王狐狸村飼養區及紀念品店放養區慢慢行慢慢影相，大約一個鐘多d都夠皮ga la~回到入門時的飼養區，主要係好多困在籠中養病or需特別照顧的動物，又或園中特別可愛的小明星純白小狐~雖然真係cute到令人溶化，但見佢好似唔係幾開心咁都係ge，明明我係最索最受歡迎果個但就要困係籠中無哂自由，出面班二打六就因為樣衰而無人理想點玩就點玩Ee，咁似講緊d明星e.g.姜x ge? 其實狐狸村仲有其他動物，不過唔係太特別我就唔介紹啦 (其實係無影相唔記得睇過乜)反而手信店好多紀念品都幾有趣~ 肯用錢的話應該會買窮，都幾貴ga 4. 藏王狐狸村回程交通同樣無自駕的話回程都非常煩，因為同樣一日只係兩班回程巴士返白石藏王站，而佢既時間分別係12:05和15:10即係話假如你去程坐13:10班車13:42左右來到，妳要趕尾班車就只有不足1.5小時係度玩!唔係話唔得，只係唔太夠law，咁Q遠嚟到，我都想自由自在同狐狸慢慢玩慢慢影相ga++++++++++++++++++++++巴士時刻表 : http://www.takeyakoutu.jp/miyagizao_sanroku_access.html++++++++++++++++++++++ 所以唔坐巴士就只能坐的士了~手信店counter可以免費幫你call的士，出到白石藏王站約是4400yen起跳我資料搜集時有睇過話可以同人夾車，但其實係要自己搵店員唔會幫妳另外仲有一個極需注意既位係，你必須睇定白石藏王出發的JR時間!!開頭我都以為時間充裕，點知call既的士原來機乎都係由白石藏王市上秋名山飛上嚟!!!即係話由call車開始，你要等20分鐘的士 ; 上車後，妳仲要再坐多20分鐘的士，total需時40分鐘up「大檸樂啦仲有10分鐘JR到啦!!!!! 下架車兩粒鐘後阿拓海哥你揸快d可以嗎二姑二姑!!」但雪地落山道路結冰唔快得ga，快d見閻羅王就得je好彩的士拓海哥ok ok，落到山立即行小路全速達陣! 仲得1分鐘時間比我係車站影下面張全市景~所以，記得早d call的士呀!! 呢個白石藏王市全景又幾氣勢wor~ 藏王狐狸村就大概係咁多~我呢篇文章相比起介紹有咩玩，其中更加重點係分享交通上既難處，希望有意去既朋友唔好中伏~至於評價，我覺得狐狸村的確值得一到~ 係有趣可愛ge~ 但實在太山長水遠，未必會再encore了~好啦返去仙台，下回講下牛舌先~ ========================《宮城縣‧白石藏王‧藏王狐狸村》地址 : 宮城県白石市福岡八宮字川原子11-3電話 : 0224-24-8812開放時間 : 09：00-17：00官網 : http://zao-fox-village.com/======================== 請大家Follow我Instagram啦~Instagram :https://www.instagram.com/fung_garcia_backpacker/fung_garcia_backpacker ===================================== 我既Youtube Channel已經開通啦!!!!快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~ 鋒加西亞/旅人瘋語 Youtube Channel 主要影片 ：【泰國】【芭堤雅】誤入邪骨!? 芭堤雅色情行業真相!【歐洲】人有三急在歐洲怎辦? 卑鄙無恥! 歐洲免費廁所全攻略【希臘遊記】絕美海濱! 雨傘雕塑! 寫意的希臘「塞薩洛尼基」一日漫遊!【希臘】型爆海盜船酒吧扮魔盜王！超值60蚊一杯包遊船河！？白濱系列 :【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄!【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!?【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住!旅行故事系列 :【台北】誤闖台灣三溫暖，內裡竟然係……嚇死人咩！【格魯吉亞】最慘的4小時! 格魯吉亞地獄小巴之旅!【波蘭】在納粹集中營，我竟聽到了……一世難忘的恐怖回憶!【台灣】我在台北拾屍的經驗︱美女強吻? 艷福無邊? 浪漫奇遇? (新片呀!!!!!!!!!)================================= 相關篇章 : 京都紅葉系列 ：《1 – 京都紅葉隧道此生必去︱貴船神社、琉璃光院︱叡山電車紅葉路線介紹》《2 – 京都天龍寺巨型紅葉樹》《3 – 京都北野天滿宮 – 紅葉之海洋》富士山登山全記錄：《1 – 路線、小屋及裝備選擇心得》《2 – 上山啦! 惡劣之御來光館》《3 – 夢之日出! 惡夢之下山!》日本溫泉及溫泉旅館介紹：《【溫泉及溫泉旅館】 – 系列》日本富山、石川、琵琶湖 :《【北陸之行】 – 系列》日本和歌山、白浜 ：《【紀伊半島】 – 系列》東京、大阪、京都：《【東京雜記】 – 系列》《【大阪美食+京都遊覽】 – 系列》 韓國濟州島 :《總篇集︱濟州島4日行程參考》《Day1 – 漢拿山御里牧、靈室登山路線》《Day2.1 – 東門市場的遺憾︱豬肉湯麵+海鮮飯卷推薦》《Day2.2 – 龍頭岩海水汗蒸幕︱最強黑毛豬餐廳「石窟黑豚」》《Day3.1 – 牛島單車遊︱濃縮濟州之美的秀麗小島》《Day3.2 – 城山日出峰的完美日落》《Day4.1 – 濟州島 9.81PARK 重力賽車公園》《Day4.2 – 濟州島 Arte Museum 光影饗宴》《Day4.3 – 濟州島春日咖啡廳BOMNAL︱涯月咖啡街》 ================================Email : funggarcia@gmail.comwww.facebook.com/Garcia.in.Germany 文章同時刊於以下平台，請各位多多支持呀!!!!!!!!!!!!!UBlogDC Fever TravelMedium
