我既外國遊記終於重新展開啦!!!!! 好感動呀!!!!!! 但復活後第一個國家既然唔係日本而係韓國，真係連我自己都估唔到 (睇開小弟遊記既朋友都知我超級鍾意日本) 事緣我今次旅行其實唔關0+3事，只係工作合約銜接上咁岩有gap位，就算3+4都頂得住，asia miles又有首爾機位wor………. 結果係上晝買完機票，下晝就0+3全港瘋狂搶飛大行動~ 而後來日本先公佈成10月11號先開關，到時我假期已到尾聲趕唔切呀…………….. T_T 唉點都好啦，事隔3年再次有得去旅行，一於玩盡佢!!! ======================== 韓國人自己去國內旅行，10 個有9個都去濟州島，但奇怪地去濟州島旅遊的香港人並唔多 其實諗真d都唔奇ar ———- 你:「BB豬~我地去韓國玩law~」 女友:「好呀~~<3<3<3」 之後個腦出現衫ar 裙ar 化妝品ar Oh爸ar Blackpink ar 如果去到發現原來係去濟州島，上山下海睇風景每日步行萬7步乜shopping都無，估下會唔會擰甩你個頭~ 但濟州島真係一個旅遊資源超豐富，多野玩多野睇多野食，仲有世界頂級一流風景既地方! 唔去真係好浪費wor!!! 無錯! 我今次呢個系列既遊記，就係比大家去說服妳另一半，濟州島有幾正幾好玩!! 所以，點都睇哂佢啦好嗎~ (首先我要寫快d……..) 好啦第一回，講下基本旅行資訊先~ (以下內容由小弟的主觀見聞寫成，如有錯漏，歡迎指正~) ======================================= 請大家Follow我Instagram啦~ Instagram : https://www.instagram.com/fung_garcia_backpacker/ ===================================== +++++++++++++++++++++++++ 相關文章 : 【韓國雜記系列】https://travelblog-fung-garcia.com/category/asia-2/korea/ +++++++++++++++++++++++++ 文章概要: 航程 交通 天氣+衣著 住宿地點 飲食 行程概要 少少見聞 1. 航程 香港以前都有機直飛濟州島，我落筆時話HKExpress嚟緊都會有返機 但如果想同時玩兩個地方(或避免家變)，由首爾坐內陸機來回濟州島都唔係咩難事 較近市區既金浦機場平均每5至10分鐘就會有一班機由首爾飛往濟州島，幾乎密過東涌線 航空公司成5-6間，價格單程最平可以約9千幾韓圜約港幣$56 而我最後買左Jeju Air來回連稅四百幾蚊港紙，即係omakase食少兩舊壽司就有錢買機票啦~ 哎呀好抵呀~~~ 點擊圖片放大 係機場附近，每5分鐘就見一次呢個景像 (我發現韓國既地勤小姐都係精挑細選過的，每一個都係美女~) Jeju Air，第一次坐飛機既窗口位係咁…….. 當然星期五六日機票會貴d啦，不過想買平飛應該唔係咩太問題~ 至於機票search，今次小弟發現Trip.com 個機票搜尋力都幾大，建議可以搵岩心水再上該航空公司官網比一比價先~ (非廣告) (飛濟州既航班使唔使密到咁) 另外唔知點解韓國內陸機係可以帶水入閘…….. 話說我check bag時搵極都無垃圾桶倒水，問海關時佢竟然話ok呀快d過X光啦……… 而我望住排後面個鬼佬一臉黑人問號，手上渣住個水樽，眼神訴說著「x你咩我點解要啪哂成支1.5L !?」 2. 地理+交通 濟州島既地形非常易明，就係一隻荷包蛋咁中間谷起周圍平坦，火山爆完最自然既景象~ 亦由於火山島既原因佢既海邊風景非常多變，唔知去邊有咩做果陣，求其搵個海皮行下都非常開心~ 龍頭岩附近 春日咖啡街附近 對遊客嚟講，要知道既只有濟州島北方，即機場南方及東方一帶是市中心 島的南部屬於西歸蒲，較多本地人及瀑布 東面有必去的城山日出峰和牛島 ; 西面則多cafe和睇日落 Plan行程時請盡量避免一日內由東到西南至北咁玩 濟州島雖然細je，但都大過香港ga，一日內屯門玩到將軍澳你都想死啦 由東到西要成5個幾鐘………. ==================== https://www.visitjeju.net/map/JEJU_MAP_TRADITIONAL_CHINESE.pdf (詳細濟州島官方地圖中文版) https://www.visitjeju.net/zh/bbs/list?bbsid=tripperCenter-book_ZH&menuId=DOM_700000000010828# (其他版本地圖) ==================== 至於交通，島上主要以巴士為主要交通工具，亦差不多所有巴士都會經中央巴士總站 但所有車站+目的地幾乎只有韓文指示，google map係韓國係廢的，用Kakao map 亦只能作韓文/英文輸入，當然前提係妳知道果個地方既韓文式英文會係點啦~ 即係話每次妳都要先google search完妳想去個目的地個韓文名稱，再copy and paste去Kakao map來check巴士路線，麻煩到嘔! 不過可幸既係Kakao map的到站時間尚算準確，比較少九巴式隱形戰車，定係佢隱左我都唔知呢? 濟州機場巴士站，但d巴士真係亂七八糟 (個水牌點睇ar……..) (其實……都幾唔user friendly…..) 由於巴士實在太煩，而且部份地區班次不多，短途的話我都係建議坐的士 起錶KRW 3300 ~ $18.5港幣，比香港平得多啦! 問題係莫講話偏遠地區，連市面上既的士都非常之少，因當地人流行用kakao taxi 直接call的士，但外國人想注註冊kakao account非常之煩，至少我無當地電話號碼就做唔到 於是就出現我行完6小時漢挈山無車走，要行多40分鐘落山既斷腳慘狀……. 奉勸大家必要既時候請放低樽鹽，問下路人或餐廳可唔可以幫你call車啦 另外一d位置偏僻既主題樂園多於濟州島機場有shuttle bus接送，位置多數為機場3/F外圍停車區，無水牌請自己搵車 而且韓國d司機真係好難估，明明寫10點出發，但0957就開車走人 可以強烈地感受到佢對收工既渴望，幾有性格……… 機場3/F對出 Shuttle bus鍾意停邊就邊，鍾意幾時開就幾時開…… 講左咁耐，係咪發現d交通非常靠唔住呢~ 所以有能力又有實力的話，都係租車自駕遊啦，方便好多ga! 就算唔打算自駕既，出發前囉定個國際牌都一定有著數，因為去牛島時會有用的~(呢個牛島篇時再講) 牛島~ 3. 天氣+衣著 如果話日本既天氣預報準確過香港幾十倍，咁濟州島既天氣預報就真係差過香港幾十倍了 我既親身經驗係香港出發前check forecast，濟州島溫度介乎8-15度，仲要海風吹嚟凍多兩度，頭兩日天晴，尾兩日天陰，Day3落雨機會更高達80%! 梗係預備哂d厚褸長衫啦! 兩日後去到濟州島，溫度28度，我著短袖都覺得熱……….. 大佬呀個預報唔準都唔係差成13度下話???? 第一日仲係短袖好熱 第二日下晝已經絨毛衛衣都唔夠暖…… 由於我只係得一件香港出發時既短袖衫，我幾乎要去買衫先繼續到行程…….. 但果晚又突然轉凍到10度……… 咩料呢……… 另外原本80%落雨既Day3更加係陽光普照清爽怡人，影左超級多靚相呢~ Day3 perfect weather~ Day3 perfect weather~ Day3 perfect weather~ Day3 perfect weather~ 由於個天氣預報實在太唔可靠，建議大家都係按季節帶衫，但最好多一件熱天用衫和一件保暖內衣 我個人隨身會有條可當頸巾用的頭巾，緊急時好有用ga! 南怡島~凍到癲左~ (條頭巾係濟州島無用到，但後來到南怡島突然急降至real feel 5度，救我一命ga!) 4. 住宿地點 濟州島有好多又平又靚又有趣的海邊特式民宿，而佢地既共通點就係山旮旯到無人有，無自己車既就請練習定自己架11號車 初次嚟到既遊客亦不建議住往返交通不便的西歸蒲，所以都係住返濟州島北方的市中心方便d 至於市中心邊個區就無乜所謂 龍頭岩一帶和東門市場果邊比較多景點，遊客向既野亦比較多 而我今次住機場南邊Sammu-ro一帶則比較多本地食肆，酒店房價亦比較平，去機場快~ 缺點則為去所有景點都要坐車，且國內遊客向既事物比較多，萬幸而家既問題未算大~ (原來無影過我住果個area條大街，得呢張) 今次既酒店Urban Island Hotel，2百幾蚊一晚幾驚有伏，洗手間仲會突然熄燈嚇到hihi 後來先知係有定時功能 (定係鬼同你定時…………..) 除此之外都無咩問題啦，夠大夠乾淨，有浴缸比我行到hihi後浸腳recover，天氣好仲有海景望，周圍多本地食肆，行前兩步有巴士站，前枱有靚女reception，物超所值啦! Urban Island Hotel Booking.com website : https://bit.ly/3VLM3Ge Agoda website : https://bit.ly/3Y7KKnd 兩舊水一晚，好ok啦! 間房都唔細~ 連浴缸同免治馬桶都有~ 5. 飲食 濟州島最出名當然係黑豚肉! 「啊~ 咪即係豬肉，有咩咁特別」 —— 我之前都係咁諗，但食過一啖之後—— 「痴線! 有咩可能會咁好味ga!」 肉味濃郁，香而不臊，軟滑彈牙，我自己都食過唔同國家既名牌靚肉，但真係無一種可以同濟州島黑豚相比! 怪不得佢既售價比得上韓牛! 最後係濟州島的5個晚上，我食左3餐黑毛豬dinner……… 真係非常好味ar………. 濟州島四面環海，海鮮當然係主力啦~ 至於其他係韓國本土既美食亦大部份食得到，售價仲平得多呢~ 最恐怖係大街上既宵夜酒吧，一杯啤酒KWD3800 ~ 港幣$21.3，買嚟淋花都抵呀! 仲有埋冰杯，超有誠意! 6. 行程概要 跟住分享下我呢4日5夜既行程概要先~ Day0 : 首爾夜機飛濟州島 —— 落機食個黑毛豬然後訓訓豬~ Day1 (晴) : 攀登漢挈山 + 超平醬油蟹 —— 新手同樣可以輕鬆享受韓國最高峰的美景 Day2 (陰) : 東門市場出血 + 龍頭岩海水汗蒸幕 + 人生最好味炭火豬肉 —— 意料之外好行的本地市場，媲美日本澡堂的汗蒸幕 Day3 (晴) : 牛島單車遊 + 城山日出峰 —– 世界級的超極美麗風景 Day4 (陰): 9.81公園 + Arte Museum + 海邊咖啡街 —– 小型賽車速度與激情，正過香港的原版燈影藝術館，最後以浪漫咖啡街作結 Day5 : 早機飛返首爾 —– 但上機前食個Eggdrop多士先 機場貴好多，近40幾蚊份，但比較起香港都係平好多~ 以上係小弟今次既真實行程~ 如果大家想照copy係完全無問題的~ 不過建議將我Day1登漢挈山既行程放後少少好d 因為漢挈山起碼要行6小時以上，行完第二日隻腳一定收皮，事實上我Day2開始每一日都係梵高吶喊上身，每行一步小腿都奪命狂呼緊………. 你以為我咁set行程on居，事實我係無得揀 4日full day得Day1、Day3天晴，牛島天陰會大打折扣，城山日出峰咁岩Day1係每月唯一day off，咁唔通我落住雨行漢挈山咩…… Day1超好天 Day2陰到爆 Day3有雲下天色更美 Day4春日咖啡街，聽聞呢度睇到日落wor~ 睇到的話 漢拿山落山段，下一篇會講到咩事…… 7. 少少見聞 忍唔住要講兩句所見所聞 今次係我第二次嚟韓國，(上次行程請參考呢度)，接觸多左韓國人，開始發現佢地既待人接物文化原來都幾影響旅遊觀感 老人家打尖插隊，寒冰掌推開兩件已經係小事 最討厭係大量韓國人不輪咩年齡職業，只要一聽到你講英文就雙手交叉答No 「Where is this bus stop?」「NO」 「How much, this fish?」「NO」 「Are you very handsome?」「NO」 總之佢地聽唔明就答NO，見你外國人唔想理你就答NO，我NO你老X咩 最討厭果次係東門市場，見有檔魷魚可以新鮮劏做刺身，仲要不停有local買，我咪問下幾錢law 個阿朱媽立即黑面揮手，我用最簡單既英文單字問多兩句，佢即刻用韓文嘰呢咕嚕媽叉我唔做我生意趕我走 言語不通唔緊要，但無理由一野就西面趕我走咁過份ar? 亦因為咁，我係東門市場完全無食過海鮮 有人話 : 「韓國同大陸無分別，一樣污糟粗魯，隨地吐啖無禮貌!」 今次我可以話係真的，不過要修改一下 :「韓國同大陸無分別，一樣有熱情有禮、樂於助人既好人，但粗魯橫蠻，亂Q咁嚟既人仍然極多!」 好啦今次既濟州島出發前總篇集就暫時到呢度~ 希望幫到咁多位做出發前planning啦~ 有 咩想知多d都可以隨便IG inbox或email問我ga~ 好啦下回正式遊記開始! 第一回就寫行程重點漢挈山呀!!!!!~ https://www.google.com/maps/d/u/0/edit?mid=1srd0IpjVEDDCAv5vLjc6UU3PnVmjll8&usp=sharing ======================================= 請大家Follow我Instagram啦~ Instagram : https://www.instagram.com/fung_garcia_backpacker/ ===================================== 我既Youtube Channel已經開通啦!!!! 快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~ 鋒加西亞/旅人瘋語 Youtube Channel 主要影片 ： 【泰國】【芭堤雅】誤入邪骨!? 芭堤雅色情行業真相! 【歐洲】人有三急在歐洲怎辦? 卑鄙無恥! 歐洲免費廁所全攻略 【希臘遊記】絕美海濱! 雨傘雕塑! 寫意的希臘「塞薩洛尼基」一日漫遊! 【希臘】型爆海盜船酒吧扮魔盜王！超值60蚊一杯包遊船河！？ 白濱系列 : 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄! 【和歌山】【白浜】超高性價比溫泉酒店介紹!(上集) 最平最型，兩層複式+望海露天風呂，竟然港幣千零蚊!? 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘，勁抵住! 旅行故事系列 : 【台北】誤闖台灣三溫暖，內裡竟然係……嚇死人咩！ 【格魯吉亞】最慘的4小時! 格魯吉亞地獄小巴之旅! 【波蘭】在納粹集中營，我竟聽到了……一世難忘的恐怖回憶! 【台灣】我在台北拾屍的經驗︱美女強吻? 艷福無邊? 浪漫奇遇? (新片呀!!!!!!!!!) ================================= 相關篇章 : 富士山攻頂 : 《【帶著爸爸行富士山】 – 系列》 富山、石川、琵琶湖 : 《【北陸之行】 – 系列》 和歌山、白浜 ： 《【紀伊半島】 – 系列》 東京雜記 ： 《3 -池袋的災害體驗》 《4 – 日本第一炸豬扒》 《5 – 那夜凌晨，我坐上了東京開往大阪的巴士》 《6 – 蠔大大小店，性價比超掂》 日本美食系列 ： 《1 – 東京壽司「梅丘壽司之美登利」如何抵食?》 《2 – 大阪隱世超平炸串》 京都紅葉系列 ： 《1 – 京都紅葉隧道此生必去︱貴船神社、琉璃光院︱叡山電車紅葉路線介紹》 《2 – 京都天龍寺巨型紅葉樹》 《3 - 京都北野天滿宮 – 紅葉之海洋》 ================================ Email : funggarcia@gmail.com www.facebook.com/Garcia.in.Germany 文章同時刊於以下平台，請各位多多支持呀!!!!!!!!!!!!! UBlog DC Fever Travel Blogspot 遊牧爆谷 Medium
