深涌大草原,未去過都聽過啦 一直以來我睇網上圖片都唔覺得有咩咁吸引,咪一大塊草地加條水咁law,如果外國朋友見到,實會話「我英國屋企門口都有塊草地,妳要唔要嚟打卡?」 鬼叫香港地方太細平地太少咩,就算有,過得幾年都草地變禿地啦,妳睇下塔門! That’s why深涌呢塊佔地廣闊又keep得綠油油既大草原咁鬼矜貴啦! 不過我去完後就發現,大草原唔係唔吸引,而係前往深涌的道路反而比終點更具吸引力~ 不但風景優美,更係一條99.9%平坦道路,連輪椅人士都可以完成全程的無障礙郊遊路線! 好啦~ 廢話少講,介紹下先! ==================================== 開始之前,請大家Follow我Instagram啦~ Thank you! Instagram : https://www.instagram.com/fung_garcia_backpacker/ ===================================== 文章概要: 前往交通 企嶺下海堤壩 榕樹澳 紅樹林海邊步道 + 來記士多 深涌灣渡輪碼頭 深涌大草原 回程方法 注意事項 1. 前往交通 去深涌? 坐船咪得law! 在大學站行去馬料水碼頭,乘坐—->塔門—>黃石碼頭的船第一站就係深涌,星期六日及公眾假期一日會有3班船,落船行唔夠5分鐘已到深涌大草原~ 詳情可以參考以下運輸署網址~ https://www.td.gov.hk/tc/transport_in_hong_kong/public_transport/ferries/kaito_services_map/service_details/index.html#k04 不過一野去到終點好悶je~ 除非妳既目的係齋去草地飄零燕,否則都係慢慢行去開心d~ 同上次去泥涌一樣,於屯馬線總站烏溪沙站坐99號巴士往西貢,今次坐遠多幾個站於「水浪窩」落車就ok~ 講開又講,細個小學旅行時總會去一次水浪窩,但對此地真係一d印象都無! ++++++++++++++++++++++++++++++++ 相關文章 : 【香港郊遊15】西貢泥涌︱大海、夕陽與天空之鏡 ++++++++++++++++++++++++++++++++ 落車行前幾步,見到有馬路轉左落斜,就係佢啦~ 的士呢個位轉左落去,就係下圖既樣了~ 此路慢慢落斜非常輕鬆鄧梓峰,好運的話仲有幾條芒草比妳影下相tim~ 不過嚴格嚟講呢條係馬路嚟,雖然無咩車出入,但我諗大家都唔想變保齡球樽ga~ 小心d啦~ 當時仲有少量芒草睇下~ 唔使轉左,繼續直行ok的~ 2. 企嶺下海堤壩 行約20分鐘,就可以看見企嶺下海堤壩~ 但如果想走到堤壩之上就無咁簡單了 你要目測到附近時,找路上一個不算非常顯眼的下坡入口,而且此路非常斜+冼腳,有少少危險,著平底鞋既朋友真係唔太建議落去 一定要小心!落唔到唔好勉強! 不過呢條企嶺下海的堤壩風景真係唔錯~ 或者咁講,條條堤壩既風景都唔錯ga啦~ 應該每個人都會鍾意站在海中心被海洋包圍的感覺~ 除非你自己有隻遊艇日日出海出到悶啦~ 而我真係IG見過有人寫「香港度度都咁逼,點解d人唔買隻艇出海玩下wor~」 何不食肉糜 點擊圖片放大 +2 3. 榕樹澳 回到大路繼續向前行,無幾耐就見到下圖呢一堆魚排~ 似乎可以打電話叫人嚟接我地去魚排上釣魚打牌的,不過我未試過~ 有興趣既朋友可以一試,不過嚟到西貢再要行半個幾鐘先來到,件事個性價比好似好低wor…… 點擊圖片放大 再行前多少少有個香港郊外standard得非常緊要既涼亭~ 重點係旁邊有少少紅葉呀~ 今年天氣唔凍,有呢幾塊算係咁啦~ 點擊圖片放大 一直平路行左約個半鐘,便會來到第一個check point榕樹澳村~ 一入村我第一樣諗既野就係——-痴線呢度僻到咁點返工呀?? 的士—-無! 小巴—-無! 仲問屋企人借左無線電話tim! what!? 連渣車都遠到嘔,如果我返中環,係咪每日要浪費四個鐘來回屋企呀?? 不過呢d都唔係我concern既問題啦~ 榕樹澳村對我地呢d郊遊人士嚟講——– 洗手間—-有! 士多—-有! 仲可以坐底食個餐蛋麵tim! 不過我掂行掂過無stop過,按村內指示牌繼續向深涌前進~ 點擊圖片放大 4. 紅樹林海邊步道 + 來記士多 行多10分鐘會有另一返唔同景色~ Wa~~~~~~ 又係紅樹林呀!!!!!! …… Ee點解我用「又」ge? 因為呢條紅樹林海邊步道,同之前小弟介紹過的「鹿頸谷埔」路線非常相似~ 同樣係邊看海看太陽西下邊散步~ 差別只有於鹿頸谷埔係望對面係深圳灣,呢邊係望大埔吐露港海灣~ ++++++++++++++++++++++++++++++++ 相關文章 : 【香港郊遊9】粉嶺鹿頸至谷埔︱夕陽下的隱世蘆葦田 ++++++++++++++++++++++++++++++++ 如果真係肚餓的話,再向前行多陣會見到略有名氣的「來記士多」~ 聽聞佢的餸菜都幾有名,但我無乜興趣行到熱辣辣來食炒芥蘭,加上價格比茶記小菜更貴 Um,都係凍飲岩我多d~ 5. 深涌灣渡輪碼頭 離開來記士多繼續沿海邊步道前行,會有一個地方有兩級樓梯,真係兩級only! That’s why呢條路係99.9%平路而唔係100%就係咁解了~ 不過輪椅朋友係有同伴同行既情況下應該無問題的~ 我直情覺得係呢條路踩單車都得呀! 當然啦會唔會比行山友打係另一回事啦~ 點擊圖片放大 由來記士多行約20分鐘,終於來到深涌灣渡輪碼頭了! 如上文所述,如果坐船的話就在這裡落船了~ 我到步時4點半,呢個時間前後都唔會有船,渡輪碼頭立即變成寧靜無人free到暈的打卡影相勝地~ Free到想除哂d衫裸跑呀Yeah~~ 點擊圖片放大 +2 當然我唔會做d咁既傻事啦~ 但chok相是少不了的~ 再向前行多少少,加埋個太陽睇碼頭又係另一個feel~ 有啤酒的話,我可以係度坐一日~ 點擊圖片放大 6. 深涌大草原 由碼頭向前再行多5分鐘,終於來到今次行程既目的地「深涌大草原」了! 點擊圖片放大 深涌大草原被河道劃分為多個區域,最多人流連的應該係深涌農莊前兩大塊空地了 講真ar,放風箏、野餐、紮營、釣魚既人真係唔少,但點都少過日日都係年宵level既西九海濱呀 再講真呀,呢度草又長又粗,周圍牛屎又多,太陽又會勁早比山遮住(11月尾4點9左右已收皮),真係唔算特別好wor! 之不過,小橋流水人家的閑適情懷,正是香港人欠缺的~ 來草原不是打卡,而是給自己一個自在寫意的空間去放鬆生活上的束縛 所以我真係會諗………..係度攪天體營有無得諗呢?? 點擊圖片放大 +3 7. 回程方法 冬天時候5點半的深涌草原已開始天黑,係時候走ga啦~ 唔係wor我想懶死! 得~ 慢慢與蟲共舞啦~ 同埋尾班船6點鐘呀~ 錯過的話自己call大飛出馬料水or原路行返水浪窩啦~ 點擊圖片放大 +3 以上~ 就係深涌大草原路線了~ 整體風景唔算超級特別,亦欠缺令你靚到「嘩!」一聲的美景,但卻有一種自在輕鬆的感覺~ 完全無壓力~ 適合全年齡及所有人士輕鬆hea行~ 值得推薦~ 最後又係例牌的—– 8. 注意事項~ 成條路話長唔長,話短唔短,我超慢行,又影相又飲野,全程都用左約3小時先到深涌大草原,齋行都應該要兩小時,如果想係深涌大草原玩耐d,記得要提早出門ar~ 出馬料水的尾班船於星期六日會超級勁多人,好多朋友會早一粒鐘去碼頭霸定位驚上唔到船。不過我既經驗係隻船吉住開嚟+超級大,我排隊尾都上到,無問題的~ 影多兩張黃昏相好過啦~ 萬一真係無船或者想快d返去,碼頭有電話call快艇接走的~ 不過價錢唔知~ 深涌大草原係唔比人露營過夜的,請注意~ 唔好留下任何垃圾,記得囉走呀~ (本篇出遊時間為2021年11月尾,現時疫情嚴重,大家儘量忍多陣,save定呢篇等好d先去玩啦~) ==================================== 請大家Follow我Instagram啦~ Instagram : https://www.instagram.com/fung_garcia_backpacker/ ===================================== 我既Youtube Channel已經開通啦!!!! 快d Click入 「鋒加西亞 / 旅人瘋語」Subscribe 睇片再比個Like禁個鐘仔啦!~ 鋒加西亞/旅人瘋語 Youtube Channel 主要影片 : 【泰國】【芭堤雅】誤入邪骨!? 芭堤雅色情行業真相! 【歐洲】人有三急在歐洲怎辦? 卑鄙無恥! 歐洲免費廁所全攻略 【希臘遊記】絕美海濱! 雨傘雕塑! 寫意的希臘「塞薩洛尼基」一日漫遊! 【希臘】型爆海盜船酒吧扮魔盜王!超值60蚊一杯包遊船河!? 白濱系列 : 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄! 【和歌山】【白浜】超高性價比溫泉酒店介紹!(上集) 最平最型,兩層複式+望海露天風呂,竟然港幣千零蚊!? 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘,勁抵住! 旅行故事系列 : 【台北】誤闖台灣三溫暖,內裡竟然係……嚇死人咩! 【格魯吉亞】最慘的4小時! 格魯吉亞地獄小巴之旅! 【波蘭】在納粹集中營,我竟聽到了……一世難忘的恐怖回憶! ================================= 相關篇章 : 香港郊遊系列 1小時內攪掂 : 《005 – 沙田行去慈雲山,原來超級簡單》 《006 – 大埔三門仔,零難度的全海景輕遠足》 《009 – 粉嶺鹿頸至谷埔︱夕陽下的隱世蘆葦田》 《011 – 大美督家樂徑︱4大隱世絕美風景》 《013 – 長洲小長城︱驚喜十足的奇岩怪石小徑》 《014 – 紅香爐峰10分鐘極速攻頂︱維港日落全景最佳選擇》 《015 – 西貢泥涌︱大海、夕陽與天空之鏡》 《016 – 長洲行山︱北晀亭輕鬆看長洲全景》 2至3小時行完: 《003 – 香港仔自然教育徑》 《007 – 西貢大灘郊遊徑,長者行山無問題》 《008 – 飛鵝山芒草之行》 《010 – 青衣自然徑︱馬灣海峽+青馬大橋無敵日落美景》 行完會攰: 《001 – 夜登鳳凰山︱我得罪了日出之神》 《004 – 赤徑與鹹田灣,宛如沙巴的美麗海灣》 《012 – 上窰郊遊徑+曝罟灣堤圍︱超強打卡+輕鬆行山首選》 《002 – 簡單快速+靚景,龍蝦灣郊遊徑》 發掘香港系列 城市偷閒系: 《1 – 香港Staycation首選,皇家太平洋酒店住後心得》 《2 – 城市步行︱鯉魚門的絕美日落》 《5 – 訊號山花園︱尖沙咀鬧市中的秘密綠洲》 《13 – 銅鑼灣避風塘堤壩︱維港海中心看夕陽︱鬧市的避世角落》 影相打卡系 : 《2.5 – 鯉魚門石礦場︱夕陽下的芒草群》 《3 – 己連拿利︱港島攝影秘景,宛如荒涼未來的異世界》 《6 – 石峽尾公園粉色牆壁︱網紅火熱打卡點實測》 《8 – 歌連臣角炮台打卡位︱網紅不會告訴妳的兩三事》 《10 – 白樓「機場核心計劃展覽中心」︱夏天影相一流地點》 《11 – 孫中山紀念館︱Mirror教主MV拍攝場地,真係值得去打卡?》 《15 – 青衣西草灣︱青馬大橋日落+驚喜蘆葦群》 美食推薦系: 《4 – 香港的希臘小店,味覺的新衝擊》 《7 – 石峽尾一日遊︱美食推薦+文青打卡位懶人包》 《9 – 愛文生大排檔︱性價比超高的街邊豪氣滋味》 《12 – 上環紅葉餐廳︱9 蚊生蠔性價比超高!》 《14 – 銅鑼灣鐵板燒小店︱日本水準的大阪燒》 =============================== Email : funggarcia@gmail.com www.facebook.com/Garcia.in.Germany https://mewe.com/p/fung_garcia_backpacker 文章同時刊於以下平台,請各位多多支持呀!!!!!!!!!!!!! UBlog DC Fever Travel Blogspot 遊牧爆谷 Medium