開始之前,想拜託大家Follow下我Youtube同Instagram! 因為人數真係好少....... 如果有大家支持,我會更加有動力寫落去ga! 多謝!!!!! =========================== 幾年前話去歌連臣角,十個有九個人會問「你去拜山定探監呀?」 今時今日話去歌連臣角,十個有九個人會話「去炮台遺址影相? 正呀!」 疫情開始後,呢個唔算出名亦非常山旮旯既冷門地點,突然變身成網紅打卡熱點 又的確 「歌連臣角炮台遺址」係一個風景非常優美,亦頗有特色的影相地點,我自己去到都篤唔停個電話相機,返嚟揀相揀到頭痛 然而地方係好,卻有好多奇怪伏位從來無人會講你知! 我鋒加西亞出名嘴賤,就多口評論下網紅打卡熱點「歌連臣角炮台」有咩地方最好小心d啦~ +++++++++++++++++++++++++ 延伸閱讀 : 【和歌山】【白浜】七大溫泉評價! 【和歌山】【白浜】超高性價比溫泉旅館評價! (上集) (下集) 【發掘香港7】石峽尾一日遊︱美食推薦+文青打卡位懶人包 【香港郊遊14】紅香爐峰10分鐘極速攻頂︱維港日落全景最佳選擇 +++++++++++++++++++++++++ 內容概要: 交通---- 非常不便! 樓梯---- 好斜呀! 影相位---- 排隊睇街症? 地勢---- 有d危 離開方法---- 小心野豬! 注意事項 交通---- 非常不便! 「歌連臣角炮台遺址」位於港島最東邊近小西灣 一般網上文章都會叫妳去柴灣地鐵站坐小巴18M,但原來呢架車一日只有3班! 上圖攝於2021年1月,可見一日只有上午8時正、中午12半、下晝16:45 total 3架車,仲疏過日本d山區巴士 有部份資料話15:00會有一架車,但我問過小巴站長,呢個班次已取消多時 大家可以想像到我趕頭趕命係14:57前衝線達陣,但發現中伏無料到時果種想反枱既衝動嗎??? 另一個前往方法係步行,主要分兩條路: 第一條路係由柴灣出發,經環翠村上柴灣華人永遠墳場,再沿歌連臣角道行餐死 需時約1個鐘,而且沿路狹窄+要避私家車,唔太建議 第二條路係由小西灣藍灣半島出發,沿龍躍徑接歌連臣角道,需時約45分鐘 上斜平路為主,但風景欠奉有d悶,仲無遮蔭超曬 由此可見,以上每一個方法都非常唔方便! 特別而家夏天更加曬燶左都未行到! 所以我既建議-------都係的士啦......... 由柴灣地鐵站直到炮台入口都係$50之內,兩三個人share算ok! 樓梯---- 好斜呀! 講真入口唔算難搵,只係欄杆有d高有d難"禽",對女士嚟講may be有d d難度 不過真正既難度應該係行落去同上返嚟果陣! 欄杆後的入口非常斜而且係沙地,普通波鞋or converse都會冼到癲,高跟鞋更加要有碌落山既心理準備 不過高手在民間,有人著高跟鞋都跑得快過恐龍,上落山呢d小菜一碟啦~ (認住呢棵樹) (呢個位真係冼到嘔) (不過好快就平路了) (最強高踭鞋高手) 另一難題係----------好鬼多樓梯級呀!!!!!!!! 落既時候已經有種「點解行極都仲有ge?」既感覺,膝頭唔好既千其唔好嚟! 當落到炮台遺址,再望返上去 ----------- ee呢條咪天梯??? 係咪上到天堂ga?????? 除左消防員,我覺得唔會有人行完呢條樓梯唔變死魚 我周圍都聽到有人話「喂呀唔想行返上去呀.......」 不過平心而論,係呢條囉命樓梯度望到的風景係好靚的~ (呢度係行剩1/4,你就知條樓梯有幾天梯啦.......) 影相位---- 排隊睇街症? 呢個我先覺得係最大既伏位-------- 點可能會咁多人ga!!!! 我影相當日係星期日,炮台四周閒閒地都有百幾二百人 唔少外國人及國際學校學生經此地去攀岩,而排隊走入炮台遺址影相的,除本地情侶外,仲有超多親子家庭,我幾乎以為去左海洋公園! 當我見到咁多人排隊,諗住避一避影左周圍轉頭先 一個鐘後,我知錯了............. (一個鐘後,人多左一倍.......) 排隊既人多左一倍呀!!!!! 原本我係想放棄走人的,但咁遠嚟到,唔影張signature相又好似好浪費,等於去日本都唔可能唔食壽司啦 再望望果條天梯,即刻咩離開既動力都無哂,死死地氣排隊啦........ +++++++++++++++++++++++++ 延伸閱讀 : 【日本美食1】東京壽司「梅丘壽司之美登利」如何抵食? +++++++++++++++++++++++++ (個個影相既姿態都一樣ga la~) 講到排隊,香港人呢方面又真係好守秩序,一有人想打尖即刻就小,好齊心! 抵讚ge! 但亦僅此而已,過左海就神仙,入到炮台遺址影相的人簡直毫無公德心可言 現場口耳相傳不明文規定 ------ 「每個團體影5分鐘」,但幾乎無人遵守 女生除剩bar top影相放IG打卡合理,但死霸住影成15分鐘,仲要都係果d姿勢,妳扮銅像呀? 同埋,個男人唔影ge??? 岩岩又抱又咀果個係男友定龍友ar??? 更過份的係d港媽家庭s ------- 幾個家庭一齊入,影相方法係小朋友A一張B一張C一張D一張,之後AB、BC、CD、AC、AD、BD,之後ABC、BCD、ACD、ABD、BCD,影埋ABCD後,將以上組合加埋4個成年人再走兩轉,再call埋唔知邊度出現的小朋友E、F重覆一次,請計算出Iphone內可以出現的組合數量。(10分) Shit當年F.7既統計學原來係咁用ge!!! 後面成村人,竟然可以霸成廿分鐘,呢個咁單一既場景,水禾田都無影咁耐啦! 神奇的是明明天怒人怨,但從來無人會媽叉佢地,到自己時繼續無視後方排隊的人龍,想影幾耐就影幾耐,好自由~ 究竟係咁岩我當日遇上的人太自私,定我先係奇怪果個呢? 至於我,真係好守規矩咁等左個幾鐘,入去影左唔夠5分鐘 萬幸到我時天仍未黑,仲有少少廢墟感,d相係靚ge滿意ge~ 但如果唔使排咁耐隊會開心好多law! (用唔同效果嚟執相,其實都幾有趣~) 地勢---- 有d危 其實就算唔入炮台內部,周圍的風景依然美不勝收~ 天氣好果陣,求其企一個位都係打卡位~ 甚至嚟野餐or睇日出都係一個好選擇~ 不過此地為懸崖,除左叉錯腳,更要小心大風吹你落海,Wilson都救你唔到呀 (真係好多人嚟玩攀岩) (以外國人及國際學校ABC多) 略為注意此地背山向東,即係4-5點太陽已被身後高山遮住 想要係陽光照射下影靚d,最好早d到~ (呢張係炮台頂,都係一個唔錯既影相位~) (四周既風景都一流,唔一定需要入去炮台內ar~) (如果帶齊野係度野餐都係賞心樂事~) 離開方法---- 小心野豬 雖然唔想行天梯,但始終都係要走 離開時建議行上文講既龍躍徑落小西灣,應該係最近亦最易去到有公共交通工具的地方~ 呢次會係斜路落山為主,好輕鬆的放心啦~ 落到小西灣仲可以順便行埋Donki tim! 不過要注意呢條路上野豬都唔少,甚至突然出現一家7口由山上衝落嚟,除非妳想clam保險訓醫院,否則千其唔好惹佢地呀! (野豬示意圖) (落返小西灣海濱花園啦~) 以上就係歌連臣角炮台既所見所聞~ 例牌都有幾點kindly remind ge~ 懸崖邊係靚,但當地超級大風,唔好太近邊位,小心變空中飛人! 雖然 歌連臣角炮台向東可睇日出,但夜晚沿路完全無燈+大風超危險,要咁做的最好小心d 記得帶走自己的垃圾,仲要唔好塗鴉呀 好啦今次講到呢度,下回再同大家講下香港有乜郊遊啦~ =========================== 請大家FOLLOW我INSTAGRAM啦~ Instagram : https://www.instagram.com/fung_garcia_backpacker/ ===================================== 我既YOUTUBE CHANNEL正式開通啦!!!! 新影片已upload,快d Click入 「鋒加西亞 / 旅人瘋語」Subscribe 睇片再禁個like啦!~ 主要影片 : 泰國芭堤雅誤入邪骨!? 芭堤雅色情行業真相! 人有三急在歐洲怎辦? 卑鄙無恥! 歐洲免費廁所全攻略 【希臘遊記】絕美海濱! 雨傘雕塑! 寫意的希臘「塞薩洛尼基」一日漫遊! 【希臘】型爆海盜船酒吧扮魔盜王!超值60蚊一杯包遊船河!? 白濱系列 : 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄! 【和歌山】【白浜】超高性價比溫泉酒店介紹!(上集) 最平最型,兩層複式+望海露天風呂,竟然港幣千零蚊!? 【白浜】【和歌山】超高性價比溫泉酒店介紹!(下集) 「白浜館」好味到難以置信的一泊二食︱房內優雅露天溫泉+市中心對正沙灘,勁抵住! ================================= 相關篇章 : 香港郊遊系列 1小時內攪掂 : 《005 - 沙田行去慈雲山,原來超級簡單》 《006 - 大埔三門仔,零難度的全海景輕遠足》 《009 - 粉嶺鹿頸至谷埔︱夕陽下的隱世蘆葦田》 《011 - 大美督家樂徑︱4大隱世絕美風景》 《013 - 長洲小長城︱驚喜十足的奇岩怪石小徑》 《014 - 紅香爐峰10分鐘極速攻頂︱維港日落全景最佳選擇》 2至3小時行完: 《003 - 香港仔自然教育徑》 《007 - 西貢大灘郊遊徑,長者行山無問題》 《008 - 飛鵝山芒草之行》 《010 - 青衣自然徑︱馬灣海峽+青馬大橋無敵日落美景》 行完會攰: 《001 - 夜登鳳凰山︱我得罪了日出之神》 《004 - 赤徑與鹹田灣,宛如沙巴的美麗海灣》 《012 - 上窰郊遊徑+曝罟灣堤圍︱超強打卡+輕鬆行山首選》 《002 - 簡單快速+靚景,龍蝦灣郊遊徑》 發掘香港系列 城市偷閒系: 《1 - 香港Staycation首選,皇家太平洋酒店住後心得》 《2 - 城市步行︱鯉魚門的絕美日落》 《5 - 訊號山花園︱尖沙咀鬧市中的秘密綠洲》 影相打卡系 : 《2.5 - 鯉魚門石礦場︱夕陽下的芒草群》 《3 - 己連拿利︱港島攝影秘景,宛如荒涼未來的異世界》 《6 - 石峽尾公園粉色牆壁︱網紅火熱打卡點實測》 美食推薦系: 《4 - 香港的希臘小店,味覺的新衝擊》 《7 - 石峽尾一日遊︱美食推薦+文青打卡位懶人包》 =============================== Email : funggarcia@gmail.com www.facebook.com/Garcia.in.Germany https://mewe.com/p/fung_garcia_backpacker 文章同時刊於以下平台,請各位多多支持呀!!!!!!!!!!!!! UBlog DC Fever Travel Blogspot 遊牧爆谷 Medium