「長洲? 咪糯米糍、篤魚蛋，兼去東堤試膽law!」 大鄉里的我，係香港活左30幾年，就嚟到不惑之年，先知長洲有唔少非常不俗的行山徑! 而我今次行完的短途路線「長洲小長城」，除左易行兼風景優美，更有大量奇石打卡! 長洲既精髓，原來係郊外山野呀!!!! ++++++++++++++++++++++++++ 延伸閱讀 : 《【發掘香港5】訊號山花園︱尖沙咀鬧市中的秘密綠洲》 《【和歌山】【白浜】白浜七大溫泉評價！》 ++++++++++++++++++++++++++ 文章概要 : 起點 -- 觀音灣泳灘 小長城 花坪石 其他石 額外行程 ------ 南氹灣 行完山抖一抖 起點 -- 觀音灣泳灘 不論係小輪、遊艇、洗頭艇定游水，總之用自己的方法到達長洲碼頭後，直穿過「東灣路」，到達就算封左泳灘仲係好乜多人的東灣海灘 望住個海向右行，到達觀音灣後會見到有條路上山至「觀音古廟」，就係佢啦~ 但如果好似我咁食完野先出發，又白痴地行錯路，係可以大熱天時烈日當空下穿過無咩風的民居內街，沿「關公忠義亭」旁的觀音廟路進入的~ 未見官先打三十，未正式行已經衣衫盡濕.......... 小長城 觀音廟旁的分歧路向前行，就正式進入「小長城」路徑了~ 呢道會有小長城的路線圖，清楚指示呢條路可以睇到d咩奇岩怪石~ 起行啦! 一開始會係一段約5分鐘的樓梯~ 30幾度下+戴住口罩都有少少chur，嚟得行山就預左ga la，上啦! if真係行到喘氣就抖一抖啦，係高處俯視的觀音灣及東灣好靚呀!! 咁睇東灣+觀音灣又真係幾唔錯~ 終於來到小長城啦! 「下.........個名玩到咁大，原來只係一堆沙田中央公園可見的石柱型欄杆ja???」 又好似mean得滯........ 外國咪又係幾棵樹起間屋就係乜乜小京都、物物小瑞士........ 平心而論，識得就角度的話，呢個小長城某d位都影得過的~ 小長城路段的盡頭是觀景亭交匯點，多數人都會係度休息一陣 行左廿分鐘就要抖!? 有無咁虧ar????? 鬼咩........ 我行果日30幾度，下晝2點幾太陽當頭直射落嚟，仲要戴住口罩，死都蛇啦........ 至於觀景亭左旁有條路可以行到落觀景台，但我落左一段樓梯後發現頗有距離 為左唔想一陣又行返咁多樓梯上嚟--------對唔住我淆底! 花坪石 休息夠，由觀景亭右方樓梯向下行繼續行程~ 行多幾步已經望到小長城的招牌「花坪石」及「叮噹石」~ 我非常想知道究竟係邊個盲佬幫d石改名的，根本一d都唔似!!!!!! 仲要有粉腸慌死你唔知，大大隻字噴左係度，乾隆提字都無咁大隻啦!!!! 之不過煞風景還煞風景 藍天之下的海岸線，配上形象特異的嶙峋怪石，的確係足以令人駐足細賞的超一流風景! 然而花坪石原來唔止係遠處影相咁簡單! 原本我只係想試下攀唔攀到上花坪石旁影相，誰不知花坪石下，竟然有天然石隙走道!! 走道仍然乾淨少塗鴉，上下左右均被岩石包圍，後方夾縫卻可見蔚藍汪洋，海風徐徐吹來.......咪就係另一個石天窗! 實在係非常超勁好的影相位呀! 由細到大來長洲不下數十次，點解會而家先發現d咁正既地方!? 至於本應係戲玉的花坪石，就未必個個上到了 因為要輕度攀石一兩下，亦略有危險性(特別大風的時候)，對有行開山既朋友當然係小菜一碟，但的確唔係普通女仔咁易上到去的地方 花坪石旁看過去的風景係不錯~ 但都同之前見既差不多，無需要增加風險呀~ 至於花坪石旁的叮噹石，同樣可以行過去的~ 不過要遊繩一段落斜坡，我望到覺得麻煩，無理佢lu~ 其他石ssssssss 繼續行小長城~ 一路上繼續有石欄杆及唔少奇形怪石，不過大多數都只可遠觀，同埋真係唔係咁似...... 不過邊行邊吐槽佢有幾唔似都係樂趣嚟ge~ 行到十字路口可以先向左下行，近距離玩埋「人頭石」和「骷髏頭」先~ 真係......... 究竟「似」果個點係邊呢........ 改名d人咁好想像力ge...... 上返十字路口，沿返主路線前行數分鐘，就可以到達小長城的終點「玉璽石」~ 這舊獨懸於崖邊的巨石其實亦頗值得欣賞~ 不過同之前一樣，佢比人大大隻字寫左「玉璽」係度 大佬呀，你有無見過有靚女會著住件寫住中文字「靚女」既衫出街呀? 假如姜B紋自己個名係背脊都瞬間變柒頭啦! 塗鴉果個破壞公物都算啦，可唔可以有返d美感ar????? 額外行程 ------ 南氹灣 小長城的行程就到呢度~ 只要由玉璽石沿路返十字路口向山上行就可以離開小長城~ 不過我當日唔夠喉，見時間尚早，於是沿思高路一直行到長洲南端的「南氹灣」~ 南氹灣一般都無咩旅客甚至香港人會到 無他ge，呢個海灣垃圾又多，沙粒又粗，邊及東灣咁舒服~ 但我卻覺得南氹灣的亂石海岸地貌甚有特色~ 天后廟前的望海大空地更是影相一流既地點~ 南氹灣，我無嚟錯! (識得坐係個最佳位置看海，外國人比我地更識嘆呢~) 行完山抖一抖 行到差不多，係時候走啦~ 只要沿天后廟邊的路上返南氹灣路入長洲家樂徑，就可以去返關公忠義祠果邊入市中心~ 原本想搵間靚既海景酒吧happy hour，但發現長洲仍然係無呢樣野，其他酒吧亦貴到SOHO一樣 都係買支啤酒坐係碼頭旁邊，睇住日落慢慢嘆啦~ 好啦今次的長洲遊記就係咁多~ 小長城如果齋行唔影相，行畢全程真係半個鐘攪得掂! 不過條路既精髓絕對在於花坪石，無理由唔花時間去行下影下相ga~ 長洲應該仲有好多事物，等下次平日放假我再去發掘下先~ 梗係平日啦........公眾假期多人過銅鑼灣ar........ 最後有三點需要注意 : 小長城沿路遮蓋不多，特別各奇石位置都係直曬到頭崩額裂，一定要注意補充水份避免中暑 ! 花坪石石隙走道狹窄，若多人行走時要非常小心! 千其唔好係走道扔垃圾、塗鴉以及大小二便! 見到有人咁做ge，砌佢啦!!!! =========================== 請大家FOLLOW我INSTAGRAM啦~ Instagram : https://www.instagram.com/fung_garcia_backpacker/ ===================================== 我既YOUTUBE CHANNEL正式開通啦!!!! 新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~ 主要影片 ： 泰國芭堤雅誤入邪骨!? 芭堤雅色情行業真相! 人有三急在歐洲怎辦? 卑鄙無恥! 歐洲免費廁所全攻略 【希臘遊記】絕美海濱! 雨傘雕塑! 寫意的希臘「塞薩洛尼基」一日漫遊! 【希臘】型爆海盜船酒吧扮魔盜王！超值60蚊一杯包遊船河！？ 【和歌山】【白浜】白浜七大溫泉評價! 熱到烚腸仔? hea到似街市? 浸哪個好一一盡錄! ================================= 相關篇章 : 香港郊遊 《004 - 赤徑與鹹田灣，宛如沙巴的美麗海灣》 《005 - 沙田行去慈雲山，原來超級簡單》 《006 - 大埔三門仔，零難度的全海景輕遠足》 《007 - 西貢大灘郊遊徑，長者行山無問題》 《008 - 飛鵝山芒草之行》 《009 - 粉嶺鹿頸至谷埔︱夕陽下的隱世蘆葦田》 《010 - 青衣自然徑︱馬灣海峽+青馬大橋無敵日落美景》 《011 - 大美督家樂徑︱4大隱世絕美風景》 《012 - 上窰郊遊徑+曝罟灣堤圍︱超強打卡+輕鬆行山首選》 發掘香港 《1 - 香港Staycation首選，皇家太平洋酒店住後心得》 《2 - 城市步行︱鯉魚門的絕美日落》 《2.5 - 鯉魚門石礦場︱夕陽下的芒草群》 《3 - 己連拿利︱港島攝影秘景，宛如荒涼未來的異世界》 《4 - 香港的希臘小店，味覺的新衝擊》 《5 - 訊號山花園︱尖沙咀鬧市中的秘密綠洲》 =============================== Email : funggarcia@gmail.com www.facebook.com/Garcia.in.Germany https://mewe.com/p/fung_garcia_backpacker 文章同時刊於以下平台，請各位多多支持呀!!!!!!!!!!!!! UBlog DC Fever Travel Blogspot 遊牧爆谷 Medium
