對希臘既印象，相信好多香港人都係純白小屋、蔚藍海岸、愛琴海日落…….. 食物? 唔係得yogurt同kebab咩????? 但去過既朋友都一定知道 ------- 希臘菜係超級好味ga!!!!!!! 可惜香港既希臘餐廳不多，打開openrice search「希臘菜」，落筆之時發現只剩底三間，其中兩間係同一個brand賣埋普通西餐 最後既呢間-------------- ARTEMIS AND APOLLO，我試完之後，不論食物種類、味道、環境、氣氛等等全都超有驚喜! 所以我就算無收錢都不得不寫呢間餐廳出嚟 (我都好想咁樣賣廣告有錢收……….)支持下我鍾意既小店啦!!! =================================== 延伸閱讀 : 【希臘快閃3】塞薩洛尼基Thessaloniki美食巡禮 =================================== 位置 Artemis and Apollo位於灣仔較為偏僻的月街 最近有人稱日月星三街為新SOHO，我無咩研究，但只知果邊真係開左好多好有格調個性的新餐廳~ Even係咁，Artemis and Apollo既門面亦好難唔令人留下深刻印象 兩座純白光滑牌坊咁既招牌，大玻璃能完全透視室內，兩間打通的店舖中間卻夾著大廈的精緻大門 雖然形式上係同深水埗兩間雜貨店中間夾棟霓虹光管大廈一樣，但係呢個新SOHO蒲點，此店卻顯得獨特而典雅~ 餐廳環境 內部裝修亦維持希臘一貫的純白清爽風格~ 可是暗綠色的靠牆梳化、微黃的燈火、精巧的小吧枱，卻為這小店掃上一抹溫馨暖意~ 店內亦不時輕聲播放聽不懂的希臘歌曲 (斷估唔係播緊非洲民歌掛……….) 使氣氛更加和諧舒適，浪漫醉人~ 氣氛係醉唔哂的~ 飲酒啦! Wine list的分類不是國家，竟然係希臘不同的地區! 又岩wor，要飲法國紅酒去馬莎買啦! 不過知道希臘有咩地區已經十分了不起啦，要知道邊個區既葡萄酒有咩特式真係背哂成套「神之水滴」都唔會識! 當然可以叫友善親切既靚仔老闆幫妳介紹啦~ 不過我之前寫過北馬其頓既Blog，佢又同希臘有d關係，就一於揀Macedonia地區既白酒啦~ 味道又唔錯wor!!!! =================================== 延伸閱讀 : 【北馬其頓速遊1】旅遊資料大全集 =================================== 如果係同情人嚟食生日飯ge，我勸大家都係早一日刨定個menu先 因為全店菜式雖少，menu所寫加埋都不過廿零款，但係全用希臘文寫ga~~~~~~~~~ 睇得明話你勁~ 求其點d野? 唔係唔得~ 有冒險精神係好~ 但冒險埋你段感情就唔係幾好啦~ 有幾多女士係生日飯見到有5碟沙律放係枱面會唔嬲呢~ 早一日google translate定做功課啦!!! 勁多字要google translate 食左咩先~~~~~ 講左咁耐，入正題啦! 我只能夠講，even我係德國食過幾次希臘菜，去到希臘時都大吃特吃唔少古怪菜式，但呢間小店的菜肴我仍然可以用「驚艷」嚟形容!! Tzatziki & Pita 首先上場的係希臘最著名的頭盤Tzatziki Tzatziki係一種用蒜蓉、青瓜、希臘式乳酪、橄欖油等混合而成的醬料，主要係沾麵包食 味道清爽之餘同時非常濃郁! 幾乎係食希臘菜必然的Appetizer! 係希臘有d餐廳會免費供應Tzatziki，有d就要收費約4歐 所以呢度都算合理價格啦~ 至於希臘常見麵包Pita我開頭都無話特別想叫，之不過係當Tzatziki的配菜 誰不知竟然熱辣辣、勁鬆軟! 少少煙煙韌韌咁勁好味! Grill Cheese “Saganaki Platanos” Saganaki係希臘文指鐵板燒，所以個芝士係用鐵板炸炸聲咁上， waiter特別提醒要立即熱食 芝士周圍滾住既咩嚟ga ------- 西梅醬??? 夾唔夾ga喂????? 原來係夾到痴線!!!!!! 就好似鵝肝+蘋果咁，利用西梅既酸甜來平衡芝士既鹹同油膩! 大鄉里表示咁既美味組合都係第一次食到，好衝擊! Prawn Saganaki 主菜Prawn Saganaki係燒大蝦~ 但係食之前有一個重要步驟 ------- 唔該囉妳部手機出嚟先 靚仔鬼老闆會烘熱手中一小酌冧酒至著火，再一口氣淋落鐵板大蝦之上，變成火燒大蝦，絕對係打卡之選! 賣相同氣勢都一流，個味道點先~ 蝦，就一定係雪ga啦，但佢所使用既醃製手法同香料卻令呢d本來應該無乜味既雪蝦變成天下美味! 如果話香港人用既白灼清蒸係為保持鮮味而作的最佳煮蝦方法，呢種希臘式既醃製就係將欠缺鮮味既蝦弄成最好味既煮法! 配上鐵板上的蒜頭、泡椒，和半溶的羊奶芝士碎，每一口都係以前從未體驗過的味覺衝擊! 就算係已去過不少國家既我，都從未食過咁好味既西式蝦! 價格係唔算太平宜，但一定要試! (我所見係每枱必叫，甚至encore tim!) miss左點火果下........ Patatakia 食到尾好似仲差左少少野~ 見仲有Tzatziki，就一於要個炸薯條”Patatakia”蘸埋佢啦~ 呢度既Patatakia可以選擇配咩沾醬，我就揀左最辣既唔記得叫咩名~ 唔算太辣，食到譚仔三小辣既人一定無問題 Patatakia係希臘多數係用薯仔塊炸成，係呢處就變成M記粗幼既薯條 雖然好似普通左，不過薯條以香料調味過，仲有一粒粒蒜頭係度，既香脆又惹味~ 口臭? 戴住口罩唔覺ge~ 如果有興趣的話聽聞個甜品都唔錯，不過我就無叫到唔介紹啦~ 簡單嚟講呢間希臘小店就好似發現新大陸咁，完全打開左我味覺既新天地!!! 係一種與平時食西方菜式完全不同的味蕾享受! 而且呢度氣氛舒適浪漫，與其話係餐廳，倒不如話係那種與閨密知己放工後小點輕酌，談心訴苦，放鬆精神的小酒館 ; 又或是旅行時隨意走進的某間只有當地人才懂吃的隱世小店~ 一眾諗紀念日生日飯諗爆頭既網友，想表現下自己有獨特心思有做野ge~ 唔使煩，就呢間啦! p.s. 第一次寫香港既餐廳介紹，如果有咩意見，歡迎留言交流下呀~ =========================== ARTEMIS AND APOLLO OR : https://www.openrice.com/zh/hongkong/r-artemis-and-apollo-%E7%81%A3%E4%BB%94-%E5%B8%8C%E8%87%98%E8%8F%9C-r590319 官網 : https://www.artemisandapollo.com/ =========================== 請大家FOLLOW我INSTAGRAM啦~ Instagram : https://www.instagram.com/fung_garcia_backpacker/ ===================================== 我既YOUTUBE CHANNEL正式開通啦!!!! 新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~ ================================= 相關篇章 : 香港郊遊 《004 - 赤徑與鹹田灣，宛如沙巴的美麗海灣》 《005 - 沙田行去慈雲山，原來超級簡單》 《006 - 大埔三門仔，零難度的全海景輕遠足》 《007 - 西貢大灘郊遊徑，長者行山無問題》 《008 - 飛鵝山芒草之行》 《009 - 粉嶺鹿頸至谷埔︱夕陽下的隱世蘆葦田》 《010 - 青衣自然徑︱馬灣海峽+青馬大橋無敵日落美景》 《011 - 大美督家樂徑︱4大隱世絕美風景》 發掘香港 《1 - 香港Staycation首選，皇家太平洋酒店住後心得》 《2 - 城市步行︱鯉魚門的絕美日落》 《2.5 - 鯉魚門石礦場︱夕陽下的芒草群》 《3 - 己連拿利︱港島攝影秘景，宛如荒涼未來的異世界》 ================================ Email : funggarcia@gmail.com www.facebook.com/Garcia.in.Germany https://mewe.com/p/fung_garcia_backpacker 文章同時刊於以下平台，請各位多多支持呀!!!!!!!!!!!!! UBlog DC Fever Travel Blogspot 遊牧爆谷 Medium
