大阪既炸串店，只係難波通天閣一帶閒閒地都一百幾廿間，就算刨tabelog，睇到眼矇都唔知去邊間去出名既店 -------- 一係超多人排到下年都未食到，一係3百yen一串貴到講x你xx就住食? 喂炸串就係要二三十串瘋狂咁咬再倒啤酒落肚先爽ga嗎!!!為同時滿足大家既食慾及荷包 ------今次我特別介紹一間位於通天閣的隱世炸串小店，每一串都只係80YEN JA!!咩料呀咖哩魚蛋都無咁平呀!而且平得嚟質素超高!而家已成為我每次去大阪既必到食肆! 間炸串店名為「大眾酒場 カドヤ」位於通天閣及世界之大溫泉中間，非常適合係Donki行到腳軟或新今宮玩到腳軟既大家~ 店內一眼睇哂，連bar枱只有約20個座位木枱木框玻璃窗，周圍貼滿不同食品價格揮春(what!?)，天花角落的15寸電視機放映著綜藝節目，一幅非常標準的本土平民居酒屋畫面~當然啦，幫襯既都以本地居民為主~ 講咁多廢話~ 快d入題講野食啦!!!!嗱無呃你呀!! 真係不論炸串定燒串，每一串都係80 yen = $5.6 ja!!!!!當然係某d食物會貴少少啦，但真係個menu 9成都係80 yen，當中包括埋五花腩、雞肉、白身魚、蝦呢d中高價野wor!就算係牛肉或其他料理都只係100至120 yen，計落都唔使10蚊港紙，妳諗下旺角一串咬唔開既炸大腸幾錢先啦! 平就平啦，好唔好食先?絕對唔差!!!!!!我甚至可以話食唔出佢同街口轉角既名店「串炸達摩」有咩分別!一樣係即叫即炸，外脆內嫩，炸皮薄而鬆化，內裡則非常juicy!至於必食item……………..er…………….佢一大盤上到嚟，我而家睇相都分唔清邊支打邊支……….咩je……………….一群minion係妳面前妳都分唔到邊個係乜水啦…….盡我人事啦!!!!!!!!! 點擊圖片放大 炸芝士，聽到個名都唔可能唔食啦，笑牛牌超市買除開都唔止6蚊啦，何況係日本芝士wor! 白身魚，魚味香濃 ; 炸日式年榚，喜愛煙韌朋友既至愛 點擊圖片放大 五花腩油香豐富 ; 紫蘇葉雞胸亦係必食item! 至於小食，燒生雞肉刺身係不錯的，但最正都係味噌牛筋雜煮!呢款居酒屋必備item，係我係日本食過最香濃惹味的!剩係佢都可以餸一杯啤酒!我幾乎想叫老闆碌個麵比我撈汁tim呀!!! 一般嚟講食野連啤酒，當晚餐由餓放肆食到飽，應該都係人均1500 yen左右如果只係晚餐後小酌吹水就更抵了~係通天閣呢個黃金地段，咁低既價格，咁高既質素，去邊度搵呀~寫到呢度有d後悔tim………….間野太爆我以後食唔到點算!!!!!!????????? 不過都要注意兩件事~第一，間店個營業時間好飄忽，我試過連續兩日都摸門釘!Google map寫11點收工，但其實10點就會收，9半已經last order左唔比入最好都係早d去啦~ 中午都營業的~ 第二，間店的油煙味都幾重如果係冬天大家著冷衫，又唔想一整日都用烤肉香水行街既，我建議都係除哂先入去啦~ ==============================================《串炸 大眾酒場 カドヤ》地址 : 大阪府大阪市浪速区恵美須東3-5-3電話 : 06-6630-8484Tabelog : https://tabelog.com/osaka/A2701/A270206/27091552/==============================================IG果邊間中會有D和BLOG及FB PAGE不一樣的相片和STORY，大家有興趣既去FOLLOW下支持下啦~Instagram : https://www.instagram.com/fung_garcia_backpacker/=====================================相關篇章 : 《【東京雜記4】日本第一炸豬扒》《【東京雜記5】那夜凌晨，我坐上了東京開往大阪的巴士》《【東京雜記6】蠔大大小店，性價比超掂》《【帶著爸爸行富士山】 - 系列》《【日本美食1】東京壽司「梅丘壽司之美登利」如何抵食?》================================我既YOUTUBE CHANNEL正式開通啦!!!!新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~ =================================Email : funggarcia@gmail.comWWW.FACEBOOK.COM/GARCIA.IN.GERMANY 文章同時刊於以下平台，請各位多多支持呀!!!!!!!!!!!!!UBlogDC Fever TravelBlogspot 遊牧爆谷Medium
