潮流興Staycation，我又湊下熱鬧，係香港搵間酒店平平地過下夜，hea返幾日抖下都好~ 今次講呢間「皇家太平洋酒店Royal Pacific Hotel」我住完後發現性價比真係超高，滿意到忍唔住要寫篇文章嚟介紹下! 平時我都只寫旅行郊遊，咁而家無得外國旅行ma，咪講下點樣係本地扮旅行law…….. 先此聲明呢篇絕對唔係鱔稿，因為根本無人搵我賣廣告…….. wei香港咁多酒店，半島如心維記百佳周圍都係，點解係要介紹皇家太平洋先? 首先係價錢 現時有大優惠的酒店大多都係偏高檔，由5千幾蚊減到二千幾蚊係好抵，但唔通擎天半島半價後我會買得起咩，個金額係貴就係貴ga la…….. 而Royal Pacific官網正做緊特價，星期五六日一晚都係$480加一(平日再平$50)，包免費升級大房，$200餐飲券 不過最吸引都係可以early check in 09:00 加late check out 18:00! 住宿時間長達33小時! 真真正正可以hea足兩日一夜，抵過去長洲租東堤呀!!!! 「皇家太平洋酒店Royal Pacific Hotel」位於中港城，算係香港非常老牌既酒店 外表黃咁咁唔多吸引，不過岩岩裝修完無幾耐，所有設施都係新淨的，至少大堂就非常光猛舒服 點擊圖片放大 老牌酒店有樣野好 --------- 大! 間房非常大! 雖然明知係upgrade左，但都唔係班會開party都得既size ar?? 點擊圖片放大 +3 最勁既係我book呢個最弱最平既plan都比到間海景房我! 望住個海飲杯茶寫下blog，突然變左豪宅級享受! 幾舊水有間維港view靚房，抵到爆炸啦! 點擊圖片放大 如若情侶想幹愛幹的事，請切記太可疑外，更請切記唔好太近窗邊 外表睇度係單向玻璃，但其實一貼近係睇到的~ 床既軟硬度係香港人喜愛既彈性有承托力，唔會好似歐洲果d軟到水床咁 而且張king size double bed都ok大，最岩左右手各抱一個嚟訓ga la~ 洗手間大到可以同時比4個人用 (究竟咩情況下會咁用?........) 點擊圖片放大 Sony電視質素始終有保證，同埋尺寸有返咁上下大，唔使坐係床度囉放大鏡都睇到 唔好以為我講笑，我真係住過有酒店5米距離大房用15寸電視機，樓下看更個閉路電視睇得仲舒服過佢! 至於Channel就有齊多個外國24小時電影台，唔使局睇TVB，不過無愛情動作片台，要睇就自己帶HDMI線駁電腦啦 不過我就選擇駁switch了~ 點擊圖片放大 其他minor野就包括 : 咖啡係免費refill的，飲完可以問酒店再囉~ 房間既隔音唔錯，至少我聽唔到任何打樁機聲~ 水係要自己囉房間內既水樽出電梯大堂refill，網上好多人鬧呢一點，但我又覺得呢件事又環保又方便wor，唔使浪費膠樽又唔使飲哂煩d姐姐囉支新既上嚟，good ar! 點擊圖片放大 +3 (有埋冰杯呢家野非常貼心!) (其實可以問佢囉浴袍團tim~) 酒店設施方面，游泳池係無ge~ 不過呢個時候全香港酒店既游泳池都唔會開ga la，所以根本無問題~ (出post時好多酒店游泳池已開返，咁大家自己考慮啦~) 反而Gym room係24小時開放，最岩係夜蘭人靜時釋放多餘既體力~ 每晚$200餐飲券可以用係room service or酒店兩間餐廳 Room service超級極度痴孖筋咁貴，我呢世都未見過火腿煎雙蛋要百幾蚊! 百幾yen ja呱!? 而柏景餐廳又超多人，$200對自助餐亦只是杯水車薪 最佳使用方法都係去「沙嗲軒」叫個超邪惡「鹹蛋黃炸魚皮」加杯啤酒嘆返下~ 「鹹蛋黃炸魚皮」竟然係新鮮即炸! 上碟時鹹蛋黃仍然波波聲冒緊泡! 熱辣辣、脆卜卜，鹹蛋超香濃，根本忍唔到口一塊接一塊無停過! 最多一陣返gym room跑返廿k啦!! 點擊圖片放大 +2 晚餐方面 -------- 樓下係有M記，之不過呢度尖沙咀嚟ga，乜都有得食啦~ 就算行去佐敦even渡船街都非常近 對我嚟講，難得係尖沙咀有個自己地方，梗去Donki大掃特掃返酒店開大食會啦!!! 酒店平台有條路直穿過九龍公園，只需要10分鐘就去到，方便到爆! 但如果想凌晨身痕，想學係日本咁凌晨donki血拚，sorry~ 此路不通，兜返海防道啦~ 點擊圖片放大 +3 食完野想郁下，又或情侶想休息下浪漫一下，樓下平台向海方向可以一覽270度全維港夜景 就算由細到大睇過無數咁多次，每次見到呢個燈光催璨既美景都總會諗 ------ 香港其實真係好靚 點擊圖片放大 +3 除左以上所有硬件配套，我幾鍾意既係酒店員工真係非常親切有禮 唔止有笑容夠helpful，係難得在會醒目地主動幫妳解決問題 呢一點真係好多酒店都做唔到ga，抵讚! 就係咁，係酒店食下野、打下機、做下gym，既輕鬆又頹廢地過左一個小小的香港假期~ Staycation其實同旅行真係好唔同，平時去旅行雖然都係休息，但去到外國點都想去下景點，周圍行下參觀下，總要plan下行程，總會花精神總會攰 但係香港Staycation真心不用想任何事，食! 玩! 訓! 可以完全放空做廢中，比自己真真正正休息 大家stay home咁悶，Home Office又咁攰 係呢個無得去旅行既日子，去酒店抖一抖，叫做可以輕輕安慰下呢顆寂寞的心啦 p.s. 以上個優惠做到今年6月30日 ja，要book就要快了! ============================ 官網 : 皇家太平洋酒店 https://www.sino-hotels.com/en/hk/the-royal-pacific-hotel-and-towers ============================ ============================ IG果邊間中會有d和Blog及fb page不一樣的相片和story，大家有興趣既去follow下支持下啦~ Instagram : https://www.instagram.com/fung_garcia_backpacker/ ============================== 我既Youtube Channel正式開通啦!!!! 快d Click入 「鋒加西亞 / 旅人瘋語」Subscribe 睇片再禁個like啦!~ 岩岩開始，完全未有人睇呀~ ================================= Email : funggarcia@gmail.com Facebook Page : www.facebook.com/Garcia.in.Germany 文章同時刊於UBlog、 DC Fever Travel、 Blogspot 、遊牧爆谷、Medium，請各位繼續多多支持呀!!!!!!!!!!!!! 鋒加西亞 - 德國工作假期後的世界流浪
