係曼谷除左按摩shopping同灌醉個fd去搵人妖外，最多朋友做既應該係搵間靚餐廳fine dinning下~ 無他ge，同樣係浪漫餐廳，香港3舊水幾食垃圾，泰國3舊幾水勁好吔，仲要係泰幣wor! 不同既價錢卻有同樣既享受，點可能唔去~ (睇過Hangover2就會明呢張圖點解~) 只要上網打「曼谷浪漫餐廳」，超易會搵到一大堆 ------- 當中不外乎係天台sky view，近郊田園view，同埋岸邊路伴的開揚view 而其中又有一堆係集中係臥佛寺近河一帶，睇嚟果邊好feel wor~ Google完一輪，就後決定試下最多好評的呢間「Eat Sight Story Deck」，希望唔會令我失望啦~ 唔止無令我失望，估唔到仲係大大的驚喜tim! 睇相先~~~~~~~~~~ 使唔使咁靚ar!!! 本身河邊餐廳配夜景已經係無敵，而對岸個景竟係人稱「泰國艾菲爾鐵塔」的泰國著名古蹟黎明寺! 個地理位置會唔會太優越ar? 而餐廳亦聰明地善用地利，把超過一半的座位設於全露天開揚的陽台上~ 試想像下 ------ 邊和愛人喝著雞尾酒，邊飽覽對岸180度無死角的黎明寺全景 夜幕下的舍利塔壯嚴神聖，流水閃爍著岸上燈火 湄南河畔吹來的陣陣微風，為八月的仲夏夜帶來絲絲涼意 此夜景下的燭光晚餐，未免太浪漫醉人了吧! 而且天氣好時更可以飲住冰凍Mojito，欣賞以此巨型佛寺作襯托的金黃日落 係呢種靚景下開餐廳，簡直就係蕭叔叔考英文oral ---- 犯規呀!! 點擊圖片放大 +3 個view咁靚，食M記都無所謂啦~ 我原本都有咁既打算，入嚟影兩張相再轉身射個三分波，食個街邊河粉攪掂~ 但望下個menu又唔貴wor! 一碟野都係200THB = $50咁上下，而菜式係泰國+西式 ------ 泰西呢家野似我! 就試下妳啦~ 軟殼蟹沙律 ----- 軟殼蟹新鮮炸起又香又脆，兼大隻多膏，蕃茄蔬菜沙律用酸辣汁調味，新鮮醒胃，very good! 泰式辣肉pizza ----- 用左豬頸肉、蘑菇、香葉及少少辣椒加芝士焗成，餅底近似印度薄餅，味道卻是泰式感覺，味道出奇地夾! 幾乎每枱都會叫Pizza就知係呢度的招牌啦~ 黃咖哩鴨肉 ----- 加左少少椰汁，同香港食的近似，味道算不錯，基本上唔需要白飯，用pizza餅邊蘸咖哩汁食very perfect~ 但鴨肉竟然係街市燒鴨切絲?? 咖哩+燒鴨，清真惠記ar? 加上份量偏細，係最失望的一碟。 芒果糯米飯 ----- 超~泰國周圍都有啦使鬼係度食! 呢舊青BB史萊姆賣相雖然唔多好，卻充滿濃郁的斑蘭香氣! 最重點係椰汁同飯都唔太甜! 配埋芒果個平衡做得非常好! 唔好甜食的我都一啖接一啖幾乎要encore! 傻ge咩! 個景又靚d野又好食，你玩哂啦! 正因如此，呢間餐廳真係非常好生意，建議預約~ 預約最理想既座位當然係河邊啦~ 成個view你霸哂，十足天地間只有你同佢幾romantic~ 不過現實係大部份人都係影相多過食飯，其他食客會non stop衝埋妳旁邊囉靚位影返357張上IG打卡 即係話妳一邊食飯一邊有成個Team Lab咁多既電燈膽ssssssss阻x住哂! 做好心理準備ar~ 雖然係咁，但呢處仍然係求婚同慶生的熱門地點~ 一晚唱返三四首生日歌真心唔係咩奇事~ 而且似乎呢間餐廳係旅遊界非常有名氣(可能只係我大鄉里)，所見有不少歐美日韓人士特意來進餐 我旁邊懷疑係日本 xxx46的model feel美女群更令我望到眼都唔眨! 日本女仔同韓國女仔既感覺真係好唔一樣ar~~~~ Sorry~ 無相~比d 46大家睇住先~ 總而言之，呢度係一間環境靚、味道好、價格平既一流餐廳~ 就算唔係慶祝咩大時大節，就算唔係同愛人一齊，都絕對推薦嚟呢個最佳位置，欣賞下「泰國艾菲爾鐵塔」的迷人風姿~ 當然啦，最好梗係有哂佢地46個相伴............. ========================== 「Eat Sight Story Deck」 地址 : 45/1 ซอย ท่าเตียน ถนน มหาราช Phra Borom Maha Ratchawang, Phra Nakhon, Bangkok 營業時間 : 1100 – 2100 (Mon to Thu)，1100 – 2200 (Fri to Sun) 交通 : 的士! 由Silom出發約15分鐘可到(唔塞車的話)，或可坐船Chao phraya express boat至Tha Tien站 http://www.eatsightstorydeck.com/ =========================== 相關文章 : 《泰國雜記1 - 芭堤雅3日快閃行程懶人包》 《泰國雜記2 - 我的芭堤雅黃色小見聞》 ================================= 我既Youtube Channel正式開通啦!!!! 快d Click入 「鋒加西亞 / 旅人瘋語」Subscribe 睇片再禁個like啦!~ 岩岩開始，完全未有人睇呀~ ================================= IG果邊間中會有d和Blog及fb page不一樣的相片和story，大家有興趣既去follow下支持下啦~ Instagram : https://www.instagram.com/fung_garcia_backpacker/ Email : funggarcia@gmail.com My Facebook Page : www.facebook.com/Garcia.in.Germany Medium : https://medium.com/@funggarcia 另外文章同時刊於UBlog、 DC Fever Travel、 Blogspot 、遊牧爆谷，請各位繼續多多支持呀!!!!!!!!!!!!! 鋒加西亞 - 德國工作假期後的世界流浪
