經過尋晚既飛蟲洗禮,總算訓到11點幾有得休息下 起身沖個涼啦--------喂無熱水ge???? Wa呢間民宿想點呀???? 又蟲又無熱水,加上我呢幾日總係隱隱病緊,係咪要考慮下走佬搬去間靚酒店呢????? 而呢個時候Gunay先whatsapp我,話因為春天所以周圍都係呢種蟲,係正常的 ; 另外好似因為市內唔知乜野破裂而全個Sheki都無熱水供應……….. Um原來又怪錯左間民宿,對唔住呀! 總之攪左一輪無野發生就好,12點食個late breakfast就出門了,我要去騎馬呀~~~~~~ (騎馬一定要做呢個動作,無得解,一定要!) 比起步兵,其實我更鐘意騎兵,因為有馬總比無馬好,果種安全感同神秘感係無可取代的 可惜既係我份人一向都同馬無乜緣,相關既認識只有「有馬溫泉」同「有馬貴將」,而今次有機會係阿塞拜疆騎馬,總算一還我做騎兵片男主角既心願~ 廢話少講,來到information centre,Gunay剛巧不在,只有一個180cm既鬍鬚型男企係我面前,佢只係微笑講一聲” Tour? Let’s Go~”我鐘意爽快既人,非常好! 出發啦! 呢位鬍鬚型男其實我已經唔記得佢叫咩名,原諒我記男人名比較差,但佢一路上算係非常健談 ------- 以一個英文唔叻既領隊嚟講 唔係笑佢,而係原來佢係一名本地大學既德文教師,做Tour Guide只係搵下外快幫補家計又識下朋友咁,所以英語非佢強項,但佢仍然好盡力咁同我傾偈溝通以表友善,咁問心對住呢個大男人我都無拘謹無唔想理佢ge,感覺上相處係舒服ge~ 於是我地就由Sheki Palace Khans出發向左方的村落前進啦~ 一路上談談笑笑,係石板村路上上落落左廿分鐘 我開始奇怪 : 「呀~ 個馬房咁遠ge~」 鬍鬚型男 : 「Yes it’s far away~」 再行下傾下廿分鐘,我仲係條村度上上落落緊? 個馬房咁Q遠ge? 佢究竟帶緊我去邊呀? 忍唔住再問多次 : 「呀~都行左成40分鐘啦wor,個馬房都幾遠下ar ho~」 鬍鬚型男 : 「Horse? You wanna ride a horse? This is Walking tour to the Mountain.」 WHAT!!!!!!!!!!!!!!!!!!!!!!!!!!!!!!!!!!!!!!????????????????????????? 尋日我咪好清楚話要Horse Riding tour囉,點會變左另一回事ga????? 今次真係有馬變無馬ar!!!! 更重點係,如果要行山我自己囉住個GPS行都得啦,使鬼比錢請人陪咩! 我就相信Gunay唔會騙我的 -------- 無錯正如大部份既男人都覺得女人係唔會昆自己一樣,所以應該係尋日Gunay打電話比Tour果條友問Information時條友比錯資料 經過鬍鬚型男一輪電話斡旋,我係可以而家轉騎馬tour,但要等多一個鐘頭,兼且行返轉頭去Information Centre,更要加around $100港幣! 我諗起要原路行返去,我諗起無啦啦又要我加錢,再見到阿鬍鬚型男個失望樣………. 唉算啦,洗濕左個頭,都下左海了,就繼續用對腳嚟行路啦…….. (呢張係佢電話講緊數時~) 既然已經下定決心要行呢條路,其他既事就簡單了~ 開始行到上山,俯瞰整個Sheki市,風景唔算話好優美,但高處總有種令人心擴神怡之感~ 點擊圖片放大 再一路行入山中深處,正午時份烈日當頭,5月的山區氣溫竟可高達32度! 我原本諗住輕輕鬆鬆盛裝舞步ga ja,點會估到來場衝鋒陷陣! 至於我同阿鬍鬚仔,大家都係牛仔褲,我行山鞋佢clause adid,當我因高溫及碎石斜坡而氣來氣喘時,鬍鬚型男仍然身法輕盈步履迅速,仲不時回頭等我tim! 可惡也~~~~~~~~唔可以比佢睇少ge~~~~~ 上呀!!!!!!!! 係村落再出發時明明就話「行左一半路程」,點知再行多個半鐘先到預定既目的地山中平原,再多行15分鐘到達一個好似洗手盤一般既山泉作目的地 洗個手洗個面,爽呀~ ee阿型男你做咩唔飲淡水ge? 呢個時候我先發現,佢身上乜除左褲袋個銀包外乜鬼野都無帶! 即係話30幾度下行左咁耐佢一滴水都無飲過!!! 點會咁ga???? 唔通--------- 「無錯今日開始係我地齋戒月既第一日~」 我真係呆左,只能唱一句「只能說我輸了」………… 點擊圖片放大 +7 講真呀,呢個行山tour沿路真係唔係有咩特別風景睇,全程只得一片綠色,就連山頂遠景都唔係特別吸引人,但有阿鬍鬚型男大哥係度的確為呢個行程增添不少趣味 我唔識德文佢教德文,但佢只曾係德國exchange左兩個月 我33歲佢28歲,但已經有靚老婆有可愛囡囡sweet到爆 我行山未見過蛇佢成日見,但蟒蛇標出嚟時佢驚過我 我第一次行呢條路佢成日行,但自拍影相打卡仲多過我~ 雖然唔想用呢個詞形容男人,但呢條友係幾cute ge~ 好啦~ 多謝你為我呢個由有馬變無馬既Sheki行山之旅變得不平凡呀~ 下回繼續遊走Sheki! 點擊圖片放大 +4 ====================== 「旅途上總遇上很多過客,相聚也許只是一刻數秒,此生不復相見,卻在你的生命中留下永恆的印記」 #過客列傳 係小弟facebook page一個專寫旅途上一面之緣朋友小故事的系列,多數只係百零字講幾句,今次因為這些過客同行程經歷關係太大,所以再獨立成篇。 今次呢個故事由於太過長又同我個行程有太關係先放埋係度~ 如有興趣,可以入下面呢條link睇下其他 #過客列傳 舊故事ga~ 當然like埋我個page就最好啦! https://goo.gl/bjBrm3 ====================== 相關文章 : 《格魯吉亞背包行 - 出發前資料大全集》 《格魯吉亞背包行Day1 - 夜遊第比利斯》 《格魯吉亞背包行Day2.1 - 漫步第比利斯》 《格魯吉亞背包行Day2.2 - 公共浴場奇異見聞錄》 《格魯吉亞背包行Day2.3 - 半山城+初試格魯吉亞菜》 《格魯吉亞背包行Day3.1 - 雪山下的仙境民宿》 《格魯吉亞背包行Day3.2 - 冰川獨行@Mestia》 《格魯吉亞背包行Day4 - 烏樹故里,那僻遠村落中的僻遠村落》 《格魯吉亞背包行Day5.1 - 係咁ee睇下Kutaisi》 《格魯吉亞背包行Day5.2 - 一支公hostel天台BBQ》 《阿塞拜疆背包行Day6.1 - 司機傻更更 (#過客列傳13)》 《阿塞拜疆背包行Day6.2 - 熱心老伯有性格 (#過客列傳14)》 《阿塞拜疆背包行Day6.3 - Sheki市區與遇上的女士們 (#過客列傳16)》 ==================== Email : funggarcia@gmail.com Instagram : https://www.instagram.com/fung_garcia/ My Facebook Page : www.facebook.com/Garcia.in.Germany Medium : https://medium.com/@funggarcia 另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!!