上回講到尋晚開始作病訓唔好，不過今朝起身食埋個豐富早餐又好似好好多wor，再加上有民宿的韓國少女Summer同遊烏樹故里，即刻雄風再現大師級表現! 出發啦~~~~~~~ 烏樹故里Ushguli，一個連譯音都饒有詩意的地方，係Mestia東北偏東的山區的一個山中小村落，有人稱之為「秘景中的秘景」 原因，好簡單，本身Mestia已經係一個山長水遠上刀山落油鑊萬山千山縱橫偏僻到爆炸既地方，但由Mestia入Ushiguli則需再坐兩個多小時既私家車，係充滿落石與泥濘既山道上不停上落秋名山，天氣差時甚至有山泥傾瀉既危險 計一計數，由第比利斯到Mestia要15小時，Mestia到Ushguli要2-3小時，即total 18個鐘，仲耐過香港飛紐約! 儘管如此，Ushguli卻係到Mestia既背包客必到地點! 一來當地為歐洲海拔最高的村落(約2100m)，歷史悠久 ; 二來呢度係格魯吉亞少被聯合國教科文組織指定既世界文化遺產之一 ; 三來更係攀登歐洲第二高峰「什哈拉山Shkhara」的入口 (其實歐洲第一高都係附近，俄羅斯既「第厄爾布魯士山Mount Elbrus」，拉條直線的話Mestia去一定唔使2粒鐘) 不過對於我呢d咁膚淺既人嚟講 ------ 吓聽聞個地方風景好靚wor，咪去law! 一般民宿都會有private tour或join hotel tour一架車過去，或者係Mestia main street上搵旅行社、的士or mini-bus過去，價格一般都係40-50gel來回，而我就係Yuri兩公婆慫恿下與韓國少女及愛爾蘭仔share一架幾靚幾舒服既四驅車~ 不過都係震到嘔，仲中途爆軚tim，收費50gel = $160 早前有位網友同我講佢成功用左3-4日由Mestia行路入去! 講真見識過果段山路雨後狀況既我真係嚇一跳! 但都想像到佢呢4日有幾正! 因為路上可以飽覽高加索Svaneti區既絕美風景! 應該會係一世難忘既經歷吧~ 至於我，一如以往係車訓到死魚咁…….. 我一開眼韓國少女Summer就同我講「岩岩d風景好震撼呀!」shit我miss左好多野呀!!!!!!! 點擊圖片放大 +8 (影到呢幾張相係因為爆駄~ 係fb #場邊小故事 再講) 轉眼嚟到Ushguli啦!!!! 岩岩沿路入村時有個睇哂成條村既角度畫面超靚! 一於以佢為第一站啦! 一落車我就比狗撩，喂，話哂好狗唔攔路，你唔好咁cute好wor! 我會唔捨得行ga! 點擊圖片放大 +6 要去岩岩果個view，首先就要穿過落車右方被河流包圍的古村~ 習慣上我都會係條村周圍行下先，但今次我無做到，因為根本做唔到! 呢兩日既大雨，將村內所有道路泥濘化，爛泥既深度同軟度係一腳踩落去幾乎浸過腳背! 每一步都又跣又啜，仲係日光熱力下升華發出惡臭…… 總之就係步行既感覺係雪，視嗅既感覺係屎! 我開始懷疑係咪真係有人既願望係可以做佢腳下那堆爛泥………. 而當我再行多兩步見到一大群豬係度周圍走時，更加肯定唔止「感覺係屎」，而係真係有屎……… 點擊圖片放大 +7 好不容易到啦~! 呢個旅遊局既topic photo，Ushguli最代表性既「Y字形河流圍村」影相位，原來係好鬼撓腳ga!!! 我影相既呢個位置係個滿佈碎石既high slope斜坡，距離洶湧既河流都有一兩層樓高。 角度唔算太好，但再向前行已經會有危險! 如果唔係就要過返古村兜河既對岸再穿過牧場…….算啦呢個位已經有河有村有雪山，我心足了! (最靚既角度可能真係要航拍呢……) 點擊圖片放大 過返狗攔橋，向左方山上的另一村落進發~ Wa呢邊又係另一種小橋流水人家風情~ 如果可以好似人地咁，在雪山青草的河邊開間coffee shop，每日劈下柴玩下狗睇下書，一定會woo~~~~~~~~悶死我ga je (事實係真心好鐘意呢個環境! 短住數日一定好正!) 點擊圖片放大 繼續沿路上山入村，呢邊既路面情況好得多了~ 亦有少量民宿，不過一般都話Ushguli無乜需要係度過夜，幾個鐘就玩得哂~ 我基本上係同意的，但見住咁多又純樸又靚風景既村落，就好想係度stay下了解下當地人既生活呢~ 點擊圖片放大 +2 古村盡處的山坡上，會見到格魯吉亞既著名古教堂Jgraag - St. George，不過重點唔係呢度，而係坡頂可以享受被雪山懷抱既感覺! 我站在Ushguli的最高點，卻仍被四周無木的翠綠山群圍繞，腳下是千年古村，眼前是歐洲第二高的白雪山嶺，藍天之下顯得格外驚艷! 兼且格外寒冷tim!!! 大佬呀海拔2100m話高唔高話矮唔矮，根據wiki所講，Ushguli一年有過半時間被積雪覆蓋，氣溫更會低至零下25度，係北極圈既級數呀! Wa……..一個咁既既view但有Kiruna咁既積雪風景………呀好想冬天時再嚟呀!!!! 點擊圖片放大 +7 話咁快就三個鐘，原本我同Summer想叫司機車我地去另一個冰川，點知話要再花多2個鐘先去到天黑回程危險，唯有返去Mestia啦…….. 一路無話 傍晚時係大街搵間餐廳book埋往後兩日既住宿，當係hea下休息下啦~ 恐怖既係，我係間餐廳竟然收到河對岸我間民宿既wifi……仲要幾快tim……. (last 1張in Ushguli~ 之後就訓著返到Mestia了) 點擊圖片放大 +4 晚餐再去返”The Sunset”~ 尋晚飲完酒咁辛苦，見過鬼怕黑，今晚都係食清d啦~ 忌廉蘑菇湯+格魯吉亞餃子Khinkali +梳打水 忌廉蘑菇湯質地似飲泡沫但味道非常濃郁! 講真呀係歐洲飲蘑菇湯=香港食雲吞麵差極有個譜，係最安全既選擇 但今晚既重點其實係Khinkali~ 呢種格魯吉亞既傳統名菜係華人地區非常有名，因為佢個樣exactly係個巨型小籠包! 每個size都有成年女性既拳頭咁大，所以如果係可以將個拳頭放入口的話，就可以一啖一個好滋味啦!~ 開講有話「男人唔可以話唔得」，但成個一啖過我真係做唔到，咬開佢，wa皮薄餡靚，內裡是滿到瀉既湯汁，味道卻是重蒜重辣重肉味，佢既香濃同上海小籠包既清香大異其趣! 如果話係川菜我都會信! 傳統上食法係用手囉起橡皮糖咁既果粒的個頂成個咬，但唔可以比任何湯汁流落嚟，咁係會比格魯吉亞人笑的。 最重要係果粒的個頂係唔會食的，一來個咁厚既頂未熟哂，二來係用嚟count妳食左幾多隻的……. 不過我覺得真係有d浪費食物……. Finally 埋單只係11 gel = $39，真係平到笑~ 點擊圖片放大 +3 今日係last night in Mestia，短短兩日其實有少少走馬看花，有時間既好應該係度留返3-4日慢活下咁先係人生嗎~ 不過我就係無時間………有機會既話冬天要再嚟呀! =================== 相關文章 : 《格魯吉亞背包行 - 出發前資料大全集》 《格魯吉亞背包行Day1 - 夜遊第比利斯》 《格魯吉亞背包行Day2.1 - 漫步第比利斯》 《格魯吉亞背包行Day2.2 - 公共浴場奇異見聞錄》 《格魯吉亞背包行Day2.3 - 半山城+初試格魯吉亞菜》《格魯吉亞背包行Day3.1 - 雪山下的仙境民宿》 《格魯吉亞背包行Day3.2 - 冰川獨行@Mestia》 ==================== Email : funggarcia@gmail.com Instagram : https://www.instagram.com/fung_garcia/ My Facebook Page : www.facebook.com/Garcia.in.Germany Medium : https://medium.com/@funggarcia 另外文章同時刊於UBlog、 DC Fever Travel、 Blogspot 、遊牧爆谷，請各位繼續多多支持呀!!!!!!!!!!!!!!
