尋晚成4-5點先訓，今日真係訓到幾乎check out 12點先起身! 第一件事唔係出去玩，係坐地鐵去第比利斯火車站買今晚去Zugdidi既過夜火車，超驚無位呀! 之後再返Liberty Square食個KFC先officially 開始我既第比利斯探索之旅~ 但當時已經係下晝2點……………… 算啦~ 慢慢散下步，無目的地行到邊睇到邊啦~ 點擊圖片放大 +3 (好鐘意係外國試下d連鎖店同香港有咩唔同~ 結論係比香港既熱同脆~) 尋晚行左Liberty Square東南方既old town，今日就行西北既大街Shota Rustaveli Ave啦~ 呢條街係第比利斯既藝術文化中心(好似係)，國會、大學、歌劇院、美術館係哂度，街道兩邊滿是藝術感十足的咖啡店 如果閣下係以扮銅像為生既朋友(有咁既香港人咩??)，你去到都係渣兜把啦 呢條街銅像雕塑兩三步就一個，有大有細有排妳影! 兼且質素比得上Bratislava果d (德國working holiday第十四章 : 斯洛伐克遊記之一 – 咩地方嚟ga?)，要一一細味，睇怕無3-4粒鐘攪唔掂呢! (此乃國會~) 點擊圖片放大 +4 (最鐘意呢個德成女傭，真正融入家中) 點擊圖片放大 +2 (連M記都有氣勢，同旺角恆生銀行一樣係地標嚟ga!) (另一飛佛巨型單車) (Rose Revolution square) 點擊圖片放大 +2 (又熱又喝，破戒飲下甜野啦，點知真係甜到有糖尿........) 點擊圖片放大 +5 (睇Amazing Race時覺得個歌劇院幾正，可惜時間就唔到入唔到去……..) 之後穿過當地人既休閒公園9 April Park，無乜野睇，唔講~ 點擊圖片放大 (我只係唔明點解要4張櫈圍住條柱坐) 來到Dry Bridge，係第比利斯著名既跳蚤市場，由舊書、茶壺到古老Casio都有，但最多最多既都係刀刀劍劍，由刺秦用掌中小匕到大馬士革軍刀都應有盡有 係呢個刀劍神域之中，唔知點解好自然就湧左好多無聊幻想出嚟……… 包括「有無一把我拔出後會有條友衝過嚟話我係傳說之勇者呢?」「曹達華有好多兵器選擇同于素秋we won won wor」，同埋「磁力王咪會吸哂d刀劍係身law」等等等等……… 但我無諗過磁力王個磁力好似唔係咁既意思...... 點擊圖片放大 +2 係Dry Bridge跑落庫拉河伴，會見到一大排RPG咁既寶箱放哂係度 無錯，呢d絕對係寶物，因為係裡面全部都係放書ga!..........好似係，因為40幾個箱只係得一個有人開左，嘗試搭訕但言語不通，無計~ 旁邊的Dedaena Park係著名公園，聖誕市集or其他大型文藝活動都會係度舉行，不過我當日所見就只有一群小朋友係滑板場轉身360 對歐洲人嚟講滑板係正常兼有益身心既合家歡運動，係香港滑板就係MK衰仔唔正經既象徵，其實都唔明點解會咁…… 正因為呢個觀念，我真係無能力走挑班小朋友機，坐係河邊抖下休息下算了 點擊圖片放大 沿河向南行，回到尋晚所見好鬼靚既和平橋 一向都話天氣係好緊要，天陰無燈之下條橋吸引力大跌50%，影兩張就算了 點擊圖片放大 +3 過到對岸Rike Park，係遊客同音樂人既集中地 與其話係公園，倒不如話係一堆藝術雕塑既集散地，例如巨大既白色三角琴及魔幻樹都係打卡熱點 不過講到目光吸引程度，點都唔及呢兩舊巨大既銀色建築，由第一日來到Tbilisi (即係尋日)已經非常吸引目光! 究竟呢兩座野係咩嚟ga呢?? 藝術館? 演奏廳? 定係企業號呢? 點擊圖片放大 +2 (開頭仲想媽叉佢地死抱住棵樹阻住地球轉，過多陣先知原來係影緊結婚相......咁算啦~) 點擊圖片放大 原來係廢墟嚟……………………. 唔似未起好，而係似荒廢左好耐，會唔會係大白象工程呢…….. 不論係邊樣都好，咁靚咁大型既建築淪為for我抖涼飲水既地方only，真係好浪費law…….. 係Rike Park向前望，小山峰上既Metekhi St. Virgin Church幾乎係Tbilisi地標 呢個位置大約公元7世紀已有教堂，幾百年來又拆又起，起碼有過4-5個version，家陣眼睇呢個東正教堂版本則大約係17xx年，2戰時毀滅，1988年左右起返到而家~ 30年ja? 睇落舊到就冧咁ge????? 聽返當地人講格魯吉亞有規定「所有教堂睇落必需要舊」，所以d真實年齡真係好難估ar….. 其實教堂內外都非常值得參觀，不過吸引我既，始終都係呢個望哂Old town既靚角度~ 點擊圖片放大 +2 (呢張係成個trip搵人幫手影既相之中最好的了………) 點擊圖片放大 原本下個目的地想纜車直衝上山，點知feel下對腳……ee好似有d支力…….. 臨時改變行程，過橋行去對面浸溫泉啦~~~~~~~~~~ .............................. 下文其實一早寫好哂，但到落相時先發成篇圖又多字又多睇死人，溫泉既事，都係斬開下篇再講啦~ 下回繼續係第比利斯散步ar~幾日後啦~ https://drive.google.com/open?id=13UOxWH6FUSdojn8Pe-RX7bZLHBpsbQd1&usp=sharing =================== 相關文章 : 《格魯吉亞背包行 - 出發前資料大全集》 《格魯吉亞背包行Day1 - 夜遊第比利斯》 ==================== Email : funggarcia@gmail.com Instagram : https://www.instagram.com/fung_garcia/ My Facebook Page : www.facebook.com/Garcia.in.Germany Medium : https://medium.com/@funggarcia 另外文章同時刊於UBlog、 DC Fever Travel、 Blogspot 、遊牧爆谷，請各位繼續多多支持呀!!!!!!!!!!!!!! ～瘋人鋒語 - 30前80後的德國工作假期～
