在Yazd不可不到的，絕對是Zoroastrian Towers of Silence天葬台 Zoroastrian，譯作「瑣羅亞斯德教」，中文多叫「祆教」 咩係「祆教」呀? 即係我地俗稱既「拜火教」law 咁咩係「拜火教」呀? 即係張無忌on居居學左乾坤大挪移，之後無啦啦解決左六大派圍攻光明頂，再傻更更比班矇佬捧左去做阿頭果個教派呢 咁邊個係張無忌ar??????? ……………………………………………….. 唔該拖佢出去打ar……………………….. (呢個係張無忌，好似係) 天葬我相信大家都知係咩嚟，即係死後透過肉身餵雀既方式行最後功德，近期做呢件事比較出名果個人叫家明 而天葬台顧名思義就係進行天葬儀式既地方，等於以前有個人叫諾士，佢飲醉酒後比人佛得好緊要，自始果個地方就叫「諾士佛台」啦 但現代好多地方，包括伊朗，已經禁止左呢種葬儀，所以葬台亦日漸消失。根據求其兼懶去求證既google資料，亞洲現存的天葬台屈指可數，而作為祆教根據地的Yazd，則保留有其中兩座最完整的 一場嚟到，even我對熊熊聖火無甚認識，但都覺得要去感受下係咩一回事 https://www.youtube.com/watch?v=1GWp2BoiNbU 由Yard old town坐的士，大約100,000 rial 廿分鐘左右就會到達，外國人入場費為80,000 rial 一入去就會見到一大片超空曠的泥黃沙石大平地上，矗立著兩座光禿禿的石山，山頂均建有城堡狀的建築，唔係一早知佢係天葬台的話真心會以為係軍事要塞 在山下有數間同色小屋，由於我無tour guide所以唔知呢d小屋以前係要嚟做乜，相信係for天葬前的種種預備工作及儀式掛 但對於我地大部份遊客嚟講，佢係非常重要既遮蔭抖一抖地點………….. 由入口行到小屋唔使10分鐘，但已經曬到有煎豬扒既感覺………… 好Q熱ar……………………………… 點擊圖片放大 +9 先上右手邊的天葬台 呢個台有樓梯上山比較易行，但行行下就會發現座山比想像中高，加上37度以上既高溫…….會tired ga…… 點擊圖片放大 +3 上到山頂進入天葬場內，眼前並無其他事物，只是一個石造的圓形大廣場，中間有一個大窿，窿內有好多垃圾，that’s it 就咁比張相人地睇你話係鬥獸場都有人信ar 雖然係咁簡陋，但只要略加幻想，就會知道呢處有無數屍體靈魂在此安息，係一個陽光普照既東華義莊 根據我靜雞雞偷聽人地d tour guide所講，呢度既天葬同西藏果邊略有不同 : 藏傳佛教係會由天葬師庖丁解牛緣督以為經，官知止而神欲行咁分哂比禿鷹，即係殘廢餐 波斯祆教則只會將遺體按男性、女性、孩童來放係外圓、中圓、坑邊(我唔係好記得，可能位置不同的)，任由禿鷹自行進食，即係自助餐。如果食剩既就推落坑中，用強酸溶化和自然分解 恐怖? 我又一d都唔覺得wor，反而有一種莊嚴、肅穆的氣氛 所謂既「恐怖」，其實只係一種主觀感覺，係對人類肉體被吃掉既不安感，我地又何嘗唔係以其他生命的屍體為食? 眾生平等，既然人可以食其他生命的肉，點解其他生命唔可以食返我地d肉? 何況係如此烈陽之下，我已經係一舊完完全全既脆皮肥美大燒腩，班衰鷹想咬兩啖又有咩出奇?? 不過我死後仲想器官捐贈比有需要既人，請人食野請一半唔請一半唔係幾好意思ge~ 反正而家無鷹，我都係返落去啦~ (全程縮左係呢個陰影位) 對面另一座town of silence比較高且沒有樓梯，上山的路線則有二至三條，最近入口的最斜最難，兜最遠路的則最平最易 多數人都會行前者，但我想講斜難路真係唔易上，細沙石太多易跣腳，有幾個位甚至會有跌落山既危險，我就見住有個大陸女人係度大叫話行唔到最驚塞死左條路 鬼咩……..高跟鞋連身窄長裙……..著到成隻雀行Q到咩……. 點擊圖片放大 +3 入口左邊既呢座天葬台同岩岩有樓梯果座樣子基本上係大同小異，之不過更為殘破，且有缺口可以坐出外面影相 而我入內時就有一大班歐洲成人係度做工作紙，並且有耳機聽緊其中一人細細聲講野 又唔似旅行團解說，完全唔知佢地係度做乜，只知佢地霸哂所有陰涼位令到其他旅客熱到扒係度，而我更加由燒肉進成一舊燶左既肥叉……… 都係快影兩張相，10分鐘內就走人了…… 點擊圖片放大 +5 Yazd天葬台要講既都7788啦~ 遊覽時間大約係1個鐘左右，唔算耐，但行完呢一轉應該會對人生有一翻新既領悟 至少我就好擔心係呢個無天葬既年代班禿鷹食唔食得飽啦………. 如果聽睇多d拜火教既事物，可以坐的士去Yazd近郊的祆教聖地Chak Chak~不過我無乜時間就skip左了 好啦~下回講下係Yazd食左d咩古怪野先 ==================== Email : funggarcia@gmail.com Instagram : https://www.instagram.com/fung_garcia/ My Facebook Page : www.facebook.com/Garcia.in.Germany 另外文章同時刊於UBlog、 DC Fever Travel、 Blogspot 及遊牧爆谷 請各位繼續多多支持呀!!!!!!!!!!!!!!
