尋日睇完場棒球賽(Day7.2 https://blog.ulifestyle.com.hk/blogger/aeolusgarcia/2017/01/ke7-2/)，即刻心郁郁想試下打全壘打會係有幾咁high! 食完大阪燒頂到上心口，正好做下運動消化下~當然係拜託我既日本朋友帶我去揮揮棒啦~ ee……………點解我好似講緊咸濕野咁ge? 上到梅田著名既綜合娛樂場所Round One，前台竟然話呢間無棒球機???? 好彩日本人既服務真係無得輸，Round One職員竟然教埋我地點去附近一間棒球機中心! 所以，就lai 左呢度啦~ Umeda Batting Dome! 意想不到場地真係唔係好大，大約只係普通觀塘工廈單位咁上下，間隔亦非常簡單，入門已是大堂兼等候區，直望玻璃牆後已經係擊球區，周圍以棒球衣，球隊logo等裝飾，牆上更播放著棒球比賽，讓等待中的朋友都可以keep住個棒球mood 點擊圖片放大 整體感覺係有d似保齡球場，不過就一切自己攪掂 好簡單，大堂中間有部機，仲要係一睇就明咩意思既機 每20球計一局，400yen，一次過買局數越多就越平 入錢，出卡，入玻璃牆後插卡入機，yeah玩得! 入到擊球區就一切自生自滅了~ 首先就要揀棍，本壘旁有數首唔同大小長短輕重既球棒，慢慢揀岩自己ga啦~ 建議平時少做膊頭運動既朋友都係用第二、三重既好d，否則因住第日40歲未夠有50肩ar，所以我有一剎那諗過用小朋友專用棒……. 如果閣下有帶私家棍既都可以使用~ 不過，睇得我呢篇文既都係香港遊客，邊個會山長水遠囉支棒球棍去日本旅行ar……你估日日野咩……….. 至於棒球帽係optional的，基本上除非你走去正面面對個發球機，否則係無可能打爆妳個頭ga……. um…….比自己支棍扑到另計 準備好後就可以望下另一邊部機，首先要插入頭先張卡，之後就可以選擇發球數目 以我玩60球為例，可以選擇發球機一次過射哂60球出lai (唔係一炮過60球呀!天馬流星拳咩!)，定係分開每20球20球咁彈出 都係果句，如果少做運動既，都係分開20/20/20啦~ 咁樣分開打仲有個好處，就係可以兩份玩~ 你先打20球，之後換你個fd打20球，共40球後慢慢吹下水互相恥笑一輪，再飲杯野hea返一兩粒鐘先打埋最後果廿個波~唔夠喉先出去再入錢玩過，唔使趕頭趕命，輕輕鬆鬆enjoy下幾好~ 「好~咁你打成點ar鋒?」 ………………………………………………………… 可唔可以skip左呢個topic……… 熟我既朋友都知，其實我係一個球類運動白痴，對所有”圓既野”同”波既野”會一d乎都無……… 所以當時既情況就係，提腳、落地、轉腰、出棒------「呼------」，係只有non-stop既「呼呼」聲，清脆既「扑扑」聲係從來未出現過的………. 如果我係棒球場上………應該會係世界上第一個10秒內三振出局的擊球手吧…….. 望住旁邊場既白領，一個個當個波係老細個頭咁大大力抽埋去，feel到佢地既怨憤之餘，仲feel到佢地斜眼望住我既微笑……. 唉真係想搵窿捐ar….. 點擊圖片放大 +5 個fd打完20球之後，同我講部機可以調較個發球位置高低 我set高左之後，即刻擦到波皮wor!! 原來頭先係部機有問題!!!哼!!!而家仲唔係到我威! 之後，大家都應該估到啦，完全係胡斐囉到冷月寶刀既感覺~ 一輪斬瓜切菜，輕鬆地打中3球，以擊球率3/20完成~ 我果然係一個進步神速既男人呀!~~ 咁樣玩左一輛，埋單1000yen約60幾蚊港幣，算係咁啦~ 錢都係其次，最重要都係體驗到呢種日本居民的日常消遣~過癮過癮~ 如果係日本夜晚食完飯悶悶地，平時返工又積埋好多壓力無處發洩既話，來打返幾個全壘打都好呀! 我講緊係憤怒方面既發洩，要發洩其他野請去無料案內所plz………… ================= Umeda Batting Dome 2 Chome-1-13 Nakazakinishi, Kita Ward, Osaka, Osaka Prefecture 530-0015日本 營業時間 : 星期一至日 11:00 – 23:00 ================ My Facebook Page :https://www.facebook.com/Garcia.in.Germany Utravel Blog :https://blog.ulifestyle.com.hk/blogger/aeolusgarcia/ Instagram :https://www.instagram.com/fung_garcia/ DCFever - Fever Travel : http://www.dcfever.com/travel/utravelogue.php?id=799202 Email : funggarcia@gmail.com 請各位繼續多多支持呀!!!!!!!!!!!!!!!
