上回講到係立食居酒屋飲完就返住處訓死左 好衰唔衰，到凌晨12點幾就醒左，又肚餓，唯有夜mama爬出去搵宵夜增肥啦 可惜，宵夜店雖仍有不少，但行到落日暮里都無一間店唔係1點半收工的 係我on居居傻更更之餘，我見到「鳥貴族」3隻大字 無錯，就係果間黃底紅字十足「大x樂」，又似7仔一樣總有一間係左近既日本大型連鎖居酒屋 講真，去到日本都要食連鎖霸權，唔係掛?但兩年前係大阪食過，味道又真係唔差wor，碟碟280円更係超吸引人之處，營業時間仲要到凌晨4點幾 唉，東京第一餐宵夜，非你莫屬啦 (網絡圖片) 兩年無嚟(其實絕對唔係同一間店)，內裡裝修一如印象中的狹窄，而且勁大油煙，基本上同置身於年初一既黃大仙同年初三既車公廟無分別 但鳥貴族既重點平身就唔係食環境，去M記你都唔會expect有紅地毯歡迎啦~居酒屋就要有居酒屋既feel (網絡圖片) 餐牌係無價錢的，因為鳥貴族最大賣點就係任何食品都係280円only 不論係燒雞串、燒雞肝、燒雞皮、芝士雞肉丸、南蠻炸雞、啤酒等等等等不論材料本身平貴，全部都係劃一收費 兩年前對日元港幣對10算，280円=$28，我就覺得價錢有點貴，但都尚可接受 ; 今時唔同往日，對6.5即係碟碟約$18蚊?就算係2016年4月既今日對7都係$20唔使!? 咁抵?????唔好講咁多，上面果d同我全部囉哂過嚟!! 囉哂過嚟既結果就係我後悔了 有無攪錯呀，串串都男人手掌咁大!仲要打孖咁嚟，邊度食得哂呀! 味道方面，唔可以expect佢有驚為天人、伙頭仔昆布式好味到癲既反應，但絕對比香港好得太多太多了! 招牌燒雞串，要左鹽燒，蔥香雞滑 醬燒雞肝，真係好佩服日本人可以將佢燒到岩岩熟兼嫩滑無渣 燒雞皮脆得嚟仍有軟滑脂香，唔會好似香港果d燒(炸?)同乾硬化 雞肉丸+芝士既組合無得輸啦 南蠻炸雞反而有d失色，明顯油溫太低變左唔脆浸雞，好彩南蠻沙律醬味道仍不俗 Ginger beer係伏來的，基本上同薑啤汽水無分別，都係要杯大生啤 先爽! 結果，我呢個宵夜就好似唔使錢咁亂咁喪叫，飽到上心口之餘個肚腩都頂到上心口 埋單都係百零蚊港幣，以居酒屋嚟講，呢個價錢呢個質素，抵到爛啦 就係咁，以增肥嚟完結我東京散心之旅既第一天啦 鳥貴族都可以話打破哂全國連鎖店=垃圾法則+平野無好野定律 不過，係日本讀過書既老友就表示 : 「鳥貴族咁貴，我地d留學生先唔會去食呀!」 其實岩既，比我係working holiday時，要我百幾蚊港紙食餐飯都真係肉赤，成張機票ga la….. 所以平與貴，富與貧，從來都只係身份與心態的主觀感受，覺得滿足，就可以了 Anyway我岩岩去完旅行真係好窮ar…………………………………… ========================== 好多靚靚地相片及無聊小故事的Facebook Page : My Facebook Page : www.facebook.com/Garcia.in.Germany 請多多支持呢~
