真男人總會和海洋結緣，無盡的深海潛藏無數的冒險，是男人的浪漫!所以有得坐船我必定Go Go Power Ranger! 上回都講過Durres都拉斯係阿爾巴尼亞於亞德里亞海的重要港口，我到此就因為一早買左船飛，在此離開停留已一月有多的巴爾幹半島，向地中海進發! 其實上回我一嚟到Durres第一件事就係搵碼頭入口係邊，明明個海旁邊!碼頭都離遠見到，但係都搵唔到點入去! 問完當地人話要係上回講個dirty沙灘旁，行到去原來係汽車入口處，咁個關員見我一個亞洲傻仔on居居都比我入去 沿住條碼頭車路行ar行ar........終於搵到郵輪碼頭啦!!! 回頭一看..........ee.......呢度咪中央車站背面............ shit等於我要由旺角去大角咀但先兜左落尖沙咀U turn呀!!!! 點擊圖片放大 +2 碼頭可以話係我係阿爾巴尼亞見過最現代最新淨+乾淨既建築物，不過仍然好多蚊 船票可以用http://www.directferries.co.uk/係網上預訂，呢個website係好似skyscanner咁可以check哂好多國家既船飛，非常方便! 嚟到去counter囉飛，再去旁邊的電腦check in就得，非常簡單 而碼頭大堂內有大量軟椅，廁所乾淨，亦有冷氣，當機場大堂咁hea都舒服的～不過都係好多蚊 夜晚11點船，Durres又真係無野再玩，好不容易悶到10點鐘就入閘啦 基本上d入閘過程都係同去澳門差不多，只係奇怪地我出境都比人扣起本passport成半粒鐘! 唔知係未見過特區護照ar，定係唔信我咁年輕俊俏竟然已經近30歲，總之又問又check，差d浸埋我本passport落本立德溶液ga啦! 出境je，我又唔係帶左一百幾廿個阿爾巴尼亞美女走佬（雖然我都想!），仲嚴格過俄羅斯............ 重點係我等緊呢半個鐘大出血係咁餵蚊!!!!!!咬到我火都嚟!!!!!得未呀X!!!!!!!!!!! 好不容易出到境，眼出現兩首超巨型郵輪! 果種好似小朋友第一次見到飛機既興奮，或者第一次見到架爛鬼貨車變成柯柏文既震撼，令你一掃10秒前仲做緊蚊飯既悲哀感覺!!! 望下右手邊隻船，略為矮身兼流線型，船尾寫住“Durres - Bari - Durres”，Woo!係你啦! 點擊圖片放大 男人對巨大既野總有d癖好，所以忍唔住舉起相機係咁影艘郵輪! 影完左邊影右邊，行前又影下，行後又影下，連私家車貨櫃車都影一輪! 好～差唔多係時候上船啦!收埋相機，囉出張飛 「先生，係隔離果隻船，唔係呢隻」 ................................................ 原來我攪左咁耐一直都認錯船..................好彩人少少，唔覺我額頭有大大個“7”字je....... 終於上到船啦! 此船樓高約6層，約比標準足球場更大。由於屬跨境長途載客兼運貨型，即係要過夜的，所以有多種房間可供選擇 單人，雙人，4人房，混合dorm都有，不過價錢當然唔係hostel咁平啦 像我這一種窮鬼，係可以選擇“軟座”同“硬座有枱”，總之點都係坐住訓!價錢都要約45€ 聽落都唔平!但只要細心一諗係包左你一晚住宿+跨國交通，就會覺得都算係咁啦! 咁究竟choose“軟座”or“硬座有枱”?求其啦~因為上到去就會發現-------根本係一樣! 兩種座位都係係3/F公眾大廳，超級多張長形梳化，長度係兩個姚明都訓得落，仲邊有人會走去坐櫈用中學生上堂式訓覺嚟過夜ar~ 上到船點會即刻訓呀～今晚係世界杯四強德國大戰巴西wor!!! 不過大家都知啦，呢場係世界杯史上最慘烈既一面倒屠殺!巴西大敗1:7，德國昂然進身決賽! 係 Shkodra篇 已經講過阿爾巴尼亞人瘋狂迷戀德國! 好彩係德國贏je，如果掉轉既，唔好話巨型郵輪ar，麥加登都同你煎皮拆骨吞落肚呀! 到時睇怕我都要搵定個排球等沉船啦..........Wilson!!!!!!!!!!!!!!!!! 而睇到德國入決賽時我都開始諗........大獲......萬一德國贏左，我咪錯過左一世人一次係冠軍國慶祝既機會!!!？？？ 但為左2分1機會太早返去又唔抵!我所有餘下日子既機票車票住宿已經全部買哂啦! 當然啦...........大家都知德國真係贏左，仲要係我住既柏林舉行慶祝大會...........旅程中最大既遺憾........ 點擊圖片放大 (其實原本既麥嘉登都幾型) 當其他大廳乘客為湯馬士梅拿入球而發癲時，我就好安穩咁坐係後面梳化～ 點解？傻豬嚟既～個個堆哂上前面睇波，咁今晚訓覺既梳化靚位咪任我揀任我霸law~ 成晚流流長，搵個好位訓點都重要過果90分鐘睇得清楚ar～ (果晚就係訓呢度，比想像中好啦) 踢完散場～1點幾咁早..........去探險lu! 其實果d咩獅子星處女星喜瑪拉雅星號我一直都未坐過，通宵過夜船只有5歲時一家人去汕頭深親坐過一次咁大把! 依稀記得果陣d船好似有老虎機，有餐飲野食，仲有機鋪tim! 呢隻船？Gameboy都無呀，最多只有餐飲部，但都只有麵包零食，想要熱食真係有難度，我好想整碗餐蛋麵呀!!!!!!! 至於其他地方，基本上都係一條條樓梯同一道道冰冷鐵門，好似廉價酒店走廊一樣乜野都無得睇 望望窗外，船仲未開，已經delay到成凌晨2點啦 睇住黑媽媽又波濤洶湧的岸邊，無甚事幹，又擔心離開太耐個背囊被人偷野 唯有返回梳化，咬個蘋果睇套戲，隱約feel到開船後不久，便昏昏沉沉睡著了............ 點擊圖片放大 (諗起都想食) 第朝，9點半左右就被說話聲同四周的咖啡香弄醒了 好唔好訓？其實經過成年訓hostel同訓火車巴士都已經好習慣lu，之不過總會驚一覺醒來有個方丈撲係我身上話要啜毒je 原定應該係早上8點幾到埗的，但尋晚delay左咁耐，無11點唔得啦～ 仲有個零鐘on居居，就去船外圍行下啦～ 日光日白終於可以望清楚艘船啦～ 船色以白同海藍色為主，保養得宜並沒太多生銹，機油味道亦不重，所以整體感覺都幾乾淨 船左右兩側都有多艘救生艇，每次見到都好想走入去望下坐下，不過真係超級大吉利是! 再走到上船最頂層，諗住坐係船頂食西北風做早餐，點知個船頂好似十號風球吹襲咁勁! 直覺話我知，想玩橫向Sky Diving既上去就無錯ga啦! 但我未想晨早流流跳海餵鯊魚住，搵日先啦～ 點擊圖片放大 +5 船頂上唔到，唯有係船尾坐下曬下太陽啦～ wa!!!!!!!!!!!!!!!!!!! 早晨既海洋果然係唔同呀!!!!!!! 亞德里亞海無邊無盡的蒼藍色，真係睇幾多次睇幾耐都唔會厭! 郵輪在遼闊大海上劃出白色分界線，轉瞬又在晨光下泛出閃爍金黃 閉上眼，海風的清爽，陽光的微溫 雖在船上，卻如躺於海上，被生命之母擁抱著 點擊圖片放大 +4 這時 耳內MP3曲風一轉，由西野加奈婉約的天籟，轉為雄壯激昂的魔盜王主題音樂! 剎那間，只覺大海遠處風起雲湧，眼前盡是波濤怒嚎，胸中豪氣頓生，雖千萬人唔往矣! 心中一把聲音狂叫 : 去大海啦!去大海啦! 不由自主仰天長嘯!“嚟啦加勒比海盜!!!!!!!!!我同同伴係唔會放棄ga!!!!!!我要做海盜王!!!!!!!!!!” 「喂，落船啦～」 .......................................... 幻想下都得掛........... 點都好啦，意大利!我來了!!!!! 但排好耐隊入境ar喂............. 點擊圖片放大 +2 (到啦喂) 點擊圖片放大 ==================================== 補完此Blog上未成文的相片和無聊閒事: My Facebook Page : www.facebook.com/Garcia.in.Germany ，多多支持呀!~
