北歐及波羅的海之旅終於來到尾聲。 最後兩日，我離開Vilnius去左兩個地方，首先係上回的Hostel夫妻推薦既小鎮Trakai! 距離維爾紐斯只係一小時車程，車費唔使$100 整個鎮大約只係油尖旺+紅磡咁上下，由數個湖中小島以木橋連接而成，而冬天則冰連接啦，我見d居民泰然自若係湖面行嚟行去，我就真係唔夠膽.......唔係怕落水，係對鞋行唔到冰ar.........不過都可以想像到夏天時泛舟湖上係幾咁詩情畫意～ 最主要景點是湖中心的宮殿，圍住行一圈唔使10分鐘 內部唔算特別靚，只係有d鬼武者+刺客教條感，反而外觀睇落唔錯!儘管我有d懷疑只係我出嚟後突然天晴而已........ Hey!天氣佔旅行好重要一部份ga ma~總之呢度真係靚同值得花兩三個鐘一遊嚟就得啦～ 點擊圖片放大 +4 之後我到左是次旅程既最後一站，立陶宛第二大城考納斯Kaunas 地理上Trakai去Kaunas係近d的，但實際交通上先返Vilnius再去係快d同車密d的 同愛沙尼亞既Tartu一樣，第二大城都係一個大學城，有趣既係此地非常規劃able，新城區街道縱橫交錯井井有條，少有地我覺得比舊城區更有趣呢 點擊圖片放大 +2 整個Kaunas有幾樣野我覺得幾值一看的 首先是位於舊城區最西邊的Kaunas Castle + Santakos Park，唔講唔知，呢處係立陶宛兩條大河流Nemunas及涅里斯河及的交匯處 幾靚! .................................無其他形容嗱？？？？？ 係呀，咪幾靚law，唔夠咩？ 點擊圖片放大 +3 另一個係位於舊城區既“惡魔博物館”Devil Museum 內裡收藏左世界各地關於魔鬼、妖怪的形象公仔及相關傳說，但絕對唔係渲染迷信! 反而係用正視客觀既角度，去分析這些妖魔鬼怪傳說如何影響人類既歷史、文化同生活，其實係幾有趣的! 甚至你會發現，魔鬼大多有既定形象，但又大同小異，從而比較到世界各地文化的差異～ 恐唔恐怖？我會覺得樓梯間既世界各地大師所繪的惡魔壁畫令人心寒d law........... 但我作為惡魔教眾------聖飢魔II既忠實fans，呢d碎料je～嚇我唔到ge~~~ 點擊圖片放大 +4 （聖飢魔II為日本著名視覺與實力見稱的搖滾樂團組合，各成員自稱惡魔但玩野居多，外觀似玩death metal實際係heavy metal，由主音到吉他手鼓手，所有成員均有超一流的頂級技術，是J Rock界中的神級存在!著名歌曲有“蠟人形之館”、“地獄之皇太子”、“白之奇蹟”等等............痴線講咁多做乜ar又無人想知!!!但我真係好想寫ga～～～～～～XD） 回歸正題啦～仲有個值得去既竟然係大型商場Akropolis! 大細與海港城+LCX相若，有不錯的裝修設計及大量特式商店餐廳，仲有ice hockey睇tim 不過最吸引既都係地下的大型超市! 在此可以一眼睇哂所有立陶宛既特式食物，而立陶宛本身的生活指數極低，如果似我對煮食有興趣的話，呢度簡直係天堂! 點擊圖片放大 +3 就係咁多～個人認為Kaunas係一個值得嚟玩一日既地方～ 立陶宛我去過既4個城市，Klaipeda、Vilnius、Trakai、Kaunas，4個都各有特式，而且遇到的人大多親切友善，雖也有明顯想搵你笨既，但絕不是傳聞中九反地帶! 我同Kaunas間hostel既host傾偈時，提及有人話「波羅的海3國由北開始，越向下越危險」，佢眉頭一皺搖搖頭說“Nonono!Lithuania is very safe! Latvia is much more dangerous!”基本上呢一點我係同意的 又多野睇、野又好食、物價又低、人又友善，好難唔鐘意呢度wor! 如果要旅遊既話，立陶宛我真係誠意推薦，特登飛嚟玩下都唔錯～ 立陶宛時間2014-02-18晚23:45，係hostel吃完晚飯後，負上背包，走過夜燈的街道，來到Kaunas中央巴士總站 至此，我終於完成凍到入心入肺但又靚到精彩到痴線既北歐及波羅的海之旅! 由2014-01-16於瑞典斯德哥爾摩開始，走到北極圈的Kiruna、挪威Lofoten Islands及芬蘭Rovaniemi，再南下到赫爾辛基、俄羅斯聖彼得堡，然後於愛沙尼亞、拉脫維亞及立陶宛各瘋走了多個城市區域，中途更到了神秘的俄羅斯飛地加里寧格勒，共7個國家18個城市! 計埋之前既德國中南部之旅，我已經連續旅行了兩個多月! holiday夠皮，係時候回德國working la! 之但係首要捱過呢程由Kaunas回柏林長達16小時既巴士呢................ 早前唔係寫過篇長途車的自處http://www.utravel.com.hk/member-blog/aeolusgarcia/ADsRYxEtA3IMKg/ ga咩？你得ge阿鋒................/_ =================================== IG果邊間中會有d和Blog及fb page不一樣的相片和story，大家有興趣既去follow下支持下啦~ Instagram : https://www.instagram.com/fung_garcia_backpacker/ ============================== 我既Youtube Channel正式開通啦!!!! 快d Click入 「鋒加西亞 / 旅人瘋語」Subscribe 睇片再禁個like啦!~ ================================= Email : funggarcia@gmail.com Facebook Page : www.facebook.com/Garcia.in.Germany 文章同時刊於UBlog、 DC Fever Travel、 Blogspot 、遊牧爆谷、Medium，請各位繼續多多支持呀!!!!!!!!!!!!! 鋒加西亞 - 德國工作假期後的世界流浪
