韓國剛剛過了櫻花、油菜花的季節,以為暫時再冇花睇,你錯喇。如果近期會去釜山嘅朋友,有個好地方想介紹俾你地,令花痴們一定會有新驚喜,因為嗰度可以繼續同啲花無限J圖,J到天荒地老,仲可以見識到韓國情侶可以有幾sweet,是什麼地方啊?咪就係蔚山(ULSAN)的玫瑰花祭。 其實每年嘅五月喺韓國各地都有大型嘅玫瑰花祭,而一個對我們香港人比較陌生嘅地方-蔚山(ULSAN),更加係其中嘅表表者,呢個玫瑰花祭喺韓國係好出名,好多韓國人都會係星期六日專登揸車去睇玫瑰花。我係搭火車落釜山嗰陣時已經見到超多嘅廣告,不過全部都係韓文,我就係因為睇到呢啲廣告,所以就search下究竟係咩祭典,一睇就俾佢的無敵靚靚玫瑰花海所吸引住。於是今次去釜山特別加左呢個行程。記得蔚山玫瑰花祭,係超出名,好多韓國人是專登去,所以如果喺星期六日去的話,一我會建議你早啲出門口,二係唔好揸車去,因為排隊泊車會排到你天荒地老(其實韓國嘅公共交通工具又平又好搭,真係唔需要自駕遊),三係要有心理準備會見到人山人海呀! 來釜山旅行,除咗可以去甘川洞文化村、太宗台、天空步道這些基本觀光的地方之外,一定要去個近郊來個小旅行。其中一個我強力推薦一定要去的地方,就是每年五月尾在蔚山大公園舉行的玫瑰花節,保證你會有意外驚喜,而且絕對係私房景點,識去呢個地方嘅,大部份都係韓國本土人,遊客係寥寥可數。今年在五月十九至二十七號,一連八日,蔚山大公園舉行超大型嘅玫瑰花祭,除咗有過十萬朵不同顏色盛放中的玫瑰花俾你欣賞之外,仲有極多嘅手作仔攤位,又有人載歌載舞表演,氣氛係超正,成個嘉年華咁,所以假如你近期會喺釜山千祈唔好miss 左呢個地方。 我哋係由釜山去蔚山作一日的day trip,去蔚山可以在釜山站搭KTX去蔚山,不過我會建議大家可以在釜田站撘無窮花號去太和江(來回車票只是₩7600, 好抵去)首先因為釜田站係喺西面站過一個站,而且佢外面的釜田巿場內有一檔食飯卷早餐係超正,再加上太和江站離蔚山大公園南邊入口大確只是二十分鐘左右的車程(我們去程是撘的士,只要₩12000), 所以係比直接去蔚山KTX站方便。 由釜田去太和江站,大約一小時二十分鐘左右的車程。因為真係好多人會去蔚山睇玫瑰花,同埋去蔚山的車每小時只有一班,所以記得買火車飛嗰陣時,順便買埋回程,我買嘅係09:46由釜田田站出發去太和江,回程就買17:28由太和江回釜山,因為今次目標只係去睇玫瑰花,我覺得時間係絕對充足嘅,可以慢慢行,慢慢影相,同埋仲可以慢慢食個啊午餐,一啲都唔rush, 可以好relax! 記得如果係搭的士去蔚山大公園,一定要同司機講你係要去南門,因為蔚山大公園係超大㗎,或者你唔放心可以同司機用廣東話講薔薇(韓國玫瑰花嘅叫法),咁佢就一定會送得到你去,玫瑰花祭嘅入口。 我們會先經過紅色玫瑰花花門。經過溫室向左轉。再見到黃色花門,我們到達玫瑰節會場 一落車已經見到好多生到好似拳頭咁大嘅玫瑰花,而且真心真係好多人,咁就仲好,一定唔會迷路,因為只要跟着人群行,你就會見到玫瑰花祭嘅入口,一見到呢一個玫瑰拱橋就係玫瑰花祭嘅入口啦。入公園係免費,不過入去玫瑰花祭就要比₩2000, 仲可以自由出入,買飛嘅地方係入口附近就已經見到啦,你幾多個人就同佢講幾多個人頭,因為佢只會出一張receipt俾你,你睇下上邊嘅錢係咪對應你嘅人頭數目就得㗎啦。 一入到去會場你一定會比玫瑰花海嚇親,因為佢真係超級多,超級大而且超級多顏色,最常見嘅粉紅色黃色白色嘅玫瑰一定會喺度出現啦,就算連好罕有嘅moonlight, 淡黃色,紫紅色的玫瑰花都可以見到,而且全部都係盛放中,我咁大個都冇見過成個拳頭咁大個嘅玫瑰花,真係好靚好震撼! 點擊圖片放大 +2 喺玫瑰花祭裏面仲有好多decoration俾你去影相, 如果係同男朋友來,簡直係超多嘅地方俾你影啲好sweet嘅相,又有心心又有戒指又有雲雲,又有好多五顏六色的玫瑰花牆,玫瑰花隧道,而且顏色選擇又多,絕對係一個拍拖嘅好地方吧,真心覺得韓國人係呢一方面絕對係expert, 佢哋好識怎樣可以拍出超可愛的相呢。 喺場內會有一啲小食亭同埋小cafe, 不過我見得最多人係帶自己嘅嘢食來野餐,因為呢度有好多草地和小平台可以俾你鋪野餐布,如果唔覺得太重,我會recommend大家可以好似韓國人一樣來野餐,對住一大遍玫瑰花海食嘢真係好有feel㗎和好relax, 同埋現在韓國的溫度是很舒服,完全適合野餐,再加上香港真係冇咁嘅環境比大家享受生活,來旅行等係要放鬆放慢腳步比自己休息一下PS喺太和江火車站係有CU和DONUT,可以喺呢度買定啲嘢食入去玫瑰花祭)。 成個玫瑰花祭會埸面積並不算特別大,不過因為真係好多地方都可以影相,如果你好鍾意影相的話,留大約四個鐘左右是冇錯, 不過期間都仲有好多活動表演,又會有人唱歌跳舞,所以都幾精彩,同埋我見到好多cosplay的人,佢哋係超級有心機,所以慢慢欣賞下啲節目,影吓相,嘆下花茶,一日就係咁過喇。喜歡花嘅你,真係冇Miss Out蔚山大公園玫瑰花節,因為真係超正! PS 回程因為實在太塞車,太多私家車排隊入停車場,我哋搵唔到的士,最後喺對面馬路撘巴士748號,可以直接返去太和江的火車站,車程大概一個鐘,總算都叫做搭過韓國嘅巴士啦。 有興趣可以click入我的YouTube: https://youtu.be/65Xbvdc6BRU