今次去大阪為咗慳時間,同埋可以玩到最盡,所以揀左搭紅眼凌晨機,CX 566,凌晨1:45起飛,清晨六點鐘到大阪(實際上五點鐘就已經話將會降落),雖然好眼瞓,但真係可以用到盡啲時間。不過香港飛大阪實在太短程,連起飛時間只係得三個半鐘,就算一早上機抱頭大瞓,其實都唔係好夠瞓, 不過為咗玩辛苦啲都要。 國泰嘅紅眼機都會派餐盒,大多數係起飛之後就會派,如果等到佢派個餐盒,咁又唔夠時間瞓,但係瞓着咗,又會skip左唔派,所以有個tips俾大家,大多數我坐紅眼機,一上到飛機就會同個crew講,麻煩一陣間將個餐盒放喺我個枱面上就得,佢就會照派餐,你又可以瞓覺,而瞓醒咪就係有少少野可以食落肚囉。雖然個餐盒裏面只有一個三明治,一個蛋糕,一杯生果(生果係唔可以帶入日本)和維他檸檬茶,但係好過冇得食吧。 今日嘅行程目標係去大阪萬博紀念公園和expocity,由關西機場去萬博首先要撘火車出大阪站,然後行過梅田站(大阪站)轉御堂筋線到千里中央,跟著要出閘,行去撘大阪單軌電車(在千里中央站上一層),去到萬博紀念公園站,一出去就可以見到太陽㙮。我07:30在關西機場買JR火車票(無撘南海電缐),一直到10:30先至去到萬博,其實真的蠻遠(因為上左架普通火車,又太眼瞓所以迷左路)。 今次我係帶埋件行李去萬博,日本有樣arrangement非常之好,就是每一個車站都會有儲物櫃,大行李的locker只係需要700円,而細locker300円,就可以放足一日,咁咪可以唔使先返酒店再出去。如果你想再方便啲,而家喺大阪關西機場,都有行李宅急便服務,大行李大約1200円就可以寄到你嘅地址,普遍都係即日可以收到行李。一落咗機,喺右手邊就可以見到有幾家嘅宅急便,詳情你哋可以去問返櫃檯。 晨早流流來到萬博,連高達餐廳都末開門,一於先去expocity mall shopping, 呢個係大型shopping mall, 成個太古城咁,足夠我們行一日,而且人流唔算超多,行起來好舒服,鋪頭種類都好多,買衫買鞋嘅地方一定有,家品鋪,露營鋪,同埋一啲好文青的鋪頭都有,裏面有超強free wifi, 總括來expocity 算是好好行的mall。不過記得這裏不是outlet, 冇咩特價優惠㗎,買嘅全部都係當季款,所以如果你係搵outlet, 呢度就唔啱你啦。 GUMDAM RESTAURANT, that’s so cool!! 一入裏面有間超大的loft, 亦有好多唔同牌子的衣服,亦有間大型supermarket亦Nike, Adidas, puma, 還有作為貓奴的我最喜歡的寵物用品店,正呀,可以大量入手貓貓的零食,如果你有貓貓,highly recommended 要在日本大量入零食的貨,因為D貓貓絕對crazy about 日本產的食物。 哈哈今次係日本樓左好多貓帽帽返嚟,有兔仔有蛋亦都有花花,我即時俾我啲貓試,係咪好可愛呢。(其實佢心裏面鬧足我成晚) 「這是一所紀念1970年 “日本萬博會"的公園,是將原萬博會會場改造而成的"為綠地所環繞的文化公園"。占地總面積260公頃,園內有"日本庭園"、"自然文化園",是集文化、體育、休閒、住宿等設施於一體的大型綜合公園。"自然文化園"以岡本太郎設計建造的博覽會標誌建築--"太陽之塔"為核心,西面是森林和山村,東面則是象徵平原的綠色草坪。」 營業時間: 9:30~17:00(最後入園時間至16:30止) 公休日 每週三(如遇國定假日則順延至隔天) 我哋今日嘅重點係要入去萬博紀念公園睇太陽塔,冇錯,咪就係出現喺漫畫21世紀少年果座太陽㙮。果座高高瘦瘦白色上面有個雀仔面,又有兩對翼,再加上前前後後嘅太陽,以design來講佢都算係好前衛,個人覺得佢好騎呢,呢一座塔其實係70年代嘅產物,依家睇返一啲都唔覺得佢out,果然好嘅藝術品設計,是可以經得上時間嘅考驗吧。 今年太陽㙮裏嘅生命樹係喺四十八年之後第一次重開,令到佢又再次成為IG上邊嘅HOT ITEM, 個個人都爭住入去生命樹。如果係假日啲預約,一早就要預約定下一個月,佢係一個超熱門嘅景點嚟㗎,有興趣嘅可以click入 (但係只有日文,google translate 幫到你) http://taiyounotou-expo70.jp/guide/reserve/ 如果你冇興趣入去裏面睇生命樹,只是去睇太陽塔就只係需要比萬博紀念公園嘅入場費250円,喺門口買飛就得㗎啦。 太陽㙮前後有兩張唔同嘅面,佢哋嘅面貌好似象徵光明同埋黑暗,而喺上邊就有一個金色嘅面,傳說中第四塊面就係喺太陽拍嘅生命之樹裏。喺萬博紀念公園任何角度都可以見到太陽㙮,佢簡直係你四周圍出現。 太陽㙮裏面的四個面分別係:象徵未來的黃金之面,象徵現在的太陽之面,象徵過去的暗黑太陽之面同埋足足隱藏了48年的地底太陽之面。 入嚟萬博紀念公園,除了看太陽㙮之外,其實都係一個非常之悠閑嘅公園。首先係櫻花盛放嘅季節,佢係大阪賞櫻嘅熱點,有長長嘅櫻花迴廊,再加上太陽㙮簡直係一絕,在櫻花盛放嘅季節又會舉行櫻花祭,係一個非常之熱鬧嘅景點。可以帶點小食果酒同埋野餐巾,係櫻花樹下野餐,感覺超正吧。我們是在四月上旬到萬博,其實已經過左櫻花季節(2018櫻花超早開),不過非常lucky, 竟然被我們發現仲有八重櫻盛開中,超開心啊!八重櫻果然是華麗的代表,成棵樹都係粉紅色仲要係大大朵的櫻花,仲要棵樹唔係好高,perfect for J 圖。 我仲喺度搵到有啲位可以同太陽塔和鬱金香一齊合照,果然太陽㙮is everywhere! 除左意外見到盛開中的八重櫻花之外,四月份係鬱金香嘅季節,在萬博紀念公園可以搵到一大片非常靚嘅鬱金香田,日本人種花真係好有心機,我哋見着當有鬱金香冇咁靚嘅時候,佢哋就換咗啲新嘅鬱金香落去,成個鬱金香田除咗有普通嘅紅色黃色橙色之外,都仲有一啲好特別嘅顏色同埋雙色嘅鬱金香,果然春天係一個充滿顏色嘅季節。 行完萬博紀念公園梗係要補充體力,四月係士多啤梨嘅季節,我哋決定去食返一個士多啤梨嘅下午茶,酸酸甜甜嘅士多啤梨果然可以令我醒神晒。 萬博紀念公園係可以消磨你三四個鐘頭嘅地方,而且佢仲有摩天輪,再加上一個水族館和一個超好行嘅expocity,絕對可以俾你玩足一日,而且係好適合扶老攜幼。 有興趣可以follow我嘅YouTube: https://youtu.be/dHIf1d2Zh54 IG: terricatcat