呢幾年大阪環球影城喺一月至六月都會舉行COOL JAPAN呢個特別節目，即係話除咗有固定個幾個主題天地，仲會搵幾個日本好Hit嘅動漫做主題，整下啲遊戲，出下啲商品，咁樣吸引我哋呢啲宅女宅男去玩去買，果然日本人係好有諗頭㗎！今年嘅主題有名偵探柯南，monster hunter, final fantasy, 仲有我由細到大中最鍾意嘅SAILORMOON美少女戰士，有月野兔、小小兔、露娜、阿提密斯，仲有我最鍾意最鍾意嘅初戀情人禮服蒙面俠，wow咁個樣唔係唔去大阪環球影城呀？唔去都對唔住自己啦！ 不過去大阪環球影城真係需要銀包好豐厚，因為真係會使到你破產㗎！首先去玩cool Japan美少女戰士你係需要買一張大阪環球影城嘅飛，咁呢度就係大約HKD570, 為咗唔使排隊兼且可以同禮服蒙面俠來過奇蹟的相遇，咁就要買個 SAILORMOON SPECIAL EXPRESS, 呢度又洗咗¥4400， 唉都未買紀念品，咁就差唔多洗咗成千蚊港紙啦，係咪係高消費項目呢？不過難得可以同SAILORMOON有咁近距離接觸,咁都抵嘅, 只可以返到來我要努力工作，搵返啲錢返嚟！ 好啦喺呢度可以教下大家買SAILORMOON SPECIAL EXPRESS的方法和裏面包括左啲咩項目。首先，你可以係指定嘅時間，唔使排隊嘅情況之下就玩得到SAILORMOON嘅4D影院，同佢一齊替月行道，警惡懲奸，將啲壞人消滅拯救大阪環球影城，仲要係立體版，即係SAILORMOON 會係你面前4D華麗變身, 係咪覺得好吸引呢！跟住仲會包一張拎住時變身團長影嘅相（散買其實都要2000幾Yen ），而最重要係你可以喺畫左嘅時間同禮服蒙面俠來個奇蹟的相遇，最後佢仲會包一個細細個的露娜P糖果盒（我個人覺得好靚㗎，而且冇得散買）。所以呢一個express pass 都算係幾抵買。 咁究竟要點買呢？首先你要做咗日本環球影城嘅會員，填嘅資料全部都係日文，包括左你嘅名都係要用平假名，唔識日文唔緊要因為我都唔識㗎，呢啲時間Google Translate就可以幫到你啦，總之有啲心機逐個逐個去譯返做日文，自己就copy and paste咁樣去幾番低D資料，就可以做到會員。做咗會員之後就可以入去環球影城官網買SAILORMOON SPECIAL EXPRESS, 記得要緊揀啱自己入場日子，同埋想玩嘅時間，因為要係指定嘅時間裏邊玩先至得，過咗時間咁張飛就會作廢㗎啦。揀完晒就可以俾錢，恭喜你，因為用左少少effort, 所以4400 Yen搞掂。 呢個POPCORN盒真係好多人排着隊咁買，不過又真係好靚好精緻，絕對係值得¥2200買啊！SAILORMOON 的粉團，一定要擁有一個吧！ 今次COOL JAPAN SailorMoon, 除咗玩之外仲有好多精品可以買，其中最靚同埋最值得買嘅就係水手服炮谷盒（¥2200，其實真係好貴呀不過又好靚），你一入場直行就會見到呢一檔買水手服炮谷盒嘅檔口，早啲買就唔使排咁耐隊，而且佢係每日限量，即係話太晏過去會買唔到，而且每人每次只係限購一個，所以有朋友一齊嚟就算唔想買炮谷都叫佢一齊排下隊。呢個炮谷盒咁靚，成個手袋咁，真係唔捨得來裝炮谷，咁你就可以叫佢唔好將啲炮谷擺落個盒，可以分開放喺兩個炮谷筒，咁你咪可以keep到一個靚靚嘅水手服炮谷盒，影相上鏡真係一流！ 點擊圖片放大 呢啲全部都係今次嘅戰利品，係咪好靚呢特別對耳環我好鍾意㗎！ 除咗水手服炮谷盒之外，今次環球影城同SAILORMOON CROSS OVER左好多精品，其中最經典嘅咁呀梗係變身棒，你可以拎住支棒入場同sailormoon 一齊拯救地球。跟住仲有啲好靚嘅頭飾啦T恤行李牌耳環，仲有好多糖果文具，總之你諗得到嘅精品佢都有出，不過有啲飾物，好似銀水晶頸鏈，變身棒耳環就已經賣斷市啦，如果要就要訂貨不過佢規定要有日本嘅地址先至可以俾你定，咁就有少少難度啦。 ❤️❤️❤️❤️❤️❤️❤️❤️ 同禮服蒙面俠奇蹟的相遇係成個program最值得highlighted嘅地方，佢嘅地點係喺spiderman附近嘅一個special Hall, 出邊係會貼左禮服蒙面俠嘅poster所以都好易搵。就算你想即場參加佢都唔會受理，同禮服蒙面俠係唔可以GOSHOW㗎。我去嗰日就係有兩個女仔想即場參加都比工作人員拒絕，所以一定要買special express。咁係指定嘅時間你就會入場，喺出邊就已經有啲花美男同你講解之後嘅流程，首先你係會單獨入房同禮服蒙面俠見面，係過程之中你係唔可以錄影或者live（務求要保證神秘感喎），咁禮服蒙面俠就會同你有少少互動啦，然之後就會用你嘅電話影張相。 OK, 聽落都冇咩特別，不過玩完之後真係有啲心跳嘅感覺。自己一個入到去，啲燈光較暗左，跟着禮服蒙面俠會突然之間出現係你面前，佢好情深深咁樣望住你的眼（呢下真係有少少怕羞），跟住會講嗰啲對白（好可惜我唔識日文唔知道佢講啲乜嘢不過同行朋友話佢應該係講返第一集佢見到月野兔嗰啲對白），跟住佢就會拖住你隻手（羞羞）咁樣行去枱上邊同你影張相，成個過程大約2分鐘左右啦，不過已經夠回味㗎啦，同埋將童年嘅夢想實現左，哈哈哈！ 同禮服蒙面俠奇蹟的相遇之後，我哋轉個彎就去影埋張地圖做背景嘅美少女相，果枝權仗將佢哋真係好真而重之咁樣擺喺絲絨cushion上邊，工作人員係會帶着白手襪去拎枝權仗着俾你，跟住幫你擺好姿勢執好晒成個樣，總之就真係好整整齊齊今日幫你影張相，真心覺得日本人好認真。其實同埋朋友一齊影呢張相真係好開心，好有少女情懷！咁樣我哋就結束左一個朝頭早嘅SAILORMMON 之旅，除咗食唔到sailormoon Cafe裏面啲嘢食之外,其他大致上都好順利，如果你都好鍾意水手服戰士真係唔好錯過今年嘅大阪環球影城！
