有冇遇過平日番工密實到30度都仲著住長袖衫、剪晒齊陰嘅女同事，靜雞雞話你知放工去學pole dance? 我當然唔係其中一個啦！雖然我光明正大唔怕羞咁周圍話比人聽我去上堂，但話晒真係人生第一堂時都好淆底，仲要呢個experience 真係特別到呢⋯ 話說呢間studio 係位於鵝頸橋附近一橦唐樓的二樓。Google 地址時冇大廈名都心知不妙，點知去到就見到係門口窄窄又暗到死果種，仲要冇lift！（內心已#%@*&），一上到去見到開住門的舞室，miss係廣東話人，勁tanned、肌肉健美小姐type，著住shocking pink 超熱褲、粗黑眼線配無匡眼鏡，仲要講野係豪邁大聲！心諗真係OMG, studio相片與事實咁不符！ 怕羞地熱身 最初，雖然我已有備而黎著晒sport bra 打底，但始終有自知之明，唔慣咁光地著咁少布又極大動作咁肥肉fing fing，熱身時死都唔肯除面果件長袖衫（miss 已經講左幾次一陣上pole會唔方便）。我諗因為之後嘅動作都要幾柔軟，所以熱身的拉筋都幾全面同比較難，尤其著重大腿臀部，做完都出晒汗。 上pole後估個miss 唔到 之前聽朋友講，第一堂上鋼管舞，通常都係捉住條柱郁兩下就落堂，唔好諗住有得上pole做動作。呢個Miss 大大聲聲，又露晒心口，唔講真係有d一樓一feel（得罪晒XD），我心諗一定比其他普通studio仲流。點知一開始佢就過幾招比我地喇！local 有local好，句句精警嘅四字口訣，一點即明！手勢要「上拉下推」- SPIN時上面隻向自己方向拉, 下面隻手向外推, 就可以順暢地自轉; 上pole後的速度「上快下慢」- 當身體伸直向上時加速, 向下踎低時減速。最重要係，佢嘅示範快慢兼備，多角度重複示範！而且，發現佢原來係幽默輕鬆派，好多gag, 上堂時好多笑位!! （同埋佢會令係豁出去除淨bra top 同短褲） （張相係濛左d) 最後，我地學識左單手離pole上下自轉，更有做埋單靠腳夾pole、雙手大鵬展翅嘅動作！勁有成功感！！！ 總結 凡事要了解清楚先好下判斷，雖然冇裝修設備，但地點都幾方便，time square 對面；雖然miss 唔係elegant type,但佢好有實力又解釋得清楚易明！令我真心想去多幾堂，學多幾招。 整體評分(5♥ 最高分) 服 務: ♥(得miss 一個，冇咩服務可言） 環境：♥ （得一格廁所，唐樓上真係幾差） 衛 生: ♥♥♥(有酒精提供抹pole) 導 師: ♥♥♥♥（有驚喜） 收 費: ♥♥♥♥ （算多package 選擇） 有趣度: ♥♥♥♥♥ （好有成功感） 難 度: ♥♥♥♥ （難精） Like my Facebook!! ♥hapife facebook♥ Visit my Website!! ♥hapife.com♥
