無打blog嘅原因係有野忙，忙住返工同埋忙住plan 露營車北上之旅。 今日分享嘅係工作上嘅濕尻見聞。 以為黎到澳洲working holiday ，做野方面應該係慢過香港嘅節奏，舒服過香港先岩，之但係世事往往都好現實。 的而且確節奏係慢過香港，但係只係限定澳洲人士，同我地國內嘅同胞都係慢活人生，正常香港嘅速度我應該兩粒鐘可以KO哂，而佢地可以攪足一日，仲要俾佢地屌返轉頭，「做咁快做乜春，慢慢做，唔好急，得閒要飲多啲水，保持身體有足夠水份，佢出糧，我地唔駛開Turbo 博命工作。」 聽完之後先明白，金錢係同工作效率係脫勾。要懂得work life balance。 某程度上係岩嘅，我又唔係要博上位升職，chur 到咁勁做乜，一陣做哂啲野無野做企係度R袋就唔好睇啦。 但我又無同胞們嘅無賴，所以我都係將自己做嘅速度'硬班班'咁減慢去迎合依一邊嘅慢活工作文化。 以為香港職場瀉膊出現多， 而依一度我都領過唔少死貓，大部份都係國內同胞no look pass 咁張個波交左俾我， 而佢地掌握嘅時間岩岩好，好多時候都一野華麗轉身咁避開個波，有事就永遠said no。不得不佩服。 Working holiday 想單純啲做啲簡單野開心下姐，可能係我單純姐，要準備出發嘅朋友可以唔好抱咁多美好嘅想法會好啲。 今日打住咁多濕尻工作見聞。
