好多人話科技將會取代好多唔同嘅白領工作,會計係其中最危險嘅工種之一。為左避免被淘汰,而家點都要花多啲時間同心機留意下科技發展。趁而家寫多啲文,希望可以發展做副業。咁就算有一日我冇得撈,都仲可以透過寫關於會計科技賺錢。我未來嘅KOL 之旅,就由呢篇一系列嘅會計軟件比較開始啦!!!咁第一篇就分享下兩款香港小微企好常見嘅會計軟件 (Xero同埋Odoo) 啦。一齊睇下究竟Xero同埋Odoo好唔好?首先,等我解釋下我對於小微企 (Small and Medium-sized Business) 嘅定義先。我覺得小微企 (SMB) 係員工少於 10 人或者每日少於 10 個交易額嘅公司。 Photo by JESHOOTS.COM on UnsplashXero:新西蘭嘅雲端會計之王Xero係一間主要研發雲計算會計系統嘅軟件公司,總部係紐西蘭威靈頓,但係澳洲、英國同美國都有分公司。Xero Accounting Software以友善嘅用戶界面同埋超平 SaaS費用而出名。香港有好多小型Audit公司都係用Xero 做野。 優勢:平 SaaS費用 (有啲plan仲係免費);軟件都穩定、成熟同冇太多bug;簡單易用嘅外觀界面;滿足一般小微企嘅財務報表需求;Xero強調安全性,用雲端存儲所有數據,並使用強加密來保護你嘅資訊安全。缺點:雖然Xero雲端功能強大,但在移動設備上嘅體驗冇電腦上面用咁流暢;處理常規以外嘅狀況能力比較差;大多數Xero 係香港嘅合作夥伴都係啲經驗唔多嘅startup或accounting公司,所以佢地通常都提供唔到太專業嘅服務,因為佢地大多都唔係IT人。Odoo:全能嘅業務管理解決方案Odoo,就出名靈活性比較高同埋可以客製化,仲有廣範嘅功能(好似CRM,銷售,庫存,製造,會計,HR……),加上近年鋪天蓋地嘅的士巴士廣告,成為左唔少SMB嘅選擇。 優勢:免費! 免費!! 同埋免費!!!高度自定義同靈活:可以話Odoo嘅核心優勢係可以自定義好多野,你可以根據需要添加或者修改特定嘅功能模塊 (不過呢個同時係缺點,一陣我就會講);Odoo嘅會計模塊有全面嘅會計功能,例如應收帳款、應付帳款、銀行對帳等等;Odoo仲提供左辦公室管理、項目管理呢啲模塊,令公司資源嘅管理更加順暢;如果你要更多功能,Odoo仲有一個應用市集 (好似app store咁),你可以搵到好多第三方嘅plug in。缺點:硬件需求比較高,可能需要有專門(即係勁啲同貴啲)嘅伺服器硬件 (唔好問我點知,係我個IT同事同我講嘅);好多第三方嘅應用程式/ plug in都係獨立寫嘅,所以佢地之間係唔相容嘅;Odoo可以自定義好多嘢係好,不過如果你公司而家冇programmer或者冇諗住請programmer,咁Odoo嘅自定義同靈活程度就唔太理想 (因為好多都要programmer先識搞);仲有如果你諗住做免費仔,咁就預左冇任何support都得架啦。因為Odoo雖然有好多partners可以幫你做customization同解決你啲日常問題,但佢地嘅收費都絕對唔平囉。點為你嘅小微企揀啱嘅會計軟件?Xero適合要求及時財務管理同有較高資訊安全需求嘅企業、Odoo就適合希望可以全面管理公司唔同部門,又肯花時間同金錢去深度定義軟件嘅企業。經營小微企時,有一個了解同有效管理公司財務嘅工具好重要,佢就係會計軟件。每一款都有佢出色嘅地方,企業可以根據自己嘅需求同埋預算去決定一套會計軟件好唔好。在市場上各種會計軟件琳琅滿目,點先揀到最啱你公司嘅呢?以下係揀會計軟件個陣可以考慮嘅幾個關鍵因素。了解你嘅需求首先,了解你嘅需求。仔細分析你公司嘅結構、規模、行業以及會計需求。做好尼個步驟可以幫你篩選邊種類型嘅會計軟件最啱你。功能有啲會計軟件提供了綜合性嘅解決方案,包括付款管理、接收報表、產生發票、銷售、採購……。咁你其實又需要邊啲功能呢?唔好買左啲冇用嘅功能,整個表出黎列明你嘅要求先去揀軟件就容易啲比較啦~易用性揀容易學同埋用嘅軟件都好重要。咁你同同事可以更輕鬆咁做野,慳翻啲學新系統嘅時間。售後服務無可否認,用新嘅軟件可能會遇到挑戰 (都唔係可能,其實係一定有困難),特別係set up同學習過程。所以,揀一款提供出色客戶服務嘅軟件都好重要。預算買新軟件,你當然要諗預算。比較你對於會計軟件嘅期望、需求同埋需要嘅功能,揀一款最符合你預算嘅軟件。揀一套啱嘅會計軟件要花時間同精力又要貨比三家,但係尼啲研究都係值得嘅。因為之後你做野方唔方便,快唔快手其實好睇個系統好唔好用。不過其實講到最後,用邊一種會計軟件都好,最重要係幫到我地做野快手啲。我地會計人要求都唔高嘅,唔洗OT咁耐又冇出事又唔會down system就得啦。