近年疫情橫行，市道低迷，唔少網友都表示慘遭公司裁員丶痛失飯碗，淪落到要去會展炒散賺錢，不過亦有唔少網友借住呢個機會學識網上投資，除咗傳統嘅股票之外，隨住NFT同區塊鏈技術嘅興起，唔少人都開始關心虛擬貨幣投資丶炒賣嘅話題。講起區塊鏈，學識投資分分鐘仲好賺過出去做兼職，今次就同大家分享一下DeFi嘅一啲投資入門技巧啦！ 一講起DeFi，好容易就喺網上搵到一大堆資料，但個個網都係Copy埋同一段嘢，無非話DeFi係「去中心化金融」，係開放同透明嘅創新金融體系之類，對於熟悉幣圈嘅朋友還好，但係對初初接觸區塊鏈嘅朋友仔嚟講無疑等同於火星文一樣咁難明啊！咁所以呢樣嘢係乜呢？ 其實所謂DeFi，並唔係好似NFT或者柴犬幣等等呢啲相對實質嘅嘢，更加似係一種概念，就好比虛擬銀行咁樣，泛指基於區塊鏈同虛擬資產有關嘅交易，而DeFi嘅應用包括支付平台丶身份驗證丶保險丶投資丶證劵丶交易所同儲貸等等，有各式各樣嘅項目，而所謂嘅DeFi投資，就係指挑選一啲有潛力發展嘅項目投資，例如係市面上可以搵到嘅DeFi理財產品。 成日聽啲人講DeFi又靈活又透明，因為佢最大嘅特點就係無所謂嘅管理員，每個使用者都有相同嘅權限，所有權分散，唔屬於任何人（所以叫去中心化）；而加密資產儲透過區塊鏈技術加上智能合約，分散地記賬於每一個區塊上面，唔會交由第三方去保管，使用者期間無須提供任何身份證明，所以相對會比較安全同保密㗎！ 要成為DeFi都唔係咁容易，首先要有相當健全嘅開發者平台丶又要開放程式碼（咁先夠透明），唔夠安全嘅話又冇人會用—咁係咪即係用DeFi平台一定安全呢？--咁又未必。啱啱都提到，DeFi平台上面每個使用者都擁有相同嘅權限，去中心化嘅特質意味著萬一發生任何金融糾紛，就好難去搵人調停/和解/處理啦。 DeFi係一個近年新興嘅話題，如果想了解更多關於呢方面嘅投資入門技巧，不妨先上網Google吓相關嘅資料，以免蒙受不必要嘅損失啊！另外，如果對DeFi丶區塊鏈或者虛擬貸幣投資有興趣嘅朋友可以搜尋一下有關嘅投資文章，例如最近大熱嘅挖礦，都係不少人嘅投資選擇！
