以前總覺得天然產品未必對自己皮膚有效。 「唔夠力」「會敏感」等等句子字眼，經常喺腦中出現。 最近身邊朋友開始整手工產品，加上自己皮膚開始差、要尋求其他方法。 朋友都係第1次整。佢選擇第1步係整「番皂」，仲係去咗台灣學習！ 第1次聽到「母乳皂」，即時諗：「咁都得？邊有咁多母乳整呀？」 番皂類嘅產品，起碼20年以上無用過。 多數中年以上或者BB先用，家中老爸都係仲用緊番皂沖涼！ 朋友送咗2款俾我作為「入門級用家」使用！ 第1款係頭髮用：迷迭香洗髮皂 第2款係身體用：薰衣草酪梨米糠皂 手工皂主要由精油配搭而成。 「迷迭香洗髮皂」主要由椰子油、苦茶油、酪梨油、蓖麻油、迷迭香精油、紅檀雪松精油製作而成。 椰子油係1種基礎油，主力幫忙起泡。「皂化」後唔會好似其他精油功效，不過比例方面係最重。 苦茶油比較難起泡，但係滋潤度高，係「洗髮皂」當中主要成份。 酩梨油（牛油果）滋潤度高兼洗淨力強，當中含有維他命A、E、B及蛋白質、卵磷脂及脂肪酸。有助滋潤柔軟肌膚、消除細紋；另1方面可以鎮靜安撫皮膚、改善皮膚過敏， 非常適合乾性皮膚、缺水、敏感皮膚人士使用。 蓖麻油係利用泠壓法取出，當中特有嘅「蓖麻酸醇」對髮膚柔軟及親水性佳，幫助洗完後溶水。 迷迭香精油可以幫助刺激頭髮生長及有效改善頭皮屑；另1方面對皮膚有收斂效果。 紅檀雪松精油幫助抗菌、軟化皮膚及保養髮絲。 「薰衣草酪梨米糠皂」主要由酪梨油、米糠油、棕梠油、椰子油、薰衣草精油製作而成。 椰子油今次都係幫忙起泡、棕梠油幫忙變硬，1齊作為基礎油！ 米糠油係油糙米外表1層米糠所製造而成，含有豐富維他命E、蛋白質、維生素、固醇、角鯊烯等物質。亦因為米糠油具有較細嘅分子，能夠平滑流動及非常容易滲透皮膚而不黏膩、能夠提供肌膚水分作為保濕、美白抗氧化、抑制肌膚細胞老化、抑制黑色素形成，令肌膚變得白淨。 酪梨油今次都係幫助加強洗淨能力軟化肌膚，改善皮膚過敏。 作為「主打」嘅薰衣草精油，能夠促進傷口癒合、止痛抗菌，主要作為修護之用。 上年11月中正式開始用！ 當初第1次用皂沖涼好唔慣，完全唔記得咗點用。 洗頭時總係感覺怪怪，唔知點樣起泡。 沖水沖好耐，好驚洗唔乾淨。 不過「迷迭香皂」用咗1個禮拜就放棄，因為要等1個月先有效果，改為沖涼之用。 「薰衣草皂」用咗1個禮拜就開始見效果！ 起泡要用少少時間放喺掌心磨擦，再用於每部分皮膚仔細塗上按摩。 點擊圖片放大 +2 如果加埋起泡袋，會更加容易而泡沬會細緻綿密。 大概我會分頸膊、左手、右手、肚、背、左腿、右腿、私密位、腳板。 用完皮膚無咁乾燥，感覺好自然舒服，甚至真係唔需要用BODY LOTION。 私密位1直用開清洗液，反而手工皂仲舒服、唔會有敏感情況。 不過1個禮拜後轉用咗「迷迭香皂」，將薰衣草推遲咗。 迷迭香用喺身上唔會無效果，甚至我覺得佢滋潤過薰衣草。 當時正值轉冷，溫度同濕度亦隨住降低，我以為會唔夠力。 身邊人竟然對呢件產品評價極高。 好記得每3個月1次嘅激光脫毛，治療師終於無話我皮膚乾，仲話我滑咗。 當我透露用緊手工皂嘅時候，佢非常建議我繼續用。 除此之外，膚色均勻兼少少白咗。 夏天時候1個月有2個船P，膚色前所未有地「黑」！ 3個月後著姊妹裙要露手臂嘅時候，皮膚都無分別。 反而用咗「皂」，逐漸平穩及均勻。 大概2個月時間用完迷迭香之後，用番薰衣草。 當時膚色已經有改善，露臂衫絕對難唔到我。 不過另1個考驗到了！ 正值轉換時候要去美國出TRIP幾日。為咗方便起見，無帶佢過去用。 當地天氣非常凍及濕度超低，令到皮膚「勁乾」「甩皮」，痕到要搽LOTION。 返到香港當晚，即刻轉番薰衣草沖涼。 皮膚即時得到舒緩，1星期後變番出TRIP前咁舒服。 薰衣草當中嘅米糠油可以幫助美白抗氧化，膚色開始偏向健康及偏白。 深信我繼續用佢，加上夏天做好防曬保護都無問題。 至於價錢方面，我覺得係物有所值！ $70用2個時間解決到我皮膚1直以來嘅問題，令我少咗痕癢。 氣味都比較舒服，鼻敏感嘅我都無影響。 私密位嘅效果係我最大驚喜！完全無敏感痕癢等唔舒服，反而1個「皂」代替咗2支沖涼用品。 相信「持之以恆」，係我今次最大嘅收穫！ Facebook Page: Winnie's Little World of Handmade Soap 妮妮手作香皂小天地
