Staycation浪潮還沒完結，酒店也不斷加推住宿優惠，困在香港的心也自不然想肆意找個空間喘息。最近尖沙咀的朗廷酒店 (The Langham Hong Kong) 再次推出 「零」房價住宿優惠，很多人也說這個是「貼錢送房加強版」：回贈相等於房價的消費額，於住宿當日使用。今次特別在於消費額不單可用於所有餐廳及酒吧，還可以用於SPA及周邊服務商品等等，官網說的有「川」身＋心療程、連續預訂客房、Langham香薰產品、轎車服務、房內minibar等！如果臨時想改變主意，可以喺住嘅7日前取消預訂，所以訂咗先都冇壞。訂購日期：9月16日至9月29日入住日期：10月1日至11月30日 剛好上次第一波 「零」房價的時候，我們住了兩晚城市景豪華客房。為甚麼不住套房？因為當時套房包的Club Lounge關閉了 (Club Lounge會包早餐、下午茶同cocktail小食及酒精類飲品)，同埋貪在住多晚，咁又可以有多啲消費額！兩人兩晚住宿連稅總共花了 $4100，所以就會有$4100的消費額給我們使用。這$4100的消費額用咗落米芝蓮3星「唐閣」粵菜晚餐跟兩餐早餐，如果想試「唐閣」的朋友，就可以繼續睇落去，究竟這 $4100 值唔值回票價！ 全幢最高16樓，今次我哋住喺13樓，算是高樓層，但高唔高也沒關係，因為酒店景色...都係望對面樓，如果鐘意望山海景嘅朋友，就可能爭啲喇。房間一眼睇晒，Style喺白色英倫典雅風配雲石，空間舒適，兩個人住都算啱啱好。 望返入面就係咁喇，百葉窗後就係廁所，百葉窗可以開關，唔想俾人睇到都可以閂～ 雪白的雲石廁所，又有個打卡位 雲石浴缸，想好了甚麼拍照POSE了嗎？ CHUAN是Langham自家品牌護理品牌 酒店有送上蘋果，雪櫃和mini bar也在這個位置 整個Staycation的重點就在擁有米芝蓮三星、得獎無數的粵菜廳「唐閣」，想去的朋友記得Book房前make sure住個日有位食+Book埋枱，否則到時住個日就食唔到喇！ 餐廳有兩層，二樓有窗，但晚上的時候，外面也漆黑一片，沒有甚麼景可言，所以晚上吃飯的話也沒關係吧。 Source: The Langham Hong Kong大部分人都話「唐閣」好食，而家有$4100嘅消費額，就試下係咪傳說中咁好食！當日我哋兩個諗都冇諗就叫咗佢嘅Tasting Menu，唔駛煩+已經包晒想試嘅嘢食 (蟹、龍蝦、和牛)，每人承惠 $1,280 (未加一)，埋單差唔多要 $2,816，基本上都係當免費咁食，感覺上都已經回咗本！ 再嚟望下個Menu，6樣Item你覺得食完唔會飽，但其實事實啱啱好相反，每道菜足料精緻，走嘅時候我哋要捧住個肚走。就係因為咁，搞到食到吉濱鮮鮑炆麵嘅時候就覺得比下去，最尾木糠布甸又畀到驚喜。再拉落啲你就知點解喺入正題前，餐廳侍應會端上熱茶、醬料同頭盤。 茶壺用蠟燭keep住溫度，望落去頓時高級咗 頭盤係炸鮮蝦同青瓜雲耳，我這些唔係專業食家當然係憑感覺食嘢啦，問過餐廳侍應意見，點他們自家醬料 (最左手邊，忘記是用甚麼做，有些豆腐、微辣) 是最夾味的。入口後，炸鮮蝦吃得出是新鮮爽彈，炸皮薄脆，不錯不錯。 吃過了頭盤後，就入正題喇！第一道菜：釀焗鮮蟹蓋上網看食評已經給這個足料的蟹蓋驚艷，到現場吃果真更加驚艷。餐廳侍應也在閒聊的時候跟我們說，她們用上的蟹蓋Size要一模一樣，所以要用買的啊，咁樣一講又係喎 (當然佢就冇透露到係點買啦，雖然我好想知)睇Youtuber「有啖好食 Perfect Continuous Eat」 嘅食評，話餐廳侍應會現場將蟹蓋放入摺好的餐巾挺貼心，讓你挖蟹蓋時能優雅的扶着蟹蓋，同時避免蟹蓋的油沾到手指上覺得不舒服，去到現場又真係咁覺得喎！ 忍不着了，一挖就挖到千絲萬縷的蟹肉絲，呢度唔知塞咗幾多隻蟹嘅蟹肉。。。。數唔到 再給大家看多點，真的很足料，蟹肉也鮮味彈牙，配着炸得脆身表面，吃得像電視上的主持人不斷說着唔～唔～好味啊唔～食完整隻之後也開始覺得飽了 (雀仔胃發作) 第二道菜：海味雞煲官燕你可能會話，車咪又係同酒樓個啲要落醋食嘅一樣，個樣冇咩特別喎，而個人嚟講都覺得唔係特別好食。今次唐閣嘅呢碗係用海參、官燕、雞絲煲成，同平時用冬菇同素翅係唔同嘅，冇醋俾你點，務求要你試真個味 味道先唔講，一挖就見到好足料，其實我平時都唔太好呢啲，但今次都有食晒，事緣太足料，味道微帶鮮甜，但始終個人喜好問題，呢道菜唔會話WOW好好食呀 (鐘意嘅朋友就可能會好鐘意) 第三道菜：黃金焗開邊龍蝦這條龍蝦！！是我人生裏吃過最好吃的龍蝦，你當我誇張也好吧，但真的很邪惡，因為龍蝦上面鋪着的就是鹹蛋黃碎！ 整條鮮嫩多汁、肉質緊緻，吃得出非常新鮮，配搭着濃郁的鹹蛋黃碎十分有驚喜！ 不要拿自助餐的任夾龍蝦跟這比較，因為真的沒法比，兩樣嘢嚟～ 第四道菜：燒汁茭筍和牛粒自這次吃完之後，我應該到現在還在說同一句說話：食完呢舊應該唔駛再喺日本食和牛了。本身一食牛就有罪惡感，所以一直也想減少吃牛。成日都話，食咗好食嘅就唔洗曬時間再搵再試。 今次找到了畢生難忘的和牛粒，成日睇人哋話入口即融，我諗我而家知咩係入口即融，牛脂喺口裏面散佈每個味蕾，食完真心覺得滿足同飽，之後嘅都已經好勉強先食得落，而家大家明白點解頭先話個麵有少少比下去，因為呢幾道菜實在太惹味！ 第五道菜：鮑汁吉濱鮑炆麵如果你叫我單吃或許會好味一點，但去到而家呢個Stage再食真係食唔落，變咗欣賞唔到呢碗麵嘅優點。麵條又薄又軟帶點爽彈，平常餐廳吃的可能麵條的蛋味較重，但這碗麵吃得出是炆得入味。 第六道菜：木糠忌廉凍豆腐配精美甜點這看似普通的木糠忌廉，其實跟大家在街上買到的有很大分別，吃完之後我很想挑戰在家自製！ 忌廉軟滑濃郁，驚喜的是中間夾着一層不甜的普通百福凍豆腐 (很nice的餐廳侍應告訴我的)，軟滑跟爽彈形成對比，意外得相襯，也中和了整體的甜，十分得體。Bliss Point! 身後的精美甜點其實就是桂花糕跟啤梨外形的紅豆蓉。 去到這個位縱使有幾好食也會覺得普通，因為重頭戲已過，正常水準吧！ 另外我們還有叫唐閣的Signature 唐閣寶盒飯，但個人認為唔洗試...因為得個樣，炒飯偏乾，官網Facebook指「金黃的炒飯加入手撕新鮮蟹肉、帶子等上乘食材」，現場沒有甚麼特別餡，無論味道跟內涵都跟普通焗飯差不多 對不起，但你真的很普通... 好啦～吃完唐閣了，不知道從哪裏開始點起的朋友，推薦去吃她的Tasting Menu，6道菜裏有4道菜也很挺滿意，住兩晚的我們已經夠晒cover兩人，所以這餐是免費，好抵食，住一晚的朋友也可以剛好cover 一個人的價錢，如果兩個人去食的話就已經是超過50% OFF喔！剩下的消費額也用了在早餐上 (因為第一波的零房價只可以是餐飲嘛)，大體上早餐是正常普通，頭一天的蛋還是又乾又硬，第二天早上要跟酒店職員說明：「昨天的蛋有點乾硬，今次可唔可以煮得冇咁熟」才有些微改善呢，Pancake和Waffle也是硬得可以敲鼓。。。只有薯餅和生果是覺得好吃：D 抵食是抵食的，如果有要求的朋友，建議不要再點這個早餐了。給大家看看吃了兩天的早餐是如何啦 ▲朗廷酒店大部分的MENU也只得簡體和英文，住嘅時候都真係有啲似唔喺香港架HHAHAH第一天早餐 第二天早餐點擊圖片放大 +4 總結一下，這兩晚的住宿重點一定不在房間，而是回贈的消費額怎樣用，Book房的心態就是俾錢用餐、做SPA，然後送房給你住，這樣是不錯的了。不過真心強烈建議不要房內用餐(尤其是早餐)，因為質素跟堂食的一定有差別，也想不到可以差這麼多...如果想玩多啲嘢可以Book行政房或以上嘅房間，因為包埋Club Lounge Access (有早餐、下午茶同cocktail時段、酒精類飲品及小食) + 回贈消費額，更加抵玩！希望大家也喜歡以上的分享，好啦下次再談！
